Mika 3 - Baibo Busansulushi Bwa Libuku Ili

Mika mbwaakakalalila bamatanjilili bene Isilaeli

¹ Nebo neMika ndakaamba ayi, “Amunyumfwe mwebo nobamatanjilili ba bamulunyungu lwakwe Jakobo, ee, mwebo nobaleli ba bene Isilaeli. Mwebo mulyeelete kubika maano kukoombolosha cakutanyengelela,

² sombi mulipatite shibotu akusuna bubi. Mulafunda bantu bangu kabacili boomi akukusha minyemfu kushifuwa shabo.

³ Mulalya bantu bangu, kufunda shipaya shabo, kupwayoola shifuwa shabo akutimboola anga ninyama yakuteleka mumupika.

⁴ Ciindi cilaakushika ndyeshi mukalilile Mwaami Lesa, sombi lakwe ulaakukaka kumucafwa. Teshi akakutike kumipailo yanu ceebo ca bubi mbomwakacita.”

⁵ Mwaami Lesa waamba ayi, “Mwebo nobalaluki nomulubya bantu bangu, na umwi wamupa cakulya mulaamba shaluumuno. Na taamupi, mulalaluka shankondo.

⁶ Paceebo ceeco mashiku alaakwisa alimwi teshi muboneewo cili anga nciloto. Ncakwiila munshinshe ulaakwisa alimwi teshi mukasondeewo napaceyi. Lisuba lilaakwipila kubalaluki abo, ndushinisho kulaakuboolabo mbi kuli mbabo.

⁷ Balaluki balaakufwa nsoni abalo beshikusonda balaakulenshekwa nsoni. Balaakulosha shiwa panshi mukwiinga Lesa taatoobakumbula.”

⁸ Ono nebo Mwaami Lesa wampa nkusu shiinji pantu pomwi aMushimu wakwe. Wampa amaano akoombolosha cakutanyengelela akunengesha kubula boowa kwaamba ayi nkalwiite bamulunyungu lwakwe Jakobo shilubo shabo, ee, kulwiita bene Isilaeli shibiibi shabo.

⁹ Amukutike mwebo nobamatanjilili ba bamulunyungu lwakwe Jakobo, ee, mwebo nobaleli ba bene Isilaeli. Amukutike mwebo nomupatite koombolosha cakutanyengelela akusandula shiluleme kuba shitaluleme.

¹⁰ Amukutike mwebo nomuyaka Siyoni kwiinda mukutila bulowa akuyaka ndabala ya Jelusalemu mukucita bubi.

¹¹ Bamatanjilili baloombolosha na bapekwa makulo. Bapailishi baleeishabo kwaamba ayi balipilwe, abalo balaluki balasansulabo nshebayubulwitwa na kwaba kupekwa maali. Nakubi boobo balicinkite manungo muMwaami Lesa akwaamba ayi, “Mwaami Lesa uli pakati kesu. Aboobo mapensho taakoonshi kutushikila.”

¹² Paceebo ceeco, ceebo ca ndimwe Siyoni ulaakushabwa anga ngumuunda. Jelusalemu ulaakuba matongo. Kalundu ka Ŋanda yakwe Lesa kalaakuba musaansa.