Mateyo 4 - Baibo Busansulushi Bwa Libuku Ili

Jesu mbwaakasunkwa aSatana

¹ Lyalo Jesu wakatanjililwa aMushimu Usalashi kuya muluyanga ayi akasunkwe aMubiibi.

² Ndyaakamana kulikasha kulya kwa nshiku makumi one, malumwi amashiku, Jesu wakanyumfwa nsala.

³ Ono alakwe Mubiibi shikusunka wakesa akumwaambila ayi, “Na uli Mwanaakwe Lesa, ambila mabwe aya asanduke cakulya.”

⁴ Sombi Jesu wakakumbula ayi, “Cililembetwe muMalembo akwe Lesa ayi, ‘Muntu taabi abuumi mukulyabo kweenka, sombi ulaba abuumi amaswi oonse aswa kuli Lesa.’ ”

⁵ Kuswawaawo Mubiibi uyo wakatola Jesu kuJelusalemu, ndabala inene isalalite, akumubika pakansunswa ka ciluli ca Ŋanda yakwe Lesa.

⁶ Mpeeke wakaambila Jesu ayi, “Na uli Mwanaakwe Lesa, liwaale panshi, mukwiinga cililembetwe muMalembo akwe Lesa ayi, ‘Lesa ulaakutuma baanjelo bakwe ayi bakakubaake,’ alimwi ayi, ‘Balaakukubaka kwaamba ayi utacisi cimpanta cako kulibwe.’ ”

⁷ Mpeeke Jesu wakamukumbula ayi, “Sombi Malembo akwe Lesa alaamba alimwi ayi, ‘Utasunki Mwaami Lesa wako.’ ”

⁸ Kuswawaawo Mubiibi uyo wakatola Jesu kukalundu kalaamfu abuumbi. Wakamubonesha malelo oonse a mucishi ca panshi abubotu bwa ngawo,

⁹ akumwaambila ayi, “Inga ndakupa malelo oonse aya na wafukama akunambila.”

¹⁰ Lyalo Jesu wakamwaambila ayi, “Swaawo apa Satana! Ceebo kulilembetwe ayi, ‘Ulyeelete kulambila Mwaami Lesa, Lesa wako alimwi akusebenselabo nguwe.’ ”

¹¹ Mpomunyaawo Mubiibi wakaswaawo, lyalo baanjelo bakesa batabatila Jesu.

Jesu mbwaakatalika milimo yakwe muGalili

¹² Ono Jesu ndyaakanyumfwa ayi Joni bakamubika muntolongo, wakaya mukwikala mucishi ca Galili.

¹³ Wakashiya ndabala ya Nasaleti akuya mukwikala mundabala ya Kapenaumu, yakalinga muloombe lwa lweenge mushishi sha Sebuluni aNafutali.

¹⁴ Shakacitika kweelana ambwaakaamba mulaluki mukulukulu Isaya ayi,

¹⁵ “Ocishi ca Sebuluni acishi ca Nafutali, kuya kulweenge, akwitala lya Joodani, webo Galili ocishi ca baswamashi bakunsengwe!

¹⁶ Bantu bakalinga kwikala mumunshinshe bakabona mumuni unene. Abalo abo bakalinga kwikala mucishi ca cimfule ca lufu, mumuni ulaakubamunikila.”

¹⁷ Kuswawaawo Jesu wakatalika kushimikila, kaamba ayi, “Amusanduke kuswa kushibiibi shanu mukwiinga Bweene bwakwe Lesa buli pafwaafwi!”

Jesu mbwaakeeta beshikucaya nswi bone

¹⁸ Ono Jesu ndyaakalinga kuya bweenda muloombe lwa Lweenge lwa Galili, wakabona Simoni wiitwa ayi Pita aAndulu mwanike wakwe, kabawaala koombe mumaanshi ceebo bakalinga beshikucaya nswi.

¹⁹ Jesu wakabaambila ayi, “Amunkonkele, ndaakumupa nkusu shakuleta bantu kuli ndime bweenka mbomwalinga kucata nswi.”

²⁰ Amanebo kwaamba boobo, bakashiya toombe twabo akumukonkela.

²¹ Ndyaakeendakobo paniini, wakabona Jemusi aJoni mwanike wakwe, bana bakwe Sebedi, kabali mubwaato aishiwabo kababamba toombe twabo. Jesu wakabeeta,

²² abalo mukutacelwa bakashiya bwaato aishiwabo, bamukonkela.

Jesu mbwaakeeisha akushimikila alimwi akushilika

²³ Jesu wakeenda mucishi coonse ca Galili kuya ciisha mushoonde sha baJuda, akushimikila Makani Abotu a Bweene bwa kwiculu alimwi akuya cishilika malwashi apusenepusene.

²⁴ Aboobo impuwo yakushilika kwakwe yakanyumfwika mucishi coonse ca Silya. Mpeeke bantu bakatalika kutola balwashi baanji kuli nguwe abo bakalinga kuciswa cankusu, bakalinga kucite bashikaswa, beshitushita alimwi abayuminite mibili. Alakwe Jesu wakabashilika boonse.

²⁵ Lyalo bantu baanji baanji bakamukonkela kuswa kuGalili akuMandabala ali Likumi, kuJelusalemu akuJudeya alimwi akwitala lya Joodani.