Mika 2 - Baibo Busansulushi Bwa Libuku Ili

Meelelesho abaabo balyatilila bakandu

¹ Mapensho kuli baabo beshikuyeeya shibiibi, abaabo bapinga kucita shibiibi nabi kabalete! Na bwaca macuunsa balacita shibiibi nshebayeeya mukwiinga balakonsha kushicita.

² Ncakwiila na balisuni myuunda baleebwesa, na balisuni maanda balaabwesa. Balabwesa ŋanda ya muntu mukumwiinda kumaano akubwesa buboni bwakwe mbwaakapyana munshila njemunya.

³ Paceebo ceeco Mwaami Lesa waamba ayi, “Ntooyeeya kumuletela mapensho mwebo nobantu alimwi teshi mukakonshe kulipulusha. Teshi mukanokweendawo cakulisumpula ceebo cilaakuba ciindi ca mapensho.

⁴ Pabushiku ubo bantu balaakumuseka. Balaakumupensha alwiimbo ulu lwabuumba lwakwaamba ayi, ‘Twanyonyoolwa cakumaninina. Mwaami Lesa watunyaya cishi ncaakatupa akucipa kubaabo bakatutola busha.’ ”

⁵ Mulikoto lya mwaami Lesa teshi mukabe wamulunyungu nabi womwi uyo weshi akoome cisolo kumubaanya cishi.

⁶ Bantu balaŋambila ayi, “Cileke kulaluka, ee, cileke kulaluka pamakani aya. Lesa teshi akatulekelele ayi tusebaane.

⁷ Sa utooyeeya ayi bamulunyungu lwakwe Jakobo balishingenwe? Sa Mushimu wa Mwaami Lesa ulikalalite? Sa ncakwiila inga wacita cintu ca mushobo uyo? Sa taambi cankumbu kubaabo bacite nshila shiluleme?”

⁸ Ono Mwaami Lesa waamba ayi, “Mwebo mulalwana bantu bangu anga mbalwani babo. Bashilumamba balapiluka kunkondo kabayeeya ayi kumishaabo taaku cakulisukama. Sombi mwebo mulababelamina ayi mwiipe shakufwala shabo sha peculu.

⁹ Mulatandaanya banakashi ba bantu bangu, ee, kubatandaanya kuswa mumaandaabo abotu. Mulaakukusha coolwe cangu pabana babo ayi bacibuule kwalyoonse alyoonse.

¹⁰ Amunyamuke, munooya mukwiinga uno teshi musena wanu wakookesheshaawo. Shibiibi shanu shalengesha musena uno kutaba usalalite. Ncakwiila ulaakunyonyoolwa cakumaninina.

¹¹ “Na mubeshi nabi shikucenjeeka wesa waamba ayi, ‘Ntoomulalukila kutambula waini abwalwa buunji,’ Uyu ulaakuba ngomulaluki bantu aba ngobasuni.

¹² “Nobamulunyungu lwakwe Jakobo ncakwiila ndaakumuyobolola noonse. Ndaakuyobolola bene Isilaeli bakacaala boonse. Ndaakubabunganya anga nimbelele mucimpati, ee, anga nditanga kumafulo a ndilyo. Musena uyo ulaakwisula bantu.”

¹³ Lesa ngweshi akabacalwite nshila akubatanjilila kuswa mubusha. Balaakupasula mwinjililo akuswaamo umo. Mwaami wabo ulaakutaanguna kupula. Ee, Mwaami Lesa ngweshi akabe kunembo lyabo.