Mateyo 6 - Baibo Busansulushi Bwa Libuku Ili

Kwiisha pamakani akupa

¹ “Amucenjele ayi mutaciti milimo yanu iluleme kubantu ayi bamuluumbe ceebo na mwacita boobo, teshi mukatambule cilambu kuswa kuli Ishiwanu uli kwiculu.

² “Paceebo ceeco, pakupa shintu kubantu bapengete, mutoolobeshi kubantu boonse mushoonde amunshila, mbuli bucita bantu baamba nshebataciti, ayi babaluumbe. Ntoomwaambila calushinisho ayi abo balo batambula kale cilambu cabo.

³ Sombi mwebo pakupa shankumbu, lyaansa lyanu lyacipiko liteshibi citoocita lyaansa lyalulyo,

⁴ kwaamba ayi shipo shanu shibe shabushishi. Lyalo Ishiwanu ubona shabushishi ulaakumulambula.

Kwiisha mbobapaila

⁵ “Ono pakupaila kuli Lesa, tamweelete kuba mbuli bantu baamba nshebataciti ceebo balo balisuni kwiimikana akupaila mushoonde shabo alimwi amupetukila nshila ayi bababoone. Ntoomwaambila calushinisho ayi abo balo batambula kale shilambu shabo.

⁶ Sombi mwebo pakupaila, amunjile muŋanda yanu akucala kumulyango, lyalo mupaile kuli Ishiwanu utaboneki. Ishiwanu ubona shabushishi ulaakumulambula.

⁷ “Ono pakupaila mutanoofusha maswi atacite ncito mbuli bucita bakunsengwe ceebo balo balayeeya ayi Lesa ndyeenga wabanyumfwa.

⁸ Mwebo mutabi mbuli mbabo ceebo Ishiwanu ulishi shoonse nshemutacite kamutana kumusenga.

⁹ Anu mbulya mbomweelete kupaila, ‘NoBeeshiwesu nomuli kwiculu, alilemekwe liina lyanu.

¹⁰ Abwise Bweene bwanu, kuyanda kwanu akucitwe panshi pano bweenka mbuli kwiculu.

¹¹ Amutupe sunu shakulya nshetubula.

¹² Amutulekelele shibiibi shesu, bweenka mbotulekelela batubishisha.

¹³ Mutatwinjishi mumasunko, sombi mutufuune kuswa kuMubiibi ulya. [Mukwiinga Bweene, nkusu abulemu nshanu muyayaya. Ameni.’]

¹⁴ “Ceebo na mwalekelela bamwi shibiibi shabo, alakwe Ishiwanu uli kwiculu ulaakumulekelela amwebo.

¹⁵ Sombi na mwebo tamulekeleli bantu shibiibi shabo, alakwe Ishiwanu teshi akamulekeleleewo shibiibi shanu.

Kwiisha shakulikasha kulya

¹⁶ “Ono ciindi ncemulikasha kulya, mutanokuungumana, bucita bantu baamba nshebataciti. Mukwiinga balo balalyuungumika pameenso ayi bantu boonse babone ayi batoolikasha kulya. Ntoomulwiita calushinisho ayi balo abo batambula kale shilambu shabo.

¹⁷ Sombi mwebo na mwalikasha kulya, amusambe kumeenso akunana mafuta kumutwi,

¹⁸ kwaamba ayi kulikasha kulya kwanu kutaboneki kubantu, sombibo Ishiwanu utaboneki ngoweelete kwishiba. Lyalo Ishiwanu uyo ubona shabushishi, ulaakumulambula.

Shabubile kwiculu

¹⁹ “Mutanoolibikila bubile pacishi ca panshi pano, apo tubambala andalabwa mposhinyonyoola alimwi abeepi mpobenjila akwiipa.

²⁰ Sombi amulibikile bubile bwanu kwiculu, uko tubambala nabi ndalabwa nkoshitanyonyooli abeepi nkobatakoonshi kwinjila.

²¹ Amucite boobo mukwiinga myoyo yanu ilaba kweenka uko kuli bubile bwanu.

Mumuni wa mubili

²² “Meenso ngomumuni wa mubili. Aboobo na meenso anu kaali kabotu, amubili woonse ulaakuba mumumuni.

²³ Sombi na meenso anu katabete kabotu, nkokwaamba ayi mubili woonse ulaba mumunshinshe. Ono na mumuni waba munshinshe, ingayi munshinshe uyo ulaakubabo mbi!

Lesa abubile

²⁴ “Taaku muntu weenga wasebensela baami bobilo, mukwiinga ulapata womwi akusuna umwi, nabi kunyumfwila womwi akusuula umwi. Nkokwaamba ayi tamukoonshi kusebensela Lesa abuboni.

²⁵ “Paceebo ceeco, ntoomwaambila ayi mutalisukami mubuumi bwanu, ayi na ndaakulyanshi nabi kunwa nabi ayi nkafwalenshi? Sa buumi tabuyandiki kwiinda cakulya, awalo mubili sa tauyandiki kwiinda shakufwala?

²⁶ Amubone bayuni, tabashangi, tabatebuli nabi kubika mumatala. Nakubi boobo Ishiwanu uli kwiculu ulabasanina. Sa mwebo tamuyandiki kwiinda bayuni?

²⁷ Ono ngani pali ndimwe weenga walinungilako buumi napaceyi kwiinda mukulisukama pashintu ishi?

²⁸ “Ino mulalisukamanshi pashakufwala? Amuyeeye maluba amuluundu mbwaakula. Taasebensi nabi kutunga shakufwala.

²⁹ Sombi ntoomulwiita ayi nabi mwaami Solomoni mububile bwakwe boonse, taakwe kubaawo ashakufwala shibotu shiboneka mbuli maluba aya.

³⁰ Ono na Lesa ulafwalika boobo bwiisu ubo bucita sunu mpobuli sombi ciilo bwapya, sa mwebo inga taamufwaliki kwiindaawo? Kuceya lushomo ndomucite mwebo nobantu!

³¹ “Anu mutanoolisukama ayi tulaakulyanshi, na tulaakunwanshi nabi tulaakufwalanshi?

³² Mukwiinga ishi nsheshintu bakunsengwe nshebayandoola, sombi Ishiwanu wa kwiculu ulishi kwaamba ayi shoonse ishi mulishisuni.

³³ Aboobo mwebo citaanshi muyandoole Bweene bwakwe Lesa akucita shiluleme, lyalo Lesa ulaakumupa shintu shoonse ishi.

³⁴ Paceebo ceeco, mutanoolisukama asha ciilo mukwiinga sha ciilo nsha ciilo. Anu bushiku boonse bulicite mapensho a mbubo.