Mateyo 26 - Baibo Busansulushi Bwa Libuku Ili

Mbobakapangana shakucaya Jesu

¹ Ono Jesu ndyaakamanisha kwaamba makani oonse aya, wakaambila bashikwiiya bakwe ayi,

² “Mulishi kwaamba ayi kwacaalabo nshiku shobilo ayi bushike bushiku bwa Pasika bwakwiibaluka kusotokela. Lyalo MwanaaMuntu ulaakwaabwa ayi apopwe pamucilingano.”

³ Lyalo bamatanjilili ba bapailishi abamaloba ba baJuda bakabungana mulubansa lwa mupailishi munene Kayafasi.

⁴ Bakasuminishanya ayi bacane nshila yakucatilamo Jesu cabushishi kwaamba ayi bamucaaye.

⁵ Bakaamba ayi, “Tatweelete kumucata pabushiku ubu bwakusekelela mukwiinga inga pacitika shimfulunganya pabantu beshi bakanooliiwo.”

Jesu mbwaakananikwa mafuta kuBetani

⁶ Jesu wakalinga kundabala ya Betani muŋanda yakwe Simoni wiitwa ayi shimanata.

⁷ Jesu ndyaakalinga kulya, kwakesa mwanakashi umwi wakalinga kucite musaashi wakapangwa kulibwe lya alabasita, kauswite mafuta anunkila kabotu amakwebo ayo ngaakapumwita pamutwi wakwe Jesu.

⁸ Sombi bashikwiiya bakwe ndibakabona boobo, bakatongooka akwaamba ayi, “Ceebonshi kunyonyoola bobulya mafuta?

⁹ Mafuta aya naakwiinga aulishikwa mweelo unene akupa maali ayo kubakandu!”

¹⁰ Sombi Jesu wakeshiba nshebakalinga kwaamba, lyalo wakabaambila ayi, “Ino mutoopensheshanshi mwanakashi uyu? Wancitila cintu cibotu abuumbi,

¹¹ mukwiinga bakandu muli abo nshiku shoonse, sombi nebo teshi nooli anu lyoonse.

¹² Ndyaantila mafuta pamubili, waunanikilabo limwi mafuta mubili wangu kwaamba ayi unoolindilabo kufukilwa.

¹³ Ntoomulwiita calushinisho ayi, kuli koonse bantu nkweshi bakanooshimika Makani Abotu mucishi coonse ca panshi, balaakunokwaamba acikani ici cacita mwanakashi uyu mukumwiibaluka.”

Judasi mbwaakasumina kwaaba Jesu

¹⁴ Mpomunyaawo umwi wa bashikwiiya bakwe Jesu bali likumi abobilo, wiitwa ayi Judasi Isikalyoti, wakaya kubamatanjilili ba bapailishi

¹⁵ akwiipusha ayi, “Ino inga mwampanshi na ndaaba Jesu kuli ndimwe?” Mpeeke bakabelenga maali asilifa ali makumi otatwe.

¹⁶ Kuswawaawo Judasi wakatalika kuyandoola ciindi ceelete cakwaabilawo Jesu.

Jesu mbwaakalya paska abashikwiiya bakwe

¹⁷ Ono pabushiku butaanshi bwakusekelela kwakulya Cimaande, bashikwiiya bakwe bakamwiipusha ayi, “Ino nkuli nkomusuni ayi tukamubambile kwakulita cakulya ca bushiku bwa Pasika bwakwiibaluka kusotokela?”

¹⁸ Lakwe Jesu wakaamba ayi, “Kamuya kumusankwa mundabala inene iyi mukamulwiite ayi, ‘Mufundishi wesu waamba ayi, ciindi cangu cili pafwaafwi. Ntooyanda kulita cakulya ca bushiku bwa Pasika abashikwiiya bangu muŋanda yako.’ ”

¹⁹ Mpeeke bashikwiiya balya bakacita kweelana aJesu mbwaakabaambila. Lyalo bakabamba cakulya ca bushiku bwa Pasika.

