Mateyo 9 - Baibo Busansulushi Bwa Libuku Ili

Jesu mbwaakashilika muntu uyuminite mubili

¹ Jesu wakenjila mubwaato akusubuka lweenge kushika kumushi kumishaabo.

² Mpeeke bantu bamwi bakatola musankwa wakalinga kuyuminite mubili kuli nguwe, kaalete pamacila. Jesu ndyaakabona lushomo lwabo, wakaambila wakalinga kuyuminite mubili ayi, “Kalika moyo ndaba, shibiibi shako shalekelelwa.”

³ Mpeeke bamwi bafundishi ba Milawo bakalyaamboosha beene ayi, “Uyu muntu utoocobola Lesa.”

⁴ Sombi Jesu wakeshiba ncebakalinga kuyeeya, lyalo wakaamba ayi, “Mutooyeeyelanshi shintu shibiibi mumyoyo yanu?

⁵ Ino ncili cuubu kwaamba ayi, ‘Shibiibi shako shalekelelwa,’ nabi kwaamba ayi, ‘Nyamuka weende?’

⁶ Sombi ntooyanda kwaamba ayi mwishibe ayi MwanaaMuntu ulicite bulemu ankusu shakulekelela shibiibi pacishi ca panshi.” Mpomunyaawo wakaambila uyuminite mubili ayi, “Nyamuka, bwesa macila ako uye kumishaanu.”

⁷ Mpomunyaawo wakanyamuka waya kumishaabo.

⁸ Ono bantu boonse ndibakabona cakacitika, bakakankamana abuumbi akutalika kulumba Lesa wakapa bulemu ankusu sha mushobo uyu.

Jesu mbwaakeeta Mateyo

⁹ Jesu ndyaakaswaako uko, wakabona musankwa umwi wiitwa ayi Mateyo kaashiite mukaanda ka musonko. Mpeeke Jesu wakamwaambila ayi, “Nkonkele!” Alakwe wakanyamuka, wamukonkela.

¹⁰ Jesu ndyaakalinga kulya muŋanda yakwe Mateyo, beshikusonkesha baanji alimwi abantu batakonkeli Milawo yakwe Mose, bakalya pantu pomwi aJesu abashikwiiya bakwe.

¹¹ Ono baFalisi ndibakabona boobo, bakeepusha bashikwiiya bakwe Jesu ayi, “Ino mufundishi wanu utoolitanshi abeshikusonkesha alimwi abantu batakonkeli Milawo yakwe Mose?”

¹² Sombi Jesu ndyaakanyumfwa mwiipusho wabo, wakakumbula ayi, “Teshi bantu bayumu balangoola mushiliki, sombi balwashi beenka.

¹³ Amuye mukeeye maswi akwe Lesa alya akwaamba ayi, ‘Ndisunishi nkumbu, kuteshi milambu.’ Nshikwe kwisa mukwiita baluleme, sombi bamucita shibi.”

Mwiipusho wa pakulikasha kulya

¹⁴ Kuswawaawo, bashikwiiya bakwe Joni Mubombeki bakesa kuli Jesu akumwiipusha ayi, “Ceebonshi swebo alimwi abaFalisi tulalikasha kulya, sombi bashikwiiya banu tabalikashiiwo?”

¹⁵ Jesu wakabakumbula ayi, “Sa babye shibwiinga inga balila shibwiinga kaacili abo? Sobwe! Sombi ciindi cilaakushika shibwiinga ndyeshi akakushikweewo pali mbabo. Paciindi ico ndyeshi bakalikashe kulya.

¹⁶ “Taaku muntu utunga cimami ca nsalu ipya pacakufwala cikulukulu. Ceebo cimami ico mukukokonyana, nsalu ikulukulu ilakwamuka. Aboobo cilyango cilakomenenaako.

¹⁷ Mbweeke ubo taaku muntu weenga wabika waini upya munkomwe sha shipaya shikulukulu. Mukwiinga nkomwe shilapasuka awalo waini ulatika ankomwe shilanyonyooka. Anu waini upya ulalongelwa munkomwe sha shipaya shipya, aboobo shoonse shobilo shilasungwa kabotu.”

Jesu mbwaakashilika mwaana mwanakashi amwanakashi wakacata cisani cakwe

¹⁸ Jesu ndyaakalinga kucaamba, kwakesa mutanjilili umwi wa coonde ca baJuda, wafukama kunembo lyakwe akwaamba ayi, “Mwanaangu mwanakashi wafwabo onoono. Ntoomusenga kwaamba ayi mwise mubike maansaanu pali nguwe, lyalo utooba abuumi alimwi.”

¹⁹ Lyalo Jesu wakanyamuka, abashikwiiya bakwe bakamukonkela.

²⁰ Ono umwi mwanakashi wakalinga kuciswa bulwashi bwa mukunko myaaka likumi ayobilo, wakesa kwisule lyakwe Jesu akucatabo kweela cisani cakwe.

²¹ Mumoyo wakalinga kuyeeya ayi, “Na ncatebo cisani cakwe, ncakwiila ntooba kabotu.”

²² Mpomunyaawo Jesu wakacebuka, ndyaakamubona wakamwaambila ayi, “Kalika moyo nankashi, lushomo lwako lwakupulusha kubulwashi.” Paciindi ceenka ico, mwanakashi uyo wakaba kabotu.

²³ Ono Jesu ndyaakashika kuŋanda ya mutanjilili, wakabona bantu beshikulisha mapeenga abantu baanji kabalila.

²⁴ Peenka wakabaambila ayi, “Amuswe ceebo mulindu uyu taafwite, uliletebo.” Sombi boonse bakamuweluluka.

²⁵ Ingayi bantu baswebo muŋanda, Jesu wakenjila akucata mulindu uyo palyaansa, mpeeke wakabuka.

²⁶ Impuwo iyi yakanyumfwika mucishi coonse ico.

Jesu mbwaakashilika boofu bobilo

²⁷ Jesu ndyaakaswaako uko, basankwa boofu bobilo bakamukonkela, kaboolobesha ayi, “NoBana babo baDefedi, amutunyumfwileko nkumbu!”

²⁸ Jesu ndyaakenjila muŋanda abalo boofu bakashika kuli nguwe. Lyalo wakabeepusha ayi, “Sa mutooshoma ayi ici inga ndacicita?” Abalo bakakumbula ayi, “Ee Nkambo.”

²⁹ Mpeeke Jesu wakakumya meenso abo akubaambila ayi, “Acicitike kuli ndimwe kweelana alushomo lwanu.”

³⁰ Mpomunyaawo bakatalika kubona. Lyalo Jesu wakabakonkomesha ayi, “Muteshibishi muntu nabi womwi cikani ici.”

³¹ Sombi balo bakaya cilwiita bantu makani akacitika mucishi coonse ico.

Jesu mbwaakashilika cibuulu

³² Ndibakalinga kuswaawo basankwa bobilo balya, bantu bamwi bakaleta muntu wakalinga kucite shikaswa wakalinga kumukasha kwaamba.

³³ Jesu ndyaakamukushamobo shikaswa, musankwa cibuulu uyo wakatalika kwaamba. Mpeeke bantu boonse bakakankamana akutalika kwaamba ayi, “Tacina kucitikawo kale ca mushobo wooyu muno muIsilaeli.”

³⁴ Sombi baFalisi bakaamba ayi, “Ngumwaami wa bashikaswa umupa nkusu shakubakusha.”

Jesu mbwaakanyumfwila nkumbu bantu

³⁵ Jesu wakaya ceenda mumandabala oonse amumishi. Wakalinga kuya ciisha mushoonde sha baJuda akushimikila Makani Abotu a Bweene bwakwe Lesa alimwi akushilika malwashi apusenepusene.

³⁶ Ono ndyaakabona bantu baanji baanji, wakabanyumfwila nkumbu mukwiinga bakalinga kulemete akupenga anga nimbelele shitacite mweembeshi.

³⁷ Mpeeke wakaambila bashikwiiya bakwe ayi, “Shakutebula shafula, sombi beshikutebula baceya.

³⁸ Aboobo amusenge Mwine muunda kwaamba ayi atume abamwi basebenshi beshikutebula.”