Milimo ya Batumwi 22 - Baibo Busansulushi Bwa Libuku Ili

¹ “Nobamakwesu anobamashali bangu basankwa, munyumfwishishe mbweshi musansulwite ayi nshicite mulandu.”

² Ono ndibakanyumfwa kaabaambila muciEbulu, bakaboolabo tontolo. Mpeeke Paulo wakatolelela kubalwiita ayi,

³ “Nebo ndi muJuda, ndakashalilwa mundabala ya Tasasi mucishi ca Silisiya, sombi ndakakulila momuno mundabala inene ya Jelusalemu. Gamalyelo ngowakalinga kunjiisha. Wakanjiisha kabotu kabotu bwakukonkela Milawo yakapekwa bamashali besu bakulukulu alimwi ndakalinga ndalibenga kusebensela Lesa bweenka mbuli mbomubete noonse nomuli waano.

⁴ Ndakapensha bantu abo bakalinga kukonkela Nshila iyi ya Mwaami Jesu kushikila bacaikwa. Ndakacata basankwa abanakashi baanji akubaangisha.

⁵ Mupailishi munene alimwi abeshinkuta boonse inga basumina ayi ntokwaamba cancinencine. Balo bakalinga kumpa makalata akutola kubaJudanyineesu muDamasikasi. Aboobo ndakalinga kuya mukucata bantu aba akubaboosha muJelusalemu kabaangitwe kwaamba ayi bese bapekwe mulandu.

Paulo mbwaakaamba mbuli mbwaakashoma muMwaami

⁶ “Ndindakashika pafwaafwi andabala inene ya Damasikasi, lisuba kalili pakati kamutwi, mumuni wakaswa kwiculu wakabeka abuumbi pali ndime.

⁷ Mpeeke ndakawita panshi akunyumfwa liswi lyakwaamba ayi, ‘Saulo, Saulo! Ino utoompensheshanshi?’

⁸ Ndakeepusha ayi, ‘Ino ndimwe baani Nkambo?’ Lakwe wakakumbula ayi, ‘Ndime Jesu wa kuNasaleti ngootoopensha.’

⁹ Basankwa abo mbondakalingaabo bakabona mumuni, sombi tabakwe kunyumfwa liswi lya wooyo wakalinga kwaamba anebo.

¹⁰ Mpeeke ndakeepusha ayi, ‘Ino ncite buyani Nkambo?’ Lyalo Mwaami wakaamba ayi, ‘Nyamuka uye muDamasikasi umo mweshi ulwiitwe shoonse Lesa nshaasuni ayi ucite.’

¹¹ Ndakapofola ceebo ca mumuni wakabeka bunene, mpeeke mbondakalingaabo bakancatililabo kulyaansa kuntola kuDamasikasi.

¹² “Mundabala inene iyi mwakalinga musankwa wiitwa ayi Ananiyasi wakalinga kulambila Lesa amoyo wakwe woonse alimwi akukonkela Milawo. Wakalinga kulemekwa kubaJuda boonse ba kooko.

¹³ Wakesa weemikana pafwaafwi anebo akwaamba ayi, ‘Mukwaabo Saulo, talika kubona alimwi!’ Paciindi ceenka ico ndakatalika kulasha akumubona.

¹⁴ Mpomunyaawo wakaamba ayi, ‘Lesa ngobakalinga kulambila bamashali besu bakulukulu, wakusala kwaamba ayi ushibe kubamba kwakwe akubona Musebenshi wakwe ululeme alimwi akunyumfwa mwiine kaamba awebo.

¹⁵ Ulaakuba kamboni wakwe akwaambila bantu boonse pasheesho nshewabona akunyumfwa.

¹⁶ Ino ucilindilanshi? Nyamuka ulumbaishe liina lyakwe, ubombekwe, Lesa akusalashe kwaamba ayi shibiibi shako shilekelelwe.’

Paulo mbwaakalwiitwa kushimikila baswamashi bakunsengwe

¹⁷ “Lyalo ndakaboolela kuJelusalemu. Ndindakalinga kupaila muŊanda yakwe Lesa, ndakabona cili anga nciloto.

¹⁸ Ndakabona Mwaami kaandwiita ayi, ‘Fwambaana, swaamo muJelusalemu muno mukwiinga bantu teshi banyumfwe makani apali ndime ngweshi ubalwiite.’

¹⁹ Nebo ndakaamba ayi, ‘Nkambo, bantu boonse aba balishi kabotu ayi nebo ndakalinga kuya mushoonde sha baJuda mukwaanga akuuma baabo bashoma muli ndimwe.

²⁰ Peculu lya waawo ndibakalinga kucaya Sitifini wakalinga kulwiita bantu shapali ndimwe, nebo ndakalingaawo. Ndakasumina pantu pomwi ambabo ayi bamucaaye alimwi ndime ndakalama shakufwala sha peculu sha baabo bakalinga kumucaya.’

²¹ Ono Mwaami wakandwiita ayi, ‘Koyabo mukwiinga ndaakukutuma kulaale, kubaswamashi bakunsengwe.’ ”

²² Bantu bakalinga kukutika mbwaakalinga kwaamba kushikila ndyaakaamba shakuya kubaswamashi bakunsengwe. Lyalo bakatalika koolobesha ayi, “Atumucaaye! Teelete kuba muumi!”

²³ Bakalinga koolobesha, kutambeeka shakufwala shabo sha peculu mwiculu akutukoola lusuko.

²⁴ Mpomunyaawo mutanjilili munene wa bashilumamba bene Loma wakabaambila ayi batole Paulo mulilinga lyabo akumukwiipila mumo kwaamba ayi beshibe ncebakalinga kumuyobelela boobo bantu.

²⁵ Sombi ndibakamwaanga ayi akwiipwe, Paulo wakeepusha mutanjilili wa bashilumamba mwaanda wakalinga kwiimfwi pafwaafwi ayi, “Sa mulawo ulasuminisha kukwiipa mwine Loma kamutana kumoombolosha akumucanina mulandu?”

²⁶ Ono mutanjilili wa bashilumamba mwaanda ndyaakanyumfwa boobo, wakaya kumutanjilili wabo munene mukwiipusha ayi, “Ino mutoocita buyani? Musankwa uyo ngumwine Loma!”

²⁷ Mpeeke mutanjilili munene wa bashilumamba wakaya kuli Paulo mukwiipusha ayi, “Ndwiite, sa uli mwine Loma?” Alakwe Paulo wakakumbula ayi, “Ee.”

²⁸ Lyalo mutanjilili munene uyo wakaamba ayi, “Nebo ndakacita kulipila maali aanji kubeendeleshi kwaamba ayi mbe mwine Loma.” Paulo wakakumbula ayi, “Sombi nebo bashali bangu boonse bakalinga bene Loma.”

²⁹ Paciindi ceenka ico bashilumamba abo bakalinga kusuni kumwiipusha bakasoonoka. Alakwe mutanjilili munene wakaloonda ndyaakeebaluka ayi wakapingula Paulo mwine Loma kwaangwa ncetani.

Paulo mbwaakaliimikanina pameenso a beshinkuta

³⁰ Aboobo pabushiku bwakaboolaawo, mutanjilili munene uyo wakalinga kusuni kwishiba mulandu baJuda ngobakalinga kupa Paulo. Mpeeke wakaambila bashilumamba ayi baangulule Paulo akwaambila bamatanjilili ba bapailishi alimwi abeshinkuta boonse ayi babungane. Lyalo bakatola Paulo akumwiimika kunembo lyabo.