Mateyo 5 - Baibo Busansulushi Bwa Libuku Ili

Jesu mbwaakashimikila pakalundu

¹ Ono Jesu ndyaakabona bantu baanji baanji, wakatanta pakalundu akwikala panshi. Bashikwiiya bakwe abalo bakaya peenka mpaakalinga.

Bantu bacite coolwe

² Lyalo wakatalika kubeeisha ayi,

³ “Balicite coolwe abo bakandu mumushimu mukwiinga Bweene bwa kwiculu mbwabo.

⁴ “Balicite coolwe abo balila, mukwiinga Lesa ulaakubasangalasha.

⁵ “Balicite coolwe abo balibombya, mukwiinga Lesa ulaakubapa cishi ncaakabashomesha.

⁶ “Balicite coolwe abo bacite nsala anyotwa ya bululami, mukwiinga Lesa ulaakubapa anshebabula shoonse.

⁷ “Balicite coolwe abo balekelela babyaabo, mukwiinga Lesa ulaakubalekelela abalo.

⁸ “Balicite coolwe abo basalalite mumyoyo, mukwiinga balaakubona Lesa.

⁹ “Balicite coolwe abo baleta lunyumfwano, mukwiinga balaakwiitwa ayi mbana bakwe Lesa.

¹⁰ “Balicite coolwe abo bapenshekwa ceebo balacita kuyanda kwakwe Lesa, mukwiinga Bweene bwa kwiculu mbwabo.

¹¹ “Mulicite coolwe na bantu kabamutukana, kabamupensha alimwi akumubekesha shikani shibiibi ceebo ca ndime.

¹² Amusangalale akukondwa mukwiinga cilambu canu ncinene kwiculu. Mbweeke ubo bantu mbobakapensha balaluki bakalingaako kale kale.

Jesu mbwaakaamba shamwiinyo amumuni

¹³ “Mwebo ndimwe mwiinyo wa cishi, sombi na mwiinyo wasambalala, inga mwacita buyani kwaamba ayi ube kabotu alimwi? Taucite ncito, nkuusowabo abantu kabalyatolaawo.

¹⁴ “Mwebo ndimwe mumuni wa cishi. Ndabala inene iyakitwe pakalundu taikoonshi kushisikwa.

¹⁵ Ncakwiila na bantu bamunika lilampi tabafwekiwo nongo, sombi balalibika patuba kwaamba ayi limunikile boonse bali muŋanda.

¹⁶ Mbweeke ubo amwebo amuboneshe mumuni wanu kubantu, kwaamba ayi babone milimo yanu ibotu, akupa bulemu kuli Ishiwanu wa kwiculu.

Kwiisha shaMilawo

¹⁷ “Mutayeeyi ayi ndakesa mukumanisha Milawo yakwe Mose nabi kwiisha kwa balaluki bakulukulu. Nshikwe kwisa mukushimanisha, sombi kucita kweelana ashilembetwe.

¹⁸ Ntoomulwiita calushinisho ayi kushikila liculu acishi shikamaane, taaku libala liniini lya Milawo lyeshi likapusanishikwe tibili shoonse shikacitike.

¹⁹ Paceebo ceeco, uyo woonse usotoka mulawo uniini nabi womwi, akwiisha bantu kunocita bweenka ubo, ulaakuba muniini muBweene bwakwe Lesa. Sombi uyo ukonkela Milawo akwiishako bamwi ulaakuba munene muBweene bwa kwiculu.

²⁰ Aboobo ntoomwaambila ayi sombibo na bululami bwanu buleenda boobo bwa bafundishi ba Milawo abaFalisi, teshi mukenjile muBweene bwa kwiculu.

Kwiisha shakukalala

²¹ “Mwakanyumfwaawo bakulukulu mbobakalwiitikwa ayi, ‘Utacayi, mukwiinga uyo woonse ucaya mubye ulyeelete koomboloshekwa.’

²² Sombi nebo ntoomulwiita ayi uyo woonse ucitile mfundilishi mubye, ulyeelete koomboloshekwa. Awooyo waambila mubye ayi, ‘Taaku mboobete!’ ulyeelete koomboloshekwa munkuta inene. Sombi uyo waamba ayi, ‘Webo omuluya!’ ulyeelete wawaalwa mumulilo utamaani.

²³ Aboobo, na utoopa cipo pacipaililo, ono weebaluka ayi kuli ncewakabishisha mukwanu,

²⁴ shiya cipo cako kunembo lya cipaililo, utaangune uye unyumfwanaakwe, ndyeenga waboola kwisa mukupa cipo cako.

²⁵ “Ulyeelete kufwambaana kunyumfwana ashimilandunyoko kamuciya kunkuta. Mukwiinga inga waakukutola mumaansa amoomboloshi, alakwe moomboloshi wakutola mumaansa amushilikaani, lakwe inga waakukubika muntolongo.

²⁶ Ntoomulwiita calushinisho ayi teshi ukasweemo umo, kushikila ukalipile shoonse shiyandika.

Kwiisha shabulale

²⁷ “Mwakanyumfwaawo bakulukulu mbobakalwiitikwa ayi, ‘Utaciti bulale.’

²⁸ Sombi nebo ntoomulwiita ayi uyo woonse ulangilisha mwanakashi calunkumbwa, wacita kale bulale anguwe mumoyo.

²⁹ Ono na liinso lyako lyakululyo lyakulengesha ayi ubishe, ncibotu kulilobolaamo akulisowa. Mukwiinga ncibotu kusowekelwa cipansha ca mubili, kwiinda kwaamba ayi mubili woonse ukawaalwe mumulilo utamaani.

³⁰ Na lyaansa lyako lyalulyo lyakulengesha ayi ubishe, ncibotu kulitimbulaako akulisowa. Mukwiinga ncibotu kusowekelwa cipansha ca mubili, kwiinda kwaamba ayi mubili woonse ukawaalwe mumulilo utamaani.

Kwiisha shakulekana

³¹ “Kwakaambwa alimwi ayi, ‘Uyo woonse uleka mukaakwe ulyeelete kumupa nkalata yakwishibisha ayi balekana.’

³² Sombi nebo ntoomulwiita ayi uyo woonse uleka mukaakwe, utakwe kucita bulale, utoomulengesha kucita bulale na weebwa. Alakwe uyo weeba mwanakashi wakalekwa, wacita bulale.

Kwiisha shakulumbila

³³ “Mwakanyumfwa alimwi mbobakaambilwa bakulukulu ayi, ‘Utalumbili cakubeca, sombi ucite kweelana ambowalumbila kuMwaami Lesa, Lesa wako.’

³⁴ Sombi nebo ntoomulwiita ayi muteeleshi kulumbila napaceyi nakubi kulumbila ayi, ‘Kwiculu’ mukwiinga ncecuuna cakwe Lesa,

³⁵ nabi kulumbila ayi, ‘Panshibo!’ mukwiinga mpaalyata Lesa. Utalumbili alimwi ayi, ‘KuJelusalemu!’ ceebo njendabala inene ya Mwaami Munene.

³⁶ Muteeleshi nabi kulumbila ayi, ‘Mutwi wangu’ ceebo tamukoonshi kusandula mususu womwi ayi utube nabi kushiya.

³⁷ Mwebo amweelebo pakwaamba ayi, ‘Ee’ nabi ‘Sobwe’ mukwiinga na ceenda waawa, ingayi cilaswa kuli Satana.

Bubi tabeelanishi

³⁸ “Mwakanyumfwaawo bakulukulu mbobakalwiitikwa ayi, ‘Na muntu wakutulula liinso, awebo mutulule liinso, na ndiino ndyaakusokola, awebo musokole liino.’

³⁹ Sombi nebo ntoomulwiita ayi bubi tabeelanishi. Na umwi wakuuma kulicili lyakululyo, piluluka akuume akucipiko.

⁴⁰ Na umwi utooyanda kukupa mulandu, ono wakunyaya mwinjila, utamukaashi, sombi mupe acakufwala ca peculu.

⁴¹ Na umwi muntu wakukakatisha kuyaakwe mushinso ulaampa mailo yomwi, anu yaakwe mushinso wa mamailo obilo.

⁴² Aba cintu kumuntu woonse wakusenga alimwi uyo utooyanda kubweleka utamwiimi.

Kusuna balwani bako

⁴³ “Mwakanyumfwawo bakulukulu mbobakalwiitikwa ayi, ‘Usune mubyo, sombi upate mulwani wako.’

⁴⁴ Sombi nebo ntoomulwiita ayi, ‘Amusune balwani banu akubapaililaako abo bamupensha,

⁴⁵ kwaamba ayi mube baana ba Ishiwanu uli kwiculu.’ Ceebo lakwe lisuba lyakwe lilaswa, lumwi lulabala pabamucita shibi abali kabotu, akuloshesha mfula baluleme abataluleme boonse.

⁴⁶ Ono na kamusunibo bantu abo bamusuni, nkokwaamba ayi ncilambunshi nceenga mwatambula? Te abalo beshikusonkesha musonko balacita ubo?

⁴⁷ Mwebo na kamwanshabo bamakwabanu, ingayi mutoocitanshi ico ciinda babyaanu bamwi? Sa te bakunsengwe balacita ubo?

⁴⁸ Anu mwebo mulyeelete kuba bantu basalalite, bweenka bubete Ishiwanu uli kwiculu.