Mika 7 - Baibo Busansulushi Bwa Libuku Ili

Shibiibi sha bene Isilaeli

¹ Mbondapenga nebo nemucaangu! Ndababo anga ngumuntu uya cibweselela shisepo shakacaala mumuunda. Sombi taaku cisankata ca minyansa nabi comwi cakacaalaamo cakwaamba ayi inga ndalya, nabibo nkuyu isho nsheensuni abuumbi.

² Bantu baluleme bamana mucishi cesu, taaku nabi womwi ululeme uciliimo. Uli woonse utoofwima kucaya muntunyina. Ncakwiila womwi awomwi ulisuni kucatisha mubye mubukonde.

³ Boonse mbantu bacibwene kucita bubi. Alakwe muleli ulisuni kupekwa shipo, shikoombolosha ulisuni makulo, alakwe shinkusu ulaambabo nshaasuni cakutasenga. Bantu abo boonse balacatana pantu pomwi mukupinga kucita bubi.

⁴ Muntu waambwa ayi uli kabotu kwiinda bamwi ulibo anga nshisonsoonya kubica. Alakwe uyo waamba ayi ululeme kwiinda boonse ulibo anga ncisamu ca myuumfwa kubica. Bushiku bwashikila Lesa ndyeshi ape bantu mulandu bweenka mbwaakabacenjesha kwiinda mubeshikulindilila bakwe balaluki. Ubu mbobushiku bwabo bwa cimfulunganya.

⁵ Utashomi shikamukobonyoko. Utaciinki manungo mumubyo nabi kushoma bunene mukaako. Kocenjela amakani ngootokwaamba

⁶ ceebo ciindi cino mwaana musankwa utoonyansha baishi. Mwaana mwanakashi utoobukila banyina, alakwe mulokashi utoobukila bapongoshi bakwe banakashi. Ono nkokwaamba ayi balwani ba muntu mbaabo beenka mbwaakalaabo paŋanda.

⁷ Sombi nebo ndanoolangila lucafwo kuswa kuMwaami Lesa. Ndanoolindila Lesa Mupulushi wangu. Ndushinisho Lesa wangu ulaakunkutika.

Mwaami Lesa mbweshi akapulushe bene Isilaeli

⁸ Nobalwani besu, mutalisumpuli pali ndiswe. Nabi twawa, tulaakubuka. Nabi tube mumunshinshe, Mwaami Lesa ulaakuba mumuni wesu.

⁹ Ceebo cakwaamba ayi twakabishisha Mwaami Lesa, tulyeelete kunyumfwa bukali bwakwe paciindi cino. Sombi ulaakwisa mukutufuna akutucitila ciluleme mushintu nshetwakabishilwa. Lyalo ulaakutuboosha mumumuni. Ncakwiila lupulusho lwakwe tulaakulubona ameenso esu.

¹⁰ Balwani besu balaakushibona shoonse ishi akufwa nsoni, ee, balwani abo bakalinga kututonta ayi, “Ino uli kuli Mwaami Lesa, Lesa wanu?” Tulaakubona mbweshi bakakomwe. Balaakulyatoolwa bweenka bulyatoolwa matipa mumikwakwa.

¹¹ Nobene Jelusalemu, bushiku bwakuyakulula lubumbu lwa ndabala yanu inene bulaakwisa. Ncakwiila bushiku bwakukomenesha manyinsa a cishi canu bulaakwisa.

¹² Pabushiku ubo bene mishaanu balaakwisa kumbasu shoonse. Nkokwaamba ayi kuswa kuAsilya kwicwe, kuswa kucishi ca Ijipiti kumalenge, kuswa kucishi cili kufwaafwi aMulonga wa Yufuletisi, kuswa kweela lweenge kuya mukushika kulweenge lumwi, ee, akuswa kukalundu komwi kuya mukushika kukalundu kamwi.

¹³ Cishi ca panshi cilaakuba luyanga ceebo cakubisha kwa baabo bekalaamo.

Mwaami Lesa mbwaakafwita nkumbu bene Isilaeli

¹⁴ NoBaami baLesa amube beembeshi ba bantu banu, bantu abo mbomwakasala. Nabi balekala beenka muluundu, kuli cishi ca bulongo bubotu cibashingulukite. Amubaleeke banoolya anga nimbelele mumafulo abotu akuBashani alimwi akuGilyadi bweenka mbobakalinga kulya kalekale.

¹⁵ Mwaami Lesa waamba ayi, “Ndaakucita shaankamiko bweenka mbondakalinga kucita ndimwakaswa muIjipiti.

¹⁶ Bamumishobo iinji balaakubona shaankamiko isho akunyumfwa nsoni. Nkusu shabo shoonse shilaakumana. Balaakulicata pamilomo yabo akushinka matwi abo mukukankamana.

¹⁷ Balaakunoomyanguta bulongo anga ninsoka, ee, anga shilongolo shikalaba panshi. Balaakunoosa kabatutuma mushiyubilo shabo. Balaakusandukila kuli ndime neMwaami Lesa, Lesa wanu ceebo ca boowa alimwi balaakunooloonda ndimwe.”

¹⁸ Ino ngani lesa weelene amwebo, lesa uyo ushiminganya shibiibi akulekelela milandu ya bantu banu bakacaala? Mwebo tamukalali kwa lyoonse alyoonse, sombi mulasangalala mukutondesha lusuno lutamaani.

¹⁹ Mulaakutunyumfwila nkumbu alimwi. Mulaakulyata shibiibi shesu amyeendo yanu akuwaala shilubo shesu panshi peene palweenge.

²⁰ Ncakwiila mulaakushomeka kubamulunyungu lwakwe Jakobo. Mulaakutondesha lusuno lwanu lutamaani kubamulunyungu lwakwe Abulaamu. Ncakwiila mulaakucita bweenka mbomwakashomesha cakulumbila kubamashali besu bakulukulu kalekale.