²⁰ Ndipakashiyashiyabo, Jesu abashikwiiya bakwe bali likumi abobilo bakekala ayi balye.

²¹ Ndibakalinga kulya, Jesu wakaamba ayi, “Ntoomulwiita calushinisho ayi umwi mulikoto lyanu utoongaba.”

²² Mpeeke bashikwiiya bakwe bakacatwa buumba akutalika kumwiipusha womwi womwi ayi, “Sa ndime, Nkambo?”

²³ Lakwe wakakumbula ayi, “Ngooyo ngoontobwengaakwe mumbale yomwi.

²⁴ MwanaaMuntu utooya kulufu kweelana ambokulembetwe, sombi mapensho kuli wooyo muntu utoomwaaba! Naakwiinga cakabotabo akutashalwa muntu uyu.”

²⁵ Mpomunyaawo alakwe Judasi shikumwaaba wakeepusha ayi, “Sa ndime, Nkambo?” Jesu wakamukumbula ayi, “Wacaamba omwiine.”

Mulalilo wa Mwaami

²⁶ Ndibakalinga kulya, Jesu wakabwesa cimaande, walumba Lesa, akukomoona wapa bashikwiiya akubalwiita ayi, “Amutambule mulye, uyu ngumubili wangu.”

²⁷ Lyalo wakabwesa nkomeshi, walumba Lesa, akupa bashikwiiya bakwe akubaambila ayi, “Amunweemo noonse

²⁸ mukwiinga ubu mbulowa bwangu bwa cipangano cipya, bweshi bukatiilwe kwaamba ayi baanji balekelelwe shibiibi shabo.

²⁹ Ntoomulwiita ayi, teshi nkanwewo lyobilo maanshi a shisepo sha minyansa, kushikila pabushiku ubo ndyeshi nkanwe anu maanshi apya a shisepo ishi, muBweene bwa baTa.”

³⁰ Ndibakamana kwiimba lwiimbo lwakulumbaisha Lesa, bakaya kuKalundu ka Olifi.

Jesu mbwaakaambila Pita ayi ulaakunkaka

³¹ Jesu wakaambila bashikwiiya bakwe ayi, “Sunu lyeenka mashiku, mwebo noonse mutotyongola akunshiya neenka. Kweelana ambokulembetwe ayi, ‘Ndaakucaya mweembeshi, mpeeke mbelele shoonse shilaakupalangana.’

³² Sombi na nkabushikwe kuswa kubafu, ndaakutanjila kuya kuGalili.”

³³ Sombi Pita lakwe wakamwaambila ayi, “Nabi boonse bakatyongooke akumushiya, sombi nebo teshi nkamushiyeewo.”

³⁴ Mpomunyaawo Jesu wakaambila Pita ayi, “Ntookulwiita calushinisho ayi sunu lyeenka mashiku, kombwe kaatana kulila, utokwaamba mankanda otatwe ayi toonshi.”

³⁵ Lakwe Pita wakaamba kuli nguwe ayi, “Nabi na baambe ayi bancaile pantu pomwi amwebo, nebo inga nshaambiiwo ayi nshimwishi.” Lyalo bashikwiiya boonse bakaamba bweenkoobo.

Jesu mbwaakapaila mumuunda wa Getisemani

³⁶ Lyalo Jesu wakaya abashikwiiya bakwe kumusena wiitwa ayi Getisemani, mpeeke wakabaambila ayi, “Amwikale pano ndyeenciya kokulya mukupaila.”

³⁷ Mpeeke Jesu wakaya aPita alimwi abana bakwe Sebedi basankwa bobilo. Lyalo Jesu wakatalika kuba abuumba akulisukama mumoyo.

³⁸ Mpomunyaawo wakabaambila ayi, “Moyo wangu wacatwa buumba bwakuyanda kuncaya. Amwikale pano munoolindilila kamulibambite pantu pomwi anebo.”

³⁹ Mpeeke Jesu wakeendakobo paniini, wakawita panshi akutalika kupaila ayi, “Ta, na kacikonsheka, nkomeshi ya mapensho inyindilile, nakubi boobo mutaciti kuyanda kwangu. Sombi mucite kuyanda kwanu.”

⁴⁰ Ndyaakaboola kubashikwiiya bakwe botatwe balya, wakacana balilete. Lyalo wakaambila Pita ayi, “Sa mwebo mwaalilwa kulindilila anebo apaciindi ciniinibo ici?

⁴¹ Amwikale kamulibambite, akupaila kwaamba ayi mutanjili mumasunko. Moyo walo ulisuni, sombi mubili ngowabula nkusu.”

⁴² Jesu wakaboolela mukupaila alimwi ayi, “Ta, na nkomeshi ya mapensho iyi inga tainyindilili kaantana kunwa, anu kuyanda kwanu akucitike.”

⁴³ Ndyaakaboola alimwi, wakacana balilete ceebo shikoye shabo shakalinga kulemete kutulo.

⁴⁴ Jesu wakabashiya alimwi akuya mukupaila lyatatu, kaamba maswi ngomunya alya ataanshi.

⁴⁵ Lyalo wakaboolela kubashikwiiya bakwe akubaambila ayi, “Sa abobulya mucilete akunocookesha? Amubone, ciindi cashikila, MwanaaMuntu ono utokwaabwa mumaansa a bamucita shibi.

⁴⁶ Amunyamuke, katiya. Amubone, shikungaba washika kale.”

Jesu mbwaakacatwa

⁴⁷ Jesu ndyaakalinga kucaamba, alakwe Judasi womwi wa bashikwiiya bakwe Jesu bali likumi abobilo wakashika. Wakesa abantu baanji baanji bakalinga kucite mipeeni ankooli. Bantu aba bakabatuma mbamatanjilili ba bapailishi alimwi abamaloba ba baJuda.

⁴⁸ Ono uyo shikwaaba Jesu wakalinga wabapa kale citondesho ayi, “Uyo ngweshi njeenkaanshe akufyonta mwishibe ayi ngonguwe, mumucate.”

⁴⁹ Judasi ndyaakashika, wakeendililabo kuya kuli Jesu akwaamba ayi, “Mwaboneka Nkambo!” Mpomunyaawo wakamufyonta.

⁵⁰ Lakwe Jesu wakamwaambila ayi, “Ndaba, cita nceweendela!” Mpeeke balya bantu bakalibumba pali Jesu, bamucata.

⁵¹ Lyalo umwi wa baabo bakalinga aJesu, wakakusha mupeni wakwe akusutula kutwi musha wa mupailishi munene.

⁵² Sombi Jesu wakamwaambila ayi, “Boosha mupeni mookala ceebo boonse balwanisha kumupeeni abalo balaakucaikwa kumupeeni.

⁵³ Sa tooshi kwaamba ayi inga ndasengabo shuulu sha baanjelo kuli baTa alimwi ayi inga bampa paciindi ceenka ico?

⁵⁴ Sombi na ndacita boobo, ino inga shacitika buyani shilembetwe muMalembo akwe Lesa ayi ishi shilyeelete kucitika?”

⁵⁵ Lyalo Jesu wakabaambila bantu baanji balya ayi, “Ino mweshitanshi amipeeni alimwi ankooli pakwisa mukuncata anga ndimwiipi? Nebo ndakalinga anu inshiku shiinji, kaamwiisha muŊanda yakwe Lesa, sombi tamukwe kuncataawo, sobwe.

⁵⁶ Sombi shoonse ishi shacitika kwaamba ayi shakalemba balaluki bakulukulu shicitike cancinencine.” Mpeeke bashikwiiya bakwe boonse bakamupalangana, bamushiya eenka.

Jesu mbobakamutola kunkuta

⁵⁷ Bantu abo bakacata Jesu bakamutola kuŋanda yakwe Kayafasi, mupailishi munene, uko kwakalinga kubungene bafundishi ba Milawo abamaloba ba baJuda.

⁵⁸ Sombi Pita wakalinga kuya cikonkela Jesu palaale, kushikila wakaya mukwinjila amulubansa lwa ŋanda ya mupailishi munene. Wakenjila mukati akwikala pantu pomwi abeshikulindilila kuŋanda yakwe Lesa ayi abone nceshi cicitike.

⁵⁹ Bamatanjilili ba bapailishi alimwi abaabo boonse beendelesha munkuta, bakalinga kuyandoola bukamboni bwakubekesha Jesu kwaamba ayi bamucanine mulandu wakumucailaawo.

⁶⁰ Sombi tabakwe kubucana nakubi kwaamba ayi bantu baanji bakalinga kupa bukamboni bwakubeca pali Jesu. Kumamanino kwakesa bantu bobilo

⁶¹ akwaamba ayi, “Uyu muntu wakaamba ayi, ‘Nebo, ndakonsha kumwaaya Ŋanda yakwe Lesa, akwiiyaka alimwi munshiku shotatwe.’ ”

⁶² Lyalo mupailishi munene wakanyamuka akwiipusha Jesu ayi, “Sa teshi ukumbuleewo pamakani aya oonse ngobatokwaambila?”

⁶³ Sombi Jesu wakoomunabo tontolo. Mupailishi munene wakeepusha Jesu alimwi ayi, “Ntookwaambila muliina lyakwe Lesa muumi ayi, ulumbile na ndiwe Usalitwe wakwe Lesa ulya, Mwanaakwe Lesa.”

⁶⁴ Jesu wakamukumbula ayi, “Mwacaamba nobeene. Sombi ntoomwaambila noonse ayi, kuswa cecino ciindi mulaakubona MwanaaMuntu kaashiite kulyaansa lyalulyo lwa baIshi, Beshinkusu shoonse. Mulaakumubona keesa mumakumbi a kwiculu.”

⁶⁵ Mpeeke mupailishi munene wakakwamoona shakufwala shakwe, akwaamba ayi, “Nkucobola Lesa uku. Ono apa sa inga katucilangoola abamwi bakamboni? Noonse mwalinyumfwila mbwaacobola Lesa.

⁶⁶ Ono mutooyeeya buyani?” Lyalo boonse bakakumbula ayi, “Ulyeelete kucaikwa.”

⁶⁷ Mpomunyaawo bakamushipila mate pameenso akumuuma. Bamwi bakamuuma mapaka

⁶⁸ bakaamba ayi, “Twaambile webo oUsalitwe wakwe Lesa, ino ngani wakuuma?”

Pita mbwaakakaka Jesu

⁶⁹ Pita wakalinga kushiite pansengwe mulubansa lwa ŋanda. Mpeeke mwanakashi musebenshi umwi wakaya kuli Pita akumwaambila ayi, “Awebo wakalinga aJesu wa kuGalili.”

⁷⁰ Sombi Pita wakakaka pameenso a bantu boonse kwaamba ayi, “Isho nshotokwaamba nshishishiiwo tau.”

⁷¹ Cilya Pita ncaakaamba ayi aswe mulubansa lwa ŋanda, aumwi mwanakashi musebenshi wakamubona, akutalika kulwiita baabo bakalingaawo ayi, “Alakwe muntu uyu wakalinga aJesu wa kuNasaleti.”

⁷² Pita wakakaka alimwi, akulumbila ayi, “Ncakwiila nebo nshimwinshiiwo muntu uyo!”

⁷³ Ndipakeendabo ciindi ciniini, abo bakalingaawo bakaya kuli Pita akumwaambila ayi, “Ncakwiila webo uli wa mulikoto lyakwe Jesu mukwiinga mwaambo wako utookuyubulula.”

⁷⁴ Sombi Pita wakaalabo, wasansaawo amaanshi akutalika kulumbila ayi, “Lesa ulimbwene na ntokwaamba cakubeca. Uyu muntu nebo nshimwishiiwo.” Paciindi ceenka ico kombwe wakalila.

⁷⁵ Mpeeke wakeebaluka maswi akamulwiita Jesu ayi, “Kombwe kaatana kulila, webo Pita ulaakunkaka mankanda otatwe.” Lyalo wakaswita pansengwe, waya walila abuumbi.