Milimo ya Batumwi 10 - Baibo Busansulushi Bwa Libuku Ili

Pita mbwaakafwakashisha Konelyasi

¹ KuSisaliya kwakalinga muntu umwi wiitwa ayi Konelyasi. Wakalinga munene wa bashilumamba mwaanda ba baLoma ba mulikoto lyakalinga kwiitwa ayi, “Likoto lya kuItali.”

² Musankwa uyu alimwi abamuŋanda yakwe boonse bakalinga kulyaaba kuli Lesa akumulambila camoyo woonse. Alimwi wakalinga kucafwa bumbi baJuda bakandu akupaila kuli Lesa ciindi coonse.

³ Bumwi bushiku ciindi ca 3 koloko malumwi, wakabona munjelo wakwe Lesa anga muciloto keesa kuli nguwe akwiita liina lyakwe ayi, “Konelyasi!”

⁴ Konelyasi wakalangilishisha munjelo uyo akwiipusha ayi, “Mbuyani nkambo?” Munjelo wakamukumbula ayi, “Lesa wakondwa amipailo yako alimwi alucafwo lwako kubantu bapenshi, aboobo ulilibambite kukukumbula.

⁵ Ono tuma basankwa bamwi kuJopa ayi bakeete musankwa umwi wiitwa ayi Simoni Pita.

⁶ Bulya ulekala kuŋanda yakwe Simoni shikunyuka mpaya, uyo uyakite mweela lweenge.”

⁷ Munjelo uyo ndyaakaswaawo, Konelyasi wakeeta basebenshi bakwe bobilo alimwi ashilumamba womwi. Shilumamba uyu wakalinga womwi wa mulikoto lya beshikumucafwa mwiine alimwi wakalinga muntu wakalinga kulambila Lesa lyoonse.

⁸ Konelyasi wakabalwiita shoonse shakamulwiita munjelo, akubatuma kuJopa.

⁹ Ono bushiku bwakaboolaawo malumwi, basankwa abo ndibakashika pafwaafwi andabala ya Jopa, Pita wakatanta paciluli ca ŋanda kwaamba ayi apaile.

¹⁰ Paciindi ico wakanyumfwa nsala akuyanda cakulya. Bantu kabacibamba cakulya, Pita wakabona cintu anga muciloto.

¹¹ Wakabona liculu lyacaluka, acintu cimwi kacisa panshi ico cakalinga kuboneka anga ncisani cinene caangitwe mumakonko oonse one.

¹² Muli ncico mwakalinga banyama ba mishobo yoonse, ntaale ashintu shimwi sha mushobo uyo alimwi abayuni ba muluundu.

¹³ Lyalo wakanyumfwa liswi lya kwaamba ayi, “Buka Pita, ucaye ulye!”

¹⁴ Sombi Pita wakakumbula ayi, “Tau, Nkambo! Ceebo nebo nshina kulyawo kale cintu citasalalite kweelana aMilawo nabi cibiibi.”

¹⁵ Liswi lilya lyakanyumfwika alimwi ayi, “Utanokwaamba ayi taceelete kulikwa cintu coonse Lesa ncaamba ayi cilalikwa.”

¹⁶ Ici cakacitika mankanda otatwe, kuswawaawo cintu ico cakabooshekwa kwiculu.

¹⁷ Pita ndyaakalinga kuyeeya mbocakalinga kusansulula ico cakamubonekela, basankwa mbwaakatuma Konelyasi bakalinga kwisa ciipusha pakalinga ŋanda yakwe Simoni. Mpeeke bakashika, beemikana pamulyango.

¹⁸ Bakeeta akwiipusha ayi, “Sa kuno kuliwo mweensu wiitwa ayi Simoni Pita?”

¹⁹ Pita ndyaakalinga kuciyeeyabo cikani cilya, Mushimu Usalashi wakamwaambila ayi, “Nyumfwa, pali bantu botatwe batookuyandoola.

²⁰ Anu nyamuka useluke, utacelwi kuyaabo mukwiinga ndime ndabatuma kokuno.”

²¹ Aboobo Pita wakaya kubasankwa abo akwaamba ayi, “Ndime wooyo ngomutolangoola. Mucafweeko?”

²² Basankwa aba bakakumbula ayi, “NguKonelyasi, munene wa bashilumamba bali mwaanda, watutuma. Ngumuntu ululeme, ulambila Lesa alimwi ulalemekwa bumbi abaJuda. Munjelo wakwe Lesa ngowakalwiita Konelyasi ayi akwiite kuŋanda yakwe mukunyumfwa ceeco nceshi ukamulwiite.”

²³ Mpomunyaawo Pita wakenjisha basankwa abo muŋanda, wababamba bushiku ubo. Ndibwakaca, Pita wakayaabo. Basankwa bamwi ba kuJopa bakalinga kushoma muli Jesu abalo bakayaakwe.

²⁴ Bushiku bwakaboolaawo wakashika kuSisaliya, uko Konelyasi abamakwabo alimwi ababye mbwaakeeta, nkobakalinga kumulindilila.

²⁵ Cilya Pita ncaakaamba ayi enjile, Konelyasi wakaya mukumwaansha akufukama kunembo lyakwe.

²⁶ Sombi Pita wakamukasha kufukama. Wakamwaambila ayi, “Nyamuka, anebo ndimuntu bweenka mbuli ndiwe.”

²⁷ Ono kaaya bwaamba aKonelyasi wakenjila muŋanda umo mwaakacana bantu baanji kababungene.

²⁸ Lyalo Pita wakabaambila ayi, “Mwebo mulishi kwaamba ayi mulawo wa baJuda toosuminishi muJuda kufwakashisha nabi kubandikila pantu pomwi abaswamashi bakunsengwe. Sombi Lesa wanshibisha ayi nsheelete kubanda muntu nabi womwi ayi taasalalite nabi ayi taabete kabotu.

²⁹ Nceceeco ncendeshitabo kufwambaana ndimwanjita. Ono amundwiite ncemwanjitila.”

³⁰ Konelyasi wakakumbula ayi, “Inabwa paciindi ceenka cino ca 3 koloko malumwi, ndakalinga muŋanda yangu kaampaila. Mpomunyaawo ndakabona musankwa wakalinga kufwete shakufwala shibekabeka kaaimfwi kunembo lyangu.

³¹ Wakaamba ayi, ‘Konelyasi, Lesa wanyumfwa mipailo yako alimwi akuyeeya lucafwo lwako kubantu bapenshi.

³² Ono tuma bantu kuJopa mukwiita musankwa umwi wiitwa ayi Simoni Pita. Bulya ulekala kuŋanda yakwe Simoni shikunyuka mpaya, uyo uyakite mweela lweenge.’

³³ Mpomunyaawo ndakatuma bantu kuli ndiwe alimwi wacita kabotu kwisa. Ono soonse bulya tuli pameenso akwe Lesa kwaamba ayi utulwiite makani oonse ayo ngaakubambila Mwaami Lesa.”

Maswi akaamba Pita

³⁴ Mpomunyaawo Pita wakatalika kubaambila ayi, “Ono ndeshiiba calushinisho ayi Lesa taasalululi,

³⁵ sombi ulatambula muntu uli woonse uyo umulambila akucita shiluleme, cakutalisukama amushobo wa muntu uyo.

³⁶ Mwebo mulishi makani ayo Lesa ngaakatuma kubene Isilaeli, akushimikila Makani Abotu aluumuno muli Jesu Klistu, Mwaami wa bantu boonse.

³⁷ Alimwi mulishi shakacitika mucishi coonse ca Judeya, kutalikila kuGalili kuswa paciindi ico Joni ndyaakalinga kushimikila shakubombekwa.

³⁸ Mulishi makani akwe Jesu wa kuNasaleti, mbuli Lesa mbwaakamusala akumupa Mushimu Usalashi ankusu. Mukwiinga Lesa wakalinga anguwe, wakeenda koonse koonse kaaya bucita shibotu kubantu akushilika baabo boonse bakalinga munkusu shakwe Satana.

³⁹ Swebo tuli bakamboni pashintu shoonse nshaakacita muJelusalemu alimwi amucishi coonse ca baJuda. Sombi bakamucaya kwiinda mukumupopa pamucilingano.

⁴⁰ Nakubi boobo Lesa wakamubusha kuswa kubafu pabushiku bwatatu akulengesha ayi aboneke kubantu kaali muumi.

⁴¹ Taakwe kuboneka kubantu boonse, sombi kuli ndiswe sobakamboni Lesa mbwaakalinga kusalite kale. Swebo twakalya alimwi akunwaakwe paciindi Lesa ndyaakamubusha kuswa kubafu.

⁴² Jesu wakatupa amulasho wakushimikila Makani Abotu kubantu akubalwiita ayi lakwe wakasalwa aLesa ayi abe moomboloshi wa bantu boomi abafu.

⁴³ Abalo balaluki bakulukulu boonse bakaamba pali nguwe ayi uyo woonse ushoma muli nguwe, Lesa ulaakumulekelela shibiibi shoonse kwiinda munkusu sha liina lyakwe.”

Baswamashi bakunsengwe mbobakatambula Mushimu Usalashi

⁴⁴ Ono Pita ndyaakalinga kucaamba, Mushimu Usalashi wakesa pabaabo boonse bakalinga kunyumfwa makani ngaakalinga kwaamba.

⁴⁵ Mpeeke baJuda bashomi, abo bakaswa kuJopa aPita, bakakankamana ndibakabona ayi Lesa wapa cipo ca Mushimu Usalashi akubaswamashi bakunsengwe boonse

⁴⁶ mukwiinga bakabanyumfwa kabaamba mishobo yeensu akulumbaisha Lesa pashintu shinene nshaacita. Lyalo Pita wakaamba ayi,

⁴⁷ “Aba bantu batambula Mushimu Usalashi bweenka mbotwakatambula. Ono sa kuli muntu weenga wabakasha kubombekwa amaanshi?”

⁴⁸ Lyalo wakabaambila ayi babombekwe muliina lyakwe Jesu Klistu. Kuswawaawo bakasenga Pita ayi ekalaabo inshiku shiniini.