Mateyo 28 - Baibo Busansulushi Bwa Libuku Ili

Jesu mbwaakabuka kuswa kubafu

¹ Ndibwakeenda bushiku bwakookesha bwa Cibelu, ono macuunsacuunsa paSondo, Maliya wa kuMagadala aMaliya umwi bakaya mukubona kucuumbwe.

² Mpeeke kwakacitika citentanshi cinene ceebo munjelo wa Mwaami wakaseluka kuswa kwiculu wakunkulusha libwe lyakalinga kucuumbwe akwikalaawo.

³ Wakalinga kuboneka anga nkubeka kwa mfula, ashalo shakufwala shakwe shakalinga kutubabo tuu.

⁴ Beshikulindilila kucuumbwe bakaloonda abuumbi cakwaamba ayi bakafwa citu.

⁵ Mpomunyaawo munjelo wakaambila banakashi balya ayi, “Mutaloondi! Ndishi kwaamba ayi mutoolangoola Jesu uyo ngobakapopa pamucilingano.

⁶ Taamo muno, wabushikwa bweenka mbuli mbwaakaamba. Kamwisa mubone mpwaakalinga kulete.

⁷ Ono amufwambaane, mukalwiite bashikwiiya bakwe ayi, ‘Wabushikwa kuswa kubafu alimwi bulya watanjila kuya kuGalili, uko nkweshi mukamubonene!’ Mutalubiiko makani ngondamulwiita.”

⁸ Aboobo bakaswa cakufwambaana kucuumbwe. Bakaloonda, sombi alimwi kabasangalete. Bakacica kuya mukulwiita bashikwiiya bakwe.

⁹ Cakuteengashila, Jesu wakabakumanya akwaamba ayi, “Mwaboneka.” Lyalo banakashi bakasena pafwaafwi, bamucata kushimpanta akumulambila.

¹⁰ Mpeeke Jesu wakabaambila ayi, “Mutaloondi! Kamuya mukalwiite bamakwesu ayi baye kuGalili uko nkweshi tuye tukakumanine.”

Beshikulindilila mbobakaluula cakacitika

¹¹ Ono banakashi balya ndibakalinga kuya, bamwi bashilumamba bakalinga kulindilila kucuumbwe, bakaya mundabala inene mukulwiita bamatanjilili ba bapailishi shoonse shakacitika.

¹² Mpomunyaawo bapailishi banene abamaloba ba baJuda bakabungana pantu pomwi akupangana cakucita. Lyalo bakapa bashilumamba maali aanji

¹³ akubalwiita ayi, “Mulyeelete kwaamba ayi, ‘Bashikwiiya bakwe besa mukwiipa mutuntu mashiku swebo katulete.’

¹⁴ Ono na mweendeleshi anyumfwe makani aya, swebo tutoomulwiita kabotu kwaamba ayi mutapekwi mulandu.”

¹⁵ Aboobo bashilumamba balya bakabwesa maali alya akucita kweelana ambobakalwiitwa. Paceebo ceeco, makani aya alishibikitwe bweenka ubo kubaJuda abobulya.

Jesu mbwaakatuma bashikwiiya bakwe

¹⁶ Mpomunyaawo bashikwiiya bakwe bali likumi awomwi bakaya kuGalili, kukalundu uko nkwaakabalwiita Jesu ayi bakaye.

¹⁷ Ono ndibakamubona, bakamulambila. Sombi bamwi bakalinga kutonsha.

¹⁸ Lyalo Jesu wakasena pafwaafwi akubaambila ayi, “Ndapeekwa nkusu shoonse kwiculu alimwi apacishi ca panshi.

¹⁹ Paceebo ceeco, kamuya mukanokwiisha bantu bamishobo yoonse, mukababombeke muliina lya baTa, alya Mwaana alimwi alya Mushimu Usalashi.

²⁰ Mukabeeishe kukonkela akucita shintu shoonse nshendakamulwiita. Nebo nanooli amwebo lyoonse kushikila kumamanino a cishi.”