Milimo ya Batumwi 16 - Baibo Busansulushi Bwa Libuku IliTimoti mbwaakaya aPaulo alimwi aSailasi 1 Paulo wakashika kuDebe, lyalo wakaya kuLisitila uko kwakalinga kwikala mushomi wiitwa ayi Timoti. Banyina bakalinga baJuda bashomi, sombi baishi bakalinga baGiliki. 2 Boonse bashomi bakalinga kwikala mumandabala a Lisitila alimwi aIkoniyamu bakalinga kwaamba Timoti ayi ngumuntu kabotu. 3 Paulo wakalinga kusuni kuya aTimoti aboobo wakamupalula mukwiinga baJuda boonse bakalinga kwikala kooko bakalinga kwishi ayi baishi bakalinga baGiliki. 4 Ndibakalinga kuya bweenda mumandabala, bakalinga kuya caambila bashomi ayi bakonkele milawo iyo yakabika batumwi alimwi abamatanjilili ba coonde muJelusalemu. 5 Lyalo bantu ba mushoonde bakayuma mulushomo alimwi bakalinga kufulilaako bushiku abushiku. Paulo mbwaakabona muntu anga muciloto wa kuMakedoniya 6 Paulo ababye bakeenda munyinsa ya Fuligiya aGalatiya, mukwiinga Mushimu Usalashi wakabakasha kushimikila maswi akwe Lesa mucishi ca Esha. 7 Ndibakashika kumanyinsa a cishi ca Misiya, bakalinga kusuni kwaamba ayi baye mucishi ca Bitiniya, sombi Mushimu wakwe Jesu wakabakasha. 8 Lyalo bakeenda kuMisiya akuya kundabala ya Tulowasi. 9 Mashiku Paulo wakabona muntu anga muciloto kaaimfwi akumukombelela ayi, “Kosa kuMakedoniya utucaafwe.” 10 Ndyaakamanabo kubona boobo Paulo, twakalibambila kuya kuMakedoniya mukwiinga twakeshiba ayi nguLesa wakalinga kusuni ayi tukashimikile Makani Abotu uko. Lidiya wa kuFilipi mbwaakashoma muli Jesu 11 Twakanyamuka abwaato bunene kuswa kuTulowasi akuya kunsumbu ya Samotilesi. Bushiku bwakaboolaawo twakashika kuNiyapolisi. 12 Kuswa kooko twakaya kuFilipi, ndabala inene iindaawo mucishi ca Makedoniya iyo bene Loma njebakalinga kweendelesha. Twakekala nshiku shiinji mundabala iyo. 13 Pabushiku bwakookesha bwa Cibelu, twakaswita pansengwe lya mwinjililo wa ndabala akuya kuloombe lwa mulonga uko nkotwakayeeya ayi kuli musena uko baJuda nkobapailila. Twakekala akutalika kwaamba abanakashi bakabungana uko. 14 Pakati kabo pakalinga umwi mwanakashi wiitwa ayi Lidiya uswa kundabala ya Tiyatila. Wakalinga shimakwebo wa shisani shifubelafubela shamakwebo alimwi mwanakashi uyu wakalinga kulambila Lesa. Lyalo Lesa wakamucalula kalango ayi anyumfwishe nshakalinga kwaamba Paulo. 15 Ndyaakamana kubombekwa abantu abo mbaakalinga kwikalaabo muŋanda yakwe, wakatwiita soonse ayi, “Mbuli mbomwasumina ayi ndashooma amoyo wangu woonse muMwaami Jesu katiya kuŋanda yangu.” Lyalo wakatukombelela ayi tuye. Paulo aSailasi mbobakabikwa muntolongo kuFilipi 16 Bushiku bumwi nditwakalinga kuya kumusena wakupaililaako, twakacana mwanakashi musha, wakalinga kucite shikaswa uyo wakalinga kumupa nkusu shakulaluka. Kwiinda mukulaluka kwakwe, wakacanina baami bakwe maali aanji. 17 Uyu mwanakashi wakalinga kwisa cikonkela Paulo aswebo, kaaolobesha ayi, “Aba basankwa mbasebenshi bakwe Lesa wa kwiculu Wiindaawo! Batooshimikila mbweenga mwapulushikwa.” 18 Wakalinga kucita boobo kwanshiku shiinji. Mpeeke Paulo wakakalala akupiluluka kwaambila shikaswa wakalinga mumwanakashi uyo ayi, “Kwiinda munkusu shakwe Jesu Klistu ntookwaambila ayi swaamo mumwanakashi uyu!” Paciindi ceenka ico shikaswa wakaswaamo. 19 Lyalo bene musha uyo ndibakabona ayi teshi anoobacanina maali, bakakalala akucata Paulo aSailasi akubatola kuboomboloshi mumusena wakalinga kucanika bantu baanji. 20 Bakabatola kuboomboloshi bene Loma akwaamba ayi, “Aba basankwa mbaJuda, ono batooleta shimfulunganya mundabala. 21 Batokwiisha kwishibila kwa bakulukulu kuteendelani amilawo yesu. Swebo tuli bene Loma, ono inga tatusumini nabi kukonkela kwiisha kwabo.” 22 Lyalo bantu boonse bakalingaawo bakatalika kuuma Paulo aSailasi. Mpeeke boomboloshi bene Loma bakaambila bantu ayi bakwamune shakufwala shakwe Paulo aSailasi akupingula ayi baboome misako. 23 Ndibakamana kubooma cankusu, bakababika muntolongo. Lyalo boomboloshi bakaambila shikulindilila ntolongo ayi abalaame cancinencine. 24 Ndyaakanyumfwa makani aya uyo shikulindilila, wakaya mukubacalila mucipinda ca mukati. Wakabaanga myeendo muminkulwa yobilo. 25 Ingayi pakati ka mashiku Paulo aSailasi bakalinga kupaila akwiimba nyimbo shakulemeka Lesa. Abalo bakailinyinaabo bakalinga kukutika mbuli mbobakalinga kwiimba. 26 Mpomunyaawo kwakaba citentanshi cinene ico cakatenkaanya alwiimbi lwa ntolongo. Mpeeke milyango yakacaluka ancetani shakaloka kuswa kubakaili. 27 Shikulindilila ntolongo ndyaakabuka akubona ayi milyango ilicalukite, wakayeeya ayi bakaili boonse bamana kuloboka. Lyalo wakakwela mupeeni wakwe mookala ayi alicaaye. 28 Sombi Paulo wakoolobesha ayi, “Utalicaayi! Swebo soonse motuli!” 29 Lyalo shikulindilila uyo wakaambila umwi ayi amuletele lilampi. Mpeeke wakeendililabo kwinjila akuliwaala muliimfwa lyakwe Paulo aSailasi kaatutumabo. 30 Lyalo wakabakushisha pansengwe akubeepusha ayi, “Nobamaloba, ino inga ndacita buyani kwaamba ayi mpulushikwe?” 31 Bakakumbula ayi, “Shoma muMwaami Jesu. Lyalo utoopulushikwa, webo abamuŋanda yako boonse.” 32 Kuswawaawo bakatalika kushimikila maswi a Mwaami Jesu kuli nguwe alimwi abamuŋanda yakwe boonse. 33 Paciindi ceenka ico, mashiku, shikulindilila kuntolongo wakabatola muŋanda mukubasansha shilonda, lyalo lakwe abamuŋanda yakwe bakabombekwa. 34 Mpomunyaawo wakabwesa Paulo aSailasi wabatola muŋanda yakwe akubapa cakulya. Lakwe abamuŋanda yakwe bakasangalala abuumbi mukwiinga ono bakashoma muli Lesa. 35 Ndibwakaca macuunsa boomboloshi bene Loma bakatuma bashilumamba mukulwiita bamwi ayi, “Amubaleeke basankwa abo baye.” 36 Lyalo shikulindilila wakaambila Paulo ayi, “Boomboloshi batumya maswi ayi webo aSailasi mwaangululwe. Aboobo kamuya mweendebo muluumuno.” 37 Sombi Paulo wakaambila bashilumamba ayi, “Swebo tabakwe kutucanina mulandu, sombi balo boomboloshi bakaambila bantu ayi batukwiipe abantu boonse kabeebela. Peculu lya waawo swebo tuli bene Loma. Sombi balo bakatubika muntolongo, ono balisuni kutukusha kumapela! Taceelete kuba boobo! Balo boomboloshi abo balyeelete kwisa mukutukusha beene.” 38 Bashilumamba lyalo bakaya mukulwiita boomboloshi makani aya. Ono ndibakanyumfwa ayi Paulo aSailasi mbene Loma bakaloonda abuumbi. 39 Mpomunyaawo boomboloshi bakaya mukulilekelela kuli mbabo. Lyalo bakabakusha muntolongo akubasenga ayi basweemo mundabala inene iyo. 40 Kuswawaawo Paulo aSailasi bakaswaamo muntolongo akuya kuŋanda yakwe Lidiya uko nkobakakumana abashominyinaabo. Ndibakamana kubayumyayumya, bakaswaamo mundabala inene umo. |
Lenje Bible with Deuterocanon © Bible Society of Zambia, 2003.
Bible Society of Zambia