Mateyo 8 - Baibo Busansulushi Bwa Libuku Ili

Jesu mbwaakashilika shimanata

¹ Jesu ndyaakaseluka kuswa pakalundu, bantu baanji baanji bakamukonkela.

² Lyalo muntu mulwashi manata wakesa wafukama kuli Jesu akwaamba ayi, “Nkambo, na kamusuni inga mwanshilika.”

³ Mpomunyaawo Jesu wakafungulula lyaansa lyakwe akucata musankwa uyo kaamba ayi, “Ee ndisuni, ba kabotu!” Lyalo manata akamana.

⁴ Kuswawaawo Jesu wakamwaambila ayi, “Nyumfwa, utalwiiti muntu nabi womwi pacikani ici. Sombi ululamebo kuya kumupailishi, ukalitondeshe kuli nguwe ayi waba kabotu. Koya upe cipo kweelana ambwakaamba Mose kwaamba ayi bantu bashome ayi waba kabotu.”

Jesu mbwaakashilika musebenshi wa munene wa bashilumamba

⁵ Ono Jesu ndyaakashika muKapenaumu, mutanjilili wa bashilumamba mwaanda wakesa kuli nguwe akumusenga ayi,

⁶ “Nkambo, musebenshi wangu uliletebo kuŋanda ngumulwashi abuumbi alimwi taacite ankusu shakweenda.”

⁷ Lyalo Jesu wakamwaambila ayi, “Ntoosa mukumushilika.”

⁸ Sombi mutanjilili wa bashilumamba wakakumbula ayi, “Nkambo, nsheelete kwaamba ayi inga mwenjila muŋanda yangu. Sombi mwaambebo liswi, musebenshi wangu utooba kabotu.

⁹ Mukwiinga anebo ndimuntu ukonkela milasho ya banene ba pancito alimwi ndicite bashilumamba mboondwiita nsheensuni. Ndacita na ndaambila shilumamba ayi, ‘Koya,’ alakwe ulaya. Na ndaambila shilumamba umwi ayi, ‘Kosa,’ alakwe ulesa. Na ndaambila musebenshi wangu ayi, ‘Cita ici,’ alakwe ulacicita.”

¹⁰ Ono Jesu ndyaakanyumfwa boobo wakakankamana, lyalo wakaambila baabo boonse bakalinga kumukonkela ayi, “Ntoomulwiita calushinisho ayi nshina kubonawo kale lushomo lunene bobulya nabi muIsilaeli!

¹¹ Ntoomulwiita ayi bantu baanji balaakuswa kwicwe akumbo kwisa mukulya pantu pomwi aAbulaamu, Isaki alimwi aJakobo muBweene bwa kwiculu.

¹² Sombi abo boonse bakalinga kweelete kuba muBweene bwa kwiculu balaakuwaalwa pansengwe kumunshinshe uko nkweshi bakanoolila akulumanya meeno.”

¹³ Mpomunyaawo Jesu wakaambila mutanjilili wa bashilumamba uyo ayi, “Koya, acicitike bweenka mbuli mbowashoma.” Mpeeke musebenshi wakwe wakaba kabotu ciindi ceenka ico.

Jesu mbwaakashilika bantu baanji

¹⁴ Jesu ndyaakenjila muŋanda yakwe Pita, wakabona bapongoshi bakwe Pita banakashi kabalete mubulo, kabali balwashi cimpwita.

¹⁵ Mpeeke Jesu wakabacata palyaansa, lyalo cimpwita cakamana. Bakabuka akutalika kutabataba akumupa shakulya.

¹⁶ Ciindi camuntungulya, bantu bakaleta baanji bakalinga kucite bashikaswa. Lyalo Jesu wakabakusha amaswibo akushilika baabo boonse bakalinga balwashi.

¹⁷ Wakacita sheeshi kweelana ambwaakaamba mulaluki mukulukulu Isaya ayi, “Lakwe wakakusha shicisa shesu shoonse akushilika malwashi esu.”

Shakukonkela Jesu

¹⁸ Ono Jesu ndyaakabona bantu baanji bakalinga kumushingulukite, wakaambila bashikwiiya bakwe ayi basubukile kwitala lya lweenge.

¹⁹ Mpomunyaawo umwi mufundishi wa Milawo wakesa kuli Jesu akumwaambila ayi, “NoBafundishi, ndaakumukonkela kuli koonse nkweshi mukaye.”

²⁰ Sombi Jesu wakamukumbula ayi, “Bamwaaba balicite shilingo, alimwi abayuni balicite shiinswa, sombi MwanaaMuntu taacite ampaaona.”

²¹ Umwi shikwiiya wakaambila Jesu ayi, “Nkambo, tana mboole nje nkabike bata.”

²² Sombi Jesu wakamukumbula ayi, “Nkonkelebo, leka bafu bafukile bafunyinaabo.”

Jesu mbwaakoomusha chipuupu

²³ Lyalo Jesu wakenjila mubwaato, mpeeke abalo bashikwiiya bakwe bakayaakwe.

²⁴ Mpomunyaawo kwakaba cipuupu cinene pamaanshi cakwaamba ayi maaba akatalika kwinjila mubwaato. Sombi Jesu wakalinga kulete.

²⁵ Lyalo bashikwiiya bakwe bakamubusha akumwaambila ayi, “Amutupulushe Nkambo. Twafwa!”

²⁶ Jesu wakabaambila ayi, “Anu mutooloondanshi? Kuceya lushomo ndomucite mwebo nobantu!” Mpomunyaawo wakabuka akukalalila cipuupu amaaba ayi shuumune. Mpeeke kwakaboolabo tontolo.

²⁷ Lyalo bashikwiiya boonse bakakankamana akwaamba ayi, “Anu ngumuntu mushobonshi uyu, cakwaamba ayi cipuupu amaaba shoonse shilamunyumfwila?”

Jesu mbwaakashilika basankwa bobilo bakalinga kucite bashikaswa

²⁸ Ono Jesu ndyaakashika kwitala lya lweenge, mucishi ca Gadala, bantu bobilo bakalinga kucite bashikaswa bakamukumanya. Bantu aba bakalinga kuswa kushuumbwe alimwi bakalinga bakali cakwaamba ayi tekwakalinga muntu wakalinga kwiinda nshila iyo.

²⁹ Mpomunyaawo bakoolobesha ayi, “Ino twamucitanshi mwebo nobana bakwe Lesa? Sa mwesa mukutupensha ciindi kacitana kushikila?”

³⁰ Pakalinga litanga linene lya nkumba lyakalinga kulya pafwaafwi ambabo.

³¹ Ono bashikaswa balya bakakombelela Jesu ayi, “Na mutukuushe, mututandile mulitanga lya nkumba lilya.”

³² Jesu wakabaambila ayi, “Kamuya.” Mpeeke bakaswaamo akuya mukwinjila munkumba, lyalo litanga lyoonse lyakoondomokela kunkunamo lya kalundu akuya mulweenge molyakaya mukulobela.

³³ Kuswawaawo abo bakalinga kweembela nkumba isho, bakacica akuya kundabala mukulwiita bantu cakacitika, asheesho shoonse shakacitika kubasankwa bakalinga kucite bashikaswa.

³⁴ Mpeeke boonse bantu bakayoboloka kuswa kundabala mukukumana aJesu. Ndibakamubona, bakamukombelela ayi aswe mucishi cabo.