Mateyo 7 - Baibo Busansulushi Bwa Libuku Ili

Koombolosha bamwi

¹ “Mutoomboloshi bamwi, kwaamba ayi amwebo Lesa atakamoomboloshi.

² Mukwiinga ubo bweenka mbomoombolosha bamwi alakwe Lesa mbweshi akamoomboloshe, amilawo njemusebensesha pakoombolosha bamwi, alakwe Lesa njeshi akasebenseshe pali ndimwe.

³ Ino inga wabona buyani kapampaansha kali muliinso lya mubyo akushiya cisamu cili muliinso lyako?

⁴ Inga waambila buyani mukwanu ayi, ‘Tubone nkukusheko kapampaansha muliinso,’ na muliinso lyako omwiine kamuli cisamu?

⁵ Webo omuntu nowaamba nshootaciti, taanguna kusha cisamu cili muliinso lyako, ndyeshi ubone kabotu akukusha kapampaansha kali muliinso lya mubyo.

⁶ “Mutapi bakabwa shintu shisalalite mukwiinga inga bamupilukila bamuluma. Mutapi nkumba shintu shamakwebo ceebo inga shalyatooloobo myeendo.

Kusenga, kulangoola akukonkoonsha

⁷ “Amusenge mulaakupekwa, amulangoole mulaakucana alimwi mukonkoonshe mulaakucalwitwa.

⁸ Ceebo uyo woonse usenga ulapekwa, awooyo ulangoola ulacana alakwe ukonkoonsha ulacalwitwa.

⁹ Ngani weenga wapa libwe mwanaakwe na wasenga cakulya?

¹⁰ Nabi weenga wamupa nsoka na wasenga nswi?

¹¹ Ono na mwebo, nobantu nobashishibi kamwishi kupa bana banu shintu shibotu, ino lakwe Ishiwanu wa kwiculu inga waalilwa buyani kupa baabo bamusenga?

¹² “Nkokwaamba ayi mushintu shoonse amucitile bantu bamwi bweenka mbomusuni ayi bamucitile. Anu uku nkokwiisha kwa Milawo yakwe Mose alimwi akwiisha kwa balaluki bakulukulu.

Mulyango ushaankene

¹³ “Amwinjilile pamulyango ushaankene ceebo mulyango utola mukunyonyoolwa ngunene, ayalo nshila taishuupi. Paceebo ceeco abo bainda nshila iyi mbaanji.

¹⁴ Sombi mulyango utola kubuumi butamaani ulishaankene alimwi nshila iyaako ilishupite. Aboobo bantu baikonkela mbaniini.

Cisamu ashisepo sha ncico

¹⁵ “Amucenjele abalaluki babeshi. Balesa cakulibombya kuli ndimwe anga nimbelele, anu mukati mbaumpe.

¹⁶ Mulaakubeshibila kushisepo shabo. Sa inga bantu bayapa minyansa kuswa kucisamu ca myuumfwa nabi kuyapa nkuyu kuswa kukankoloŋonso?

¹⁷ Aboobo cisamu coonse cibotu cilacata shisepo shibotu, sombi cisamu cibiibi cilacata shisepo shibiibi.

¹⁸ Anu cisamu cibotu tacikoonshi kucata shisepo shibiibi, acalo cisamu cibiibi tacikoonshi kucata shisepo shibotu.

¹⁹ Cisamu cili coonse citacati shisepo shibotu cilatemwa akuwaalwa mumulilo.

²⁰ Aboobo, amwebo mulaakubeshibila kumicito yabo.

Nshimwishiiwo napaceyi

²¹ “Teshi kwaamba ayi boonse banjita ayi, ‘Nkambo, Nkambo’ balaakwinjila muBweene bwa kwiculu, sombibo wooyo ucita kuyanda kwa baTa bali kwiculu.

²² Pabushiku ubo bwakoombolosha, bantu baanji balaakuŋambila ayi, ‘Nkambo, Nkambo, sa tatukwe kushimikila akukusha bashikaswa, alimwi akucita shaankamiko muliina lyanu?’

²³ Sombi nebo ndaakubaambila patuba ayi, ‘Nshimwishiiwo napaceyi. Amusweewo apa mwebo nobamucita shibi!’

Shamaanda obilo

²⁴ “Aboobo uyo woonse unyumfwa maswi angu aya akwaacita, uli anga ngumuntu ucite maano wakayakila ŋanda yakwe palibwe.

²⁵ Ono mfula ndiyakaloka, milonga yakesula kwiindilila alimwi amuuwo wakapuupila kuŋanda iyo, sombi taikwe kuwa mukwiinga yakalinga kuyakitwe palibwe.

²⁶ “Sombi uyo woonse unyumfwa maswi angu aya akutaakonkela, uli anga ngumuntu muluya wakayakila ŋanda yakwe pamuseese.

²⁷ Ono mfula ndiyakaloka, milonga yakesula kwiindilila alimwi amuuwo wakapuupila kuŋanda iyo, lyalo yakawa. Ncakwiila kuwa kwa njiyo kwakayoosha.”

Kwiisha kwabulemu ankusu

²⁸ Ono Jesu ndyaakamanisha kwaamba maswi aya, bantu baanji balya bakakankamana abuumbi pakwiisha kwakwe

²⁹ ceebo wakeeisha ankusu, kuteelana abwakalinga kwiisha bafundishi ba Milawo.