Mika 6 - Baibo Busansulushi Bwa Libuku Ili

Mulandu Mwaami Lesa ngwaakapa bene Isilaeli

¹ Amukutike mbwaatokwaamba Mwaami Lesa. Waamba ayi, “Amwiimikane, mwaambe mulandu wanu kunembo lya tulundu. Tulundu atunyumfwe nshemutokwaamba.”

² Amunyumfwe mwebo notulundu mulandu Mwaami Lesa ngwaapa. Amunyumfwe mwebo nolwiimbi lwa cishi ca panshi, Mwaami Lesa wapa bantu bakwe mulandu. Ncakwiila washinina bantu bakwe bene Isilaeli.

³ Mwaami Lesa waamba ayi, “Nobantu bangu ino ndamucitanshi? Anu ndamupensha munshilanshi? Amunkumbule!

⁴ Ndakamukusha kuswa kuIjipiti, ee, ndakamulubula kuswa kucishi ca busha. Ndakamutumina Mose, Aloni aMilyamu kwaamba ayi bamutanjilile.

⁵ Nobantu bangu, amwiibaluke Balaki mwaami wa bene Moabu ncaakapinga kucita kuli ndimwe. Amwiibaluke Balaamu mwanaakwe Beyo mbwaakakumbula. Amwiibaluke cakacitika mbomwakeenda kuswa kuShitimu kuya kuGilugala kwaamba ayi mwishibe milimo yangu ya bululami yakumupulusha.”

Mwaami Lesa ncaasuni

⁶ Ino nebo nciinshi nceshi ntole kuMwaami Lesa, Lesa wakwiculu pakuya mukufukama akulambila kunembo lyakwe? Sa ntole milambu yakutenta ya boombe bacite mwaaka womwi?

⁷ Sa Mwaami Lesa inga wakondwa na ndamuletela cuulu ca mbelele shisankwa? Sa inga wakondwa na ndamuletela milonga iteeli ya mafuta a olifi? Sa mbenge mwanaangu musankwa wakwiiya ayi ndekelelwe shibiibi shangu? Ee, kubenga mwaana wakulishalila ceebo ca milandu yangu?

⁸ Sobwe, Mwaami Lesa wakatulwiita cibotu. Ncaasunibo ayi tucite nceeci: Koombolosha cakutanyengelela, kutondesha lusuno lutamaani akweenda cakulibombya mubushicibusa anguwe.

⁹ Kuloonda Mwaami Lesa mbusongo. Utokoolobesha mundabala inene ya Jelusalemu ayi, “Amukutike mwebo nobantu nomwikala mundabala inene ino.

¹⁰ Mumaanda a bantu babiibi muli buboni ubo mbobakacana mukunyengelela. Balasebensesha shipimo shabubeshi, isho nsheempatite.

¹¹ Anu inga ndalekelela buyani muntu utasebenseshi shipimo sheelete ee, usebensesha mabwe akupimisha abubeshi?

¹² Bantu bako babile balisuni nkondo alimwi bantu bako bamwi boonse mbabeshi. Milaka yabo ilaamba shabubeshi.

¹³ Aboobo ndatalika kumunyonyoola, ee, kumulobya ceebo ca shibiibi shanu.

¹⁴ Mulaakulya, sombi teshi mukakute. Ncakwiila mafumo anu alaakunoolibo bwaashi. Mulaakubika kubutala, sombi teshi shikashikeeko mukwiinga shoonse ndaakushinyonyoola kunkondo.

¹⁵ Mulaakushanga, sombi teshi mukatebule, mulaakutyana maolifi, sombi mafuta a ngawo teshi mukaasebenseshe nobeene. Mulaakutyana minyansa, sombi teshi mukanweewo waini wa njiyo.

¹⁶ Kulaakuba boobo mukwiinga mwakakonkela milawo ibiibi yakwe Omuli akukonkela micito yoonse ya muŋanda yakwe Aabu mwanaakwe. Ncakwiila mwakalinga kukonkela tushiyashiya twabo. Paceebo ceeco ndaakumulengesha ayi mukanyonyooke. Bantu boonse balaakumusebaanya ee, kuli koonse bantu balaakunoomushibuluka.”