Milimo ya Batumwi 1 - Baibo Busansulushi Bwa Libuku Ili

¹ Nomusunikwi baTeyofilasi, Mulibuku lyangu lyakutaanguna ndakalemba pamakani a shintu shoonse shakacita Jesu akwiisha, kuswa lyeelyo ndyaakatalika ncito

² kushikila bushiku ndyaakatolwa kwiculu. Sombi kaatana kutolwa kwiculu, kwiinda munkusu sha Mushimu Usalashi, Jesu wakalwiita batumwi abo mbwaakasala nshebakalinga kweelete kucita.

³ Ndyaakafwa akubuka kuswa kubafu, Jesu wakalitondesha kuli mbabo akubeshibisha munshila shipusenepusene ayi ngumuumi. Wakaboneka kuli mbabo inshiku makumi one akwaambaabo shaBweene bwakwe Lesa.

⁴ Ndibakalinga kubungene, wakabalwiita ayi, “Mutaswi muJelusalemu, sombi mulindilile cipo ico ncebakamushomesha baTa, ico ncendakamulwiitaawo anebo.

⁵ Mukwiinga Joni wakalinga kubombeka amaanshi, sombi kapatana kwiinda nshiku shiinji mwebo mulaakubombekwa aMushimu Usalashi.”

Jesu mbwaakatolwa kwiculu

⁶ Ono batumwi ndibakalinga kubungene pantu pomwi aJesu, bakamwiipusha ayi, “Nkambo, sa paciindi cino mutoobooshesha bene Isilaeli bwaami?”

⁷ Jesu wakabaambila ayi, “Teshi ncito yanu yakwishiba ciindi ndyeshi shikacitike isho shili munkusu sha baTa.

⁸ Sombi mulaakutambula nkusu na Mushimu Usalashi ukese pali ndimwe. Lyalo mulaakuba bakamboni bangu muJelusalemu, muJudeya moonse alimwi amuSamaliya kushikila amucishi coonse ca panshi.”

⁹ Ndyaakamana kwaamba boobo, wakatolwa kwiculu boonse kabamubwene. Mpeeke likumbi lyakamufwekelesha bacileka akumubona.

¹⁰ Ono ndibakalinga kucilangilishisha kwiculu nkwaakalinga kuya, basankwa bobilo bakalinga kufwete shituba, bakesa mukwiimikana palubasu lwabo.

¹¹ Basankwa abo bakabaambila ayi, “Mwebo nobene Galili, ceebonshi mweemikana paapo akulanga kwiculu? Uyu Jesu watolwa kwiculu kuswa kuli ndimwe, ulaakuboola alimwi bweenka mbuli mbomwamubona kaaya.”

Wakapyana musena wakwe Judasi

¹² Lyalo batumwi bakaboolela kuJelusalemu kuswa kuKalundu ka Olifi, apo pakalingabo mushinso ufwaafwi.

¹³ Ndibakashika, bakenjila muŋanda mucipinda ca peculu mobakalinga kwikala. Batumwi aba bakalinga Pita, Joni, Jemusi aAndulu, Filipo aTomasi, Batolomeyo aMateyo, Jemusi mwanaakwe Alufeyasi, Simoni shikulwanina lwaanguluko alimwi aJudasi mwanaakwe Jemusi.

¹⁴ Aba bantu bakalinga kubungana akupailila pantu pomwi lyoonse, kubikaawo abanakashi bamwi, Maliya banyina abamakwabo Jesu.

¹⁵ Ndipakeenda nshiku shiniini, kwakaba libungano lya baabo boonse bakalinga kushoma muli Jesu abo bakalinga kushika mpashi mwaanda amakumi obilo. Lyalo Pita wakanyamuka,

¹⁶ waamba ayi, “Nobamakwesu, Malembo akwe Lesa akalinga kweelete kucitika ayo akaamba Defedi ndyaakatanjililwa aMushimu Usalashi. Lakwe wakaamba shakwe Judasi, uyo wakatanjilila baabo bakacata Jesu.

¹⁷ Judasi uyo wakalinga womwi wa mulikoto lyesu, alakwe wakalinga wasalwa ayi asebensele pantu pomwi aswebo.”

¹⁸ (Ono mumaali alya ngaakapekwa pacibi cilya ncaakacita, Judasi wakoolamo muunda umo mwaakawita panshi, wafwa akupasuka lifumo mala oonse aswita pansengwe.

¹⁹ Bantu boonse bakalinga kwikala muJelusalemu bakaanyumfwa makani aya, aboobo muunda uyo mumulaka wabo bakootumba ayi Akeludama, nkokwaamba ayi, “Muunda wa bulowa.”)

²⁰ “Ceebo mulibuku lya Kulumbaisha mulilembetwe ayi, ‘Ŋanda yakwe ibe litongo, Kutabi muntu nabi womwi ukalaamo!’ Alimwi mulilembetwe ayi, ‘Muntu umwi apyane pamusena wakwe wa butumwi!’

²¹ “Paceebo ceeco, tulyeelete kusala muntu umwi pabaabo mbotwakalingaabo, paciindi ico Mwaami Jesu ndyaakalinga aswebo,

²² kutalikila kuciindi Joni ndyaakalinga kushimikila shakubombekwa, kushikila pabushiku ubo Jesu ndyaakakushikwa pali ndiswe akutolwa kwiculu. Uyo abe kamboni pantu pomwi aswebo akushimikila ayi Jesu wakabuka kuswa kubafu.”

²³ Aboobo bakabanda basankwa bobilo, Josefu aMatiyasi. Josefu uyo wakalinga kwiitwa ayi Basabasi (limwi liina wakalinga nguJusitasi).

²⁴ Kuswawaawo bakapaila ayi, “Nkambo, mwebo nomwishi myoyo ya bantu boonse. Amutuboneshe wooyo ngomwasala pabantu bobilo aba

²⁵ kwaamba ayi abwese musena uyu wa butumwi, uyo wakashiya Judasi ndyaakaya kumusena umweelete.”

²⁶ Ndibakamana kupaila, bakooma cisolo, kucana cawita Matiyasi. Mpeeke wakaba mulikoto lya batumwi bali likumi awomwi.