Mateyo 25 - Baibo Busansulushi Bwa Libuku Ili

Cikoshanyo ca bamyooye likumi

¹ “Pabushiku ubo bwakwisa MwanaaMuntu, Bweene bwa kwiculu bulaakukoshanya abamyooye likumi abo bakanyamuna malampi akucinsha shibwiinga.

² Pabamyooye aba, bosanwe bakalinga baluya, sombi bamwi bosanwe bakalinga kucenjete.

³ Aba bosanwe baluya ndibakabwesa malampi, tabakwe kuyumuna mafuta amwi palubasu.

⁴ Sombi bacenjete bakayumuna mafuