Mateyo 27 - Baibo Busansulushi Bwa Libuku Ili

Jesu mbwaakatolwa kuli Pilato

¹ Ndibwakaca macuunsacuunsa, bamatanjilili ba bapailishi abamaloba ba baJuda bakapangana ayi bacaye Jesu.

² Mpeeke Jesu bakamwaanga akumutola mumaansa akwe Pilato, mweendeleshi wa kuLoma.

Lufu lwakwe Judasi

³ Ono Judasi uyo wakaaba Jesu ndyaakabona ayi Jesu wapingulwa kucaikwa, wakalibona ayi wakabisha. Lyalo wakabooshesha bamatanjilili ba bapailishi abamaloba ba baJuda maali a silifa ali makumi otatwe ngobakalinga bamupa

⁴ akubaambila ayi, “Ndakabisha kwaaba muntu utacite mulandu.” Balo bakamukumbula ayi, “Ono tucite buyani swebo? Ngamakani ako omwiine ayo!”

⁵ Mpomunyaawo Judasi wakawaala maali alya panshi muŊanda yakwe Lesa, akuswa waya mukulyaangilila.

⁶ Sombi bamatanjilili ba bapailishi bakabwesa maali alya akwaamba ayi, “Mulawo wesu ulakasha kwaabika motubika maali muno muŊanda yakwe Lesa ceebo ngamaali a bulowa.”

⁷ Paceebo ceeco, bakapangana ayi maali alya boole muunda wa mubumbi, ayi banoofukilamo bantu beensu na wafwa.

⁸ Nceceeco muunda uyu ncewiitilwa ayi, “Muunda wa Bulowa” abobulya.

⁹ Lyalo cakacitika cancinencine cakaamba Jelemiya mulaluki mukulukulu ayi, “Bakabwesa maali a silifa makumi otatwe, mweelo ngobakasumininshanya kumuula bene Isilaeli,

¹⁰ akuula muunda wa mubumbi bweenka mbuli mbwaakandwiita Mwaami Lesa.”

Pilato mbwaakeepusha Jesu

¹¹ Mpeeke Jesu bakamwiimika kunembo lya mweendeleshi wa kuLoma uyo wakamwiipusha ayi, “Sa ndiwe mwaami wa baJuda?” Jesu wakamukumbula ayi, “Mwacaamba nobeene.”

¹² Sombi ndibakamubekesha bamatanjilili ba bapailishi abamaloba ba baJuda taakwe kukumbulaawo.

¹³ Mpomunyaawo Pilato wakeepusha Jesu ayi, “Sa toshinyumfwite shikani kufula nshebatookwaambila?”

¹⁴ Sombi Jesu taakwe kukumbulaawo nabi liswi lyomwi, mpeeke mweendeleshi wakacelemanabo.

Jesu mbwaakapingulwa kucaikwa

¹⁵ Paciindi cakusekelela bushiku bwa Pasika bwakwiibaluka kusotokela, mweendeleshi lyoonse wakalinga kwaangulula kaili womwi, uli woonse ngweenga bamusenga bantu.

¹⁶ Paciindi ico kwakalinga kaili umwi wakalinga kucite mpuwo ibiibi, wiitwa ayi Balabasi.

¹⁷ Ono bantu ndibakabungana, Pilato wakabeepusha ayi, “Ngani ngomusuni ayi mwaangulwite, Balabasi nabi Jesu wiitwa ayi Usalitwe wakwe Lesa?”

¹⁸ Mukwiinga Pilato wakalinga kwishi ayi bakatola Jesu kuli nguwe ceebo bakamufwita munyono.

¹⁹ Pilato ndyaakalinga kushiite pacuuna cakoombolosheshaawo, mukaakwe wakatumya maswi akwaamba ayi, “Mutaciti cintu nabi comwi pamuntu uyo utacite mulandu ceebo sunu mashiku ndapenshekwa abuumbi muciloto ceebo ca nguwe.”

²⁰ Sombi bamatanjilili ba bapailishi abamaloba ba baJuda, bakayungoola bantu ayi basenge Pilato ayi abaangulwite Balabasi, lakwe Jesu acaikwe.

²¹ Mweendeleshi wakabeepusha alimwi ayi, “Nguli ngomusuni ayi mwaangulwite pabantu bobilo aba?” Balo bakakumbula ayi, “Balabasi!”

²² Pilato wakabeepusha ayi, “Ino mucite buyani Jesu wiitwa ayi Usalitwe wakwe Lesa?” Boonse bakakumbula ayi, “Aapopwe pamucilingano!”

²³ Sombi Pilato wakabeepusha alimwi ayi, “Ino ncibiibinshi ncaacita?” Lyalo bakeendilishaawo koolobesha ayi, “Aapopwe pamucilingano!”

²⁴ Ono Pilato ndyaakabona ayi taaku nceshi cicitike, alimwi ayi inga paakuba shimfulunganya, wakabwesa maanshi akusamba kumaansa pameenso a bantu boonse akwaamba ayi, “Nebo nshicite mulandu palufu lwa muntu uyu! Ngumulandu wanu nobeene!”

²⁵ Mpeeke bantu boonse bakakumbula ayi, “Mulandu wa lufu lwakwe aube pali ndiswe abana besu.”

²⁶ Lyalo Pilato wakabaangulwita Balabasi, mpeeke wakaamba ayi Jesu akwiipwe misako. Kuswawaawo, wakamwaaba kubashilumamba ayi apopwe pamucilingano.

Bashilumamba mbobakaseka akuweluluka Jesu

²⁷ Mpomunyaawo bashilumamba bakenjisha Jesu muŋanda ya mweendeleshi, akubunganya bashilumambanyinaabo bamwi boonse, besa bashinguluka Jesu.

²⁸ Mpeeke bakamufuula akumufwalika cisani cifubelafubela.

²⁹ Bakapanga mushini wa myuumfwa babika pamutwi wakwe akumufumbatisha litete mulyaansa lyalulyo. Lyalo bakafukama kunembo lyakwe akumwaansha anga nkumulemeka ayi, “Waboneka omwaami wa baJuda!”

³⁰ Lyalo bakamushipila mate akumunyaya litete akumuumishako pamutwi.

³¹ Ndibakamana kumuseka akumuweluluka boobo, bakamufuula cisani ncibakalinga bamufwalika, akumufwalika shakufwala shakwe. Lyalo Jesu bakamutola kuya mukumupopa pamucilingano.

Jesu mbobakamupopa pamucilingano

³² Ndibakaswa bakakumanya musankwa wiitwa ayi Simoni wa kuSailini. Mpomunyaawo bashilumamba bakamukakatisha kunyamuna mucilingano wakwe Jesu.

³³ Lyalo bakashika kumusena wiitwa ayi Gologota, nkokwaamba ayi musena wa cifuwa ca mutwi.

³⁴ Uko Jesu bakamupa waini usenkene andulwe ayi anwe, sombi ndyaakanyumfwaamo, wakakaka.

³⁵ Ndibakamana kumupopa pamucilingano, bakabaana shisani shakwe kwiinda mukuuma cisolo.

³⁶ Kuswawaawo bakekala panshi kabamulindilila.

³⁷ Peculu lya mutwi wakwe pamucilingano pakalinga kulembetwe maswi akalinga kutondesha mulandu ngobakamucaila ayi, “Uyu nguJesu, mwaami wa baJuda.”

³⁸ Lyalo bakamupopa pakati pamicilingano ya beepi bobilo, umwi kulyaansa lyalulyo aumwi kucipiko.

³⁹ Mpeeke bantu bakalinga kwiindilaako, bakalinga kupukumunabo mitwi akunoocobola Jesu

⁴⁰ kabaamba ayi, “Webo ndiwe wakalinga kwaamba ayi ulaakumwayulula Ŋanda yakwe Lesa akwiiyaka alimwi munshiku shotatwe. Ono na uli Mwanaakwe Lesa lipulushe tubone, useluke pamucilingano!”

⁴¹ Abalo bamatanjilili ba bapailishi, bafundishi ba Milawo alimwi abamaloba ba baJuda bakamuseka, kabaambooshanya beene ayi,

⁴² “Wakalinga kupulusha bamwi, sombi waalilwa kulipulusha mwiine. Sa te ngomwaami wa Isilaeli? Aaseluke ono pamucilingano kwaamba ayi tushome muli nguwe.

⁴³ Ulashoma muli Lesa akwaamba ayi, ‘Ndi Mwanaakwe Lesa.’ Ono Lesa aamupulushe na ulimusuni!”

⁴⁴ Lyalo beepi mbwaakapopwaabo pantu pomwi, abalo bakalinga kumutukana.

Lufu lwakwe Jesu

⁴⁵ Lisuba ndilyakashika pakati ka mutwi, kwakaba munshinshe mucishi coonse kushikila 3 koloko malumwi.

⁴⁶ Paciindi ca 3 koloko peenka, Jesu wakoolobesha aliswi lya peculu ayi, “Eloi, Eloi, lama sabakatani?” Nkokwaamba ayi, “NobaLesa bangu, nobaLesa bangu, ino nciinshi ncemwandekeleshesha?”

⁴⁷ Ono bamwi abo bakalingaawo, ndibakanyumfwa maswi aya, bakaamba ayi, “Amunyumfwe utokwiita Elija.”

⁴⁸ Umwi mulikoto lyabo wakacica, akubwesa mweepu wausumpa muwaini ulula usashite, wakabwesa kasako akubikako mweepu kwaamba ayi ape Jesu anwe.

⁴⁹ Sombi bamwi bakaamba ayi, “Atulindile, tubone na Elija utoosa mukumupulusha!”

⁵⁰ Jesu alimwi wakoolobesha aliswi lya peculu, watula moyo.

⁵¹ Paciindi ceenka ico, cisani cakalinga kushitilisha muŊanda yakwe Lesa, cakakwaamuka pakati, kuswa peculu apanshi. Cishi cakatenkaana amabwe akapasuka.

⁵² Shuumbwe shakacalooka, mpeeke bantu baanji bakafwa kabashoma muli Lesa, bakabushikwa kuswa kubafu.

⁵³ Bakaswa mushuumbwe. Ono Jesu ndyaakabuka kuswa kubafu, balo bakaya muNdabala inene Isalalite umo mobakabonekela kubantu baanji.

⁵⁴ Ono munene wa bashilumamba mwaanda, abashilumamba abo mbwaakalingaabo kabalindilila Jesu, ndibakabona citentanshi ashimwi shintu shoonse shakacitika, bakaloonda abuumbi, akwaamba ayi, “Ncakwiila, uyu muntu wakalinga Mwanaakwe Lesa!”

⁵⁵ Pakalinga abanakashi baanji bakalinga kweebela palaale. Banakashi aba mbobakalinga kwisa cikonkela Jesu kuswa kuGalili akumucafwa.

⁵⁶ Mulikoto lyabo mwakalinga Maliya wa kuMagadala, Maliya banyina Jemusi aJosefu alimwi abamuka Sebedi.

Jesu mbwaakabikwa

⁵⁷ Ndilyakookama lisuba, muntu umwi mubile wa kuAlimateya wiitwa ayi Josefu wakashika. Alakwe wakalinga shikwiiya wakwe Jesu.

⁵⁸ Muntu uyu wakaya kuli Pilato mukusenga mutuntu wakwe Jesu. Mpeeke Pilato wakasuminisha ayi bamupe mutuntu uyo.

⁵⁹ Mpomunyaawo Josefu wakabwesa mutuntu uyo akuupombela acisani cituba

⁶⁰ akuubika mucuumbwe cakwe cipya ico ncaakakaba mulibwe. Kuswawaawo, wakakunkulushilawo libwe linene pamulyango wa cuumbwe, kaaya.

⁶¹ Maliya wa kuMagadala aMaliya umwi bakalingaako nkomunya uko, kabashiite, kabalangene acuumbwe.

Mbobakabika beshikulindilila kucuumbwe cakwe Jesu

⁶² Ndibwakaca, pabushiku bwakookesha bwa Cibelu, bamatanjilili ba bapailishi abaFalisi bakabungana kuli Pilato

⁶³ akumwaambila ayi, “Nkambo, tuliingashite mbwaakaamba mubeshi uyo kaacili muumi ayi, ‘Ndaakubushikwa alimwi pabushiku bwatatu.’

⁶⁴ Anu amwaambile bamwi baye bakalindilile kucuumbwe kushikila peende nshiku shotatwe. Mukwiinga bashikwiiya bakwe inga besa mukwiipa mutuntu akulwiita bantu ayi, ‘Wabushikwa kuswa kubafu.’ Lyalo bubeshi bwabili bulaakubica kwiinda butaanshi.”

⁶⁵ Ndyaakanyumfwa boobo, Pilato wakabaambila ayi, “Amutoleeko beshikulindilila. Kamuya mukabambeko cankusu kweelana ambweenga mwakonsha.”

⁶⁶ Mpeeke bakanyamuka akuya mukushinkashinka mweela libwe akushiyako beshikulindilila.