Milimo ya Batumwi 11 - Baibo Busansulushi Bwa Libuku Ili

Pita mbwaakalwiita coonde ca kuJelusalemu shakacitika

¹ Mpomunyaawo batumwi alimwi abashomi bamwi ba mucishi ca Judeya coonse bakanyumfwa ayi baswamashi bakunsengwe bamwi abalo bakashoma mumaswi akwe Lesa.

² Ono Pita ndyaakaboola kuJelusalemu, abo bakalinga kusuni ayi abalo baswamashi bakunsengwe banoopalulwa, bakatalika kutongooka. Bakaamba ayi,

³ “Webo wakaya muŋanda ya baswamashi bakunsengwe batakwe kupalulwa alimwi akulyaabo!”

⁴ Mpeeke Pita wakatalika kubasansulwita makani oonse mbwaakalinga kuswa kumatalikilo.

⁵ Wakaamba ayi, “Ndindakalinga kupaila mundabala inene ya Jopa, ndakabona cimwi cintu cakalinga kuboneka anga ncisani cinene caangitwe mumakonko oonse one kaciswa kwiculu. Mpeeke cakeemikwa kunembo lyangu.

⁶ Ndindakalangishisha, ndakabonamo banyama ba mumushi aba muluundu, ntaale ashintu shimwi sha mushobo uyo alimwi abayuni ba muluundu.

⁷ Kuswawaawo ndakanyumfwa liswi lyakwe Lesa lyakwaamba ayi, ‘Buka Pita, ucaye ulye!’

⁸ Sombi nebo ndakaamba ayi, ‘Tau, Nkambo! Ceebo taaku cintu citasalalite nabi cibiibi kweelana aMilawo ncendakalyaawo kale.’

⁹ Liswi lyakanyumfwika alimwi kuswa kwiculu ayi, ‘Utanokwaamba ayi taceelete kulikwa cintu coonse Lesa ncaamba ayi cilalikwa.’

¹⁰ Ici cakacitika mankanda otatwe, kuswawaawo cintu ico cakabooshekwa kwiculu.

¹¹ Paciindi ncemunya ico, basankwa botatwe bakashika paŋanda mpondakalinga kwikala. Basankwa aba bakatumwa kuli ndime kuswa kuSisaliya.

¹² Mpomunyaawo Mushimu Usalashi wakandwiita ayi njaabo cakutacelwa. Lyalo ndakaya kuSisaliya abashominyineesu bali bosanwe awomwi ba kuJopa. Mpeeke soonse twakaya muŋanda yakwe Konelyasi.

¹³ Wakatusansulwita mbuli mbwaakabona munjelo kaaimfwi muŋanda. Munjelo uyo wakaambila Konelyasi ayi, ‘Tuma bantu kuJopa mukwiita musankwa wiitwa ayi Simoni Pita.

¹⁴ Utoosa mukukulwiita maswi eshi apulushe ndiwe aba muŋanda yako yoonse.’

¹⁵ Ndindakatalika kubalwiita, Mushimu Usalashi wakesa pali mbabo bweenka mbowakesa pali ndiswe kumatalikilo.

¹⁶ Lyalo ndakeebaluka maswi akaamba Mwaami Jesu ayi, ‘Joni wakalinga kubombeka amaanshi, sombi mwebo mulaakubombekwa aMushimu Usalashi.’

¹⁷ Ono na Lesa abalo wakabapa cipo ca Mushimu Usalashi ceenka ncaakatupa aswebo nditwakashoma muli Jesu Klistu, ino nebo ndicite nkusunshi shakukasha Lesa?”

¹⁸ Ono ndibakanyumfwa makani aya, bakacileka kumutongooka. Mpeeke bakatalika kulumbaisha Lesa, kabaamba ayi, “Anu Lesa wapa abaswamashi bakunsengwe coolwe cakusanduka kuswa kushibiibi shabo kwaamba ayi babe abuumi!”

Coonde ca kuAntyoki

¹⁹ Bamwi bashomi abo bakapalangana ceebo ca mapensho akabacitikila Sitifini ndyaakacaikwa, bakaya mukushika akuFonisha, Saipulasi alimwi akuAntyoki. Bakalinga kuya cishimikila makani apali Jesu kubaJuda beenkabo.

²⁰ Sombi bamwi basankwa bashomi ba kuSaipulasi akuSailini, bakaya kuAntyoki kabaya bushimikila Makani Abotu aamba paMwaami Jesu akubaswamashi bakunsengwe.

²¹ Nkusu sha Mwaami Lesa shakalinga ambabo alimwi bantu baanji bakashoma akusandukila kuMwaami Jesu.

²² Makani aya akanyumfwika kucoonde ca muJelusalemu, lyalo bakatuma Banabasi kuAntyoki.

²³ Ono ndyaakashika akubona Lesa mbwaakapa coolwe bantu abo, wakakondwa. Wakabayuminisha ayi batolelele kushoma muMwaami Jesu amyoyo yabo yoonse.

²⁴ Banabasi wakalinga muntu kabotu utanjililwa aMushimu Usalashi alimwi wakalinga kucite lushomo lunene. Mpeeke bantu baanji bakashoma muMwaami Jesu.

²⁵ Lyalo Banabasi wakaya kuTasasi mukulangoola Saulo.

²⁶ Ndyaakamucana, wakamutola kuAntyoki. Mpeeke Saulo aBanabasi bakalinga kwikala mubwanabwankashi abantu ba mucoonde alimwi akwiisha bantu baanji kwamwaaka woonse. KuAntyoki nkomunya uko, bashomi nkobakataanguna kwiitwa ayi bene Klistu.

²⁷ Paciindi ici balaluki bamwi bakaswa kuJelusalemu kuya kuAntyoki.

²⁸ Lyalo umwi mulikoto lyabo wiitwa ayi Agabasi, wakeemikana akulaluka kwiinda munkusu sha Mushimu Usalashi ayi kulaakuba nsala inene mucishi coonse. (Ici cakacitika Kulodyasi ndyaakalinga Sisa muleli munene wa kuLoma.)

²⁹ Ono bashomi bakayeeya kwaamba ayi womwi awomwi atume lucafwo kubashominyinaabo bakalinga kwikala kuJudeya kweelana ambwaakalinga kukonsha.

³⁰ Ndibakamana kubunganya shipo shabo, bakapa Banabasi aSaulo ayi batole kubamatanjilili ba mucoonde ca kuJelusalemu.