Milimo ya Batumwi 2 - Baibo Busansulushi Bwa Libuku Ili

Kwisa kwa Mushimu Usalashi

¹ Bushiku bwa Pentekositi ndibwakashika, bashomi boonse bakalinga kubungene muŋanda yomwi.

² Mpomunyaawo bakanyumfwa coongo cakuba anga ncipuupu kuswa kwiculu akususha ŋanda yoonse njebakalingaamo.

³ Lyalo bakabona shimwi shakalinga kuboneka anga njimilaka ya mulilo iyo yakaya mukwikala pali womwi awomwi.

⁴ Mpeeke boonse bakesushikwa Mushimu Usalashi akutalika kwaamba mishobo imwi, kweelana ambowakabatanjilila Mushimu uyo.

⁵ MuJelusalemu mwakalinga baJuda bakalinga kulemeka Lesa abo bakaswa mushishi shipusenepusene.

⁶ Ndibakanyumfwa ciyobeyobe ici, bantu baanji baanji bakabungana. Boonse bakakankamana abuumbi ceebo womwi awomwi wakanyumfwa bashomi kabaamba mumulaka wakwe mwiine.

⁷ Cikani ici cakabashingulusha mitwi akwaamba ayi, “Sa te aba bantu boonse batokwaamba bobulya mbene Galili?

⁸ Ino nceebonshi swebo soonse tutoobanyumfwa kabaamba mumishobo yesu?

⁹ Sobamwi tulaswa kucishi ca Paatiya, Mediya akuElamu, kuMesopotamya, Judeya, Kapadosiya, Pontusi alimwi akuEsha.

¹⁰ Bamwi balaswa kucishi ca Fuligiya akuPamfilya, kuIjipiti alimwi akumisena ili mucishi caLibya kufwaafwi aSailini. Swebo sobamwi tuli beensu tulaswa kuLoma,

¹¹ bamwi mbaJuda abaswamashi bakunsengwe bakonkela kwiisha kwa baJuda alimwi swebo sobamwi tulaswa kuKileti akuAlebya. Nakubi boobo soonse tutoonyumfwa kabaamba mishobo yesu shashintu shinene isho Lesa nshaakacita!”

¹² Ceebo cikani ici cakabashingulusha mitwi, bakatolelela kwiipushanya womwi awomwi ayi, “Ino ici citoocitika cilaambanshi?”

¹³ Sombi bamwi bakatalika kuseka bashomi kabaamba ayi, “Taaku cimbi, mbwalwa bwabakola!”

Pita mbwaakashimikila Makani Abotu

¹⁴ Mpomunyaawo Pita wakanyamuka abatumwinyina bali likumi awomwi akutalika kwaambila likoto lya bantu muliswi lya peculu ayi, “Mwebo nobaJudama amwebo noonse nomwikala muJelusalemu, amukutike alimwi munyumfwishishe makani aya mbwaabete.

¹⁵ Aba bantu tabakoletweewo kweelana ambomutooyeeya, ceebo licilibo macuunsa.

¹⁶ Anu ici ncecakaamba mulaluki mukulukulu Jowelo ayi,

¹⁷ ‘Lesa wakaamba ayi, Munshiku shamamanino, ndaakutila Mushimu wangu pabantu boonse. Bana banu basankwa abanakashi balaakwaamba maswi angu. Bacikula bwangu banu basankwa balaakubona shintu anga muciloto, abalo bamacembele banu basankwa balaakulota shiloto.

¹⁸ Ee, ndaakutila Mushimu wangu apabasebenshi bangu, basankwa abanakashi munshiku isho, alimwi balaakwaamba maswi angu.

¹⁹ Ndaakucita shaankamiko kwiculu alimwi ashitondesho sha nkusu sha kwiculu pacishi ca panshi. Kulaakuba bulowa, mulilo alimwi ashikunku wa bwiishi.

²⁰ Lisuba lilaakuboolabo mbi, awalo mweenshi ulaakusalalabo pyu anga mbulowa, kabutana kushikila bushiku bwangu nebo neMwaami Lesa, ubo bunene bwa bulemu.

²¹ Lyalo uyo woonse usenga ndime neMwaami Lesa ayi mucaafwe, ncakwiila ulaakupulushikwa.’

²² “Mwebo nobene Isilaelima, amukutikishe makani aya ngontoomulwiita! Ulya Jesu wa kuNasaleti wakalinga muntu uyo Lesa ngwaakatondesha ayi ngowooyo ngwaakasala akumutuma kuli ndimwe. Lesa wakabonesha cikani ici, kwiinda mushaankamiko ashitondesho sha nkusu sha kwiculu nshaakacita muli Jesu pakati kanu, kweelana ambuli mbomwishi.

²³ Kweelana akuyanda kwakwe mwiine Lesa, wakabambila limwi ayi Jesu ulaakwaabwa mumaansaanu. Mpeeke mwebo mwakalengesha ayi bamucita shibi bamupope pamucilingano.

²⁴ Sombi Lesa wakamwaangulula kushicisa sha lufu akumubusha kuswa kubafu ceebo tecakalinga kukonsheka ayi lufu inga lwamukoma.

²⁵ Mukwiinga Defedi wakaamba shapali nguwe ayi, ‘Ndakalinga kubona Mwaami Lesa kunembo lyangu lyoonse, ceebo uli pafwaafwi anebo, aboobo teshi nkapenge.

²⁶ Paceebo ceeco moyo wangu wakondwa abuumbi, alimwi ndisangalete abuumbi bulya ndintokwaamba. Awalo mubili wangu wa buntu ulaakookesha akulangila muli Lesa.

²⁷ Mukwiinga teshi mukandekeleshe ayi nkanoolibo mumusena wa bafu, nabi kundekelesha neMusebenshi wanu Usalalite ayi mbole.

²⁸ Mwebo mwakanshibisha nshila shitola kubuumi, alimwi ceebo mwebo muli anebo, ndasangalala abuumbi.’

²⁹ “Nobamakwesu, ndyeelete kumulwiitilisha kabotu pamakani amwaami wesu Defedi mukulukulu. Lakwe wakafwa akufukilwa, alimwi cuumbwe cakwe nkocicili abobulya.

³⁰ Ceebo wakalinga mulaluki mukulukulu, wakeshiba ayi Lesa wakamushomesha akumukonkomesha ayi mulunyungu lwakwe mulaakuswa aumwi mwaami ngweshi akabe mbuli nguwe.

³¹ Ndyaakeshiba sheshi shikacitike kunembo, Defedi wakaamba shakubuka kwa Usalitwe wakwe Lesa. Wakaamba ayi, ‘Lesa taakwe kumulekelesha ayi ekalilile kumusena wa bafu, awalo mubili wakwe tookwe kubola.’

³² Lesa wakabusha Jesu uyu kuswa kubafu, aboobo swebo soonse tuli bakamboni ba shintu ishi.

³³ Wakasumpulwa akuba kulubasu lwalulyo lwakwe Lesa akutambula Mushimu Usalashi kuswa kuli Lesa Ishi, kweelana ambwaakamushomesha. Ishi nshemutoobona akunyumfwa, ncipo ca Mushimu Usalashi Jesu ncaatila pali ndiswe.

³⁴ Nakubi kwaamba ayi Defedi taakwe kuya kwiculu, sombi wakaamba ayi, ‘Mwaami Lesa wakaambila Mwaami wangu ayi, Kala kululyo lwangu

³⁵ kushikila nkaalule balwani bako ayi babe mpo pakulyata myeendo yako.’

³⁶ “Aboobo mwebo nobene Isilaeli noonse, amwishibishe calushinisho ayi Jesu uyo ngomwakapopa pamucilingano, ngowooyo Lesa ngwaakabika ayi abe ngoMwaami alimwi ngoUsalitwe wakwe!”

³⁷ Ono bantu ndibakanyumfwa boobo, bakapenshekwa abuumbi mumyoyo. Lyalo bakeepusha Pita abatumwinyina ayi, “Nobamakwesu, ino tucite buyani?”

³⁸ Pita wakabakumbula ayi, “Amusanduke kuswa kushibiibi shanu, mubombekwe muliina lyakwe Jesu kwaamba ayi Lesa amulekelele akumupa Mushimu Usalashi.

³⁹ Mukwiinga Lesa nshaakashomesha, wakashomesha ndimwe abana banu alimwi abaabo boonse bali kulaale, abo Mwaami Lesa mbwaaita.”

⁴⁰ Pita wakatolelela kubaambila maswi amwi aanji akubacenjeshaako kaamba ayi, “Amulipulushe kumapensho ayo eshi akacitikile bamucita shibi ba cecino ciindi!”

⁴¹ Mpeeke bantu baanji bakashoma maswi akaamba Pita. Lyalo bakabombekwa. Alimwi pabushiku bweenka ubo, bantu aba bakaba mulikoto lyabo mpashi bakalinga shuulu shotatwe.

⁴² Ciindi coonse bantu aba bakalinga kubungana pantu pomwi ayi batumwi babeeishe. Bakalinga kwikala mubwanabwankashi akulita pantu pomwi alimwi akupaila.

Bwikaalo bwa bashomi mbobwakalinga

⁴³ Bantu boonse bakabona shaankamiko alimwi ashitondesho sha nkusu sha kwiculu Lesa nshaakacita kwiinda mubatumwi, bakakankamana.

⁴⁴ Boonse abo bakalinga kushoma muli Jesu bakatolelela kwikala mubwanabwankashi lyoonse akusebensesha buboni bwabo pantu pomwi.

⁴⁵ Nkokwaamba ayi bakalinga kuulisha buboni bwabo, ashintu shoonse nshebakalinga kucite akwaabanya maali kweelana akubula kwa muntu womwi awomwi.

⁴⁶ Bushiku abushiku bakalinga kubungana amoyo womwi muŊanda yakwe Lesa akulita pantu pomwi mumaandaabo amyoyo yakusangalala akuliceesha.

⁴⁷ Bakalinga kulumbaisha Lesa, mpeeke abantu boonse bakakondwa ndibakabona ncito yabo. Alakwe Mwaami wakalinga kuletelamo bantu abamwi inshiku shoonse mulikoto lyabo, abo bakalinga kupulushikwa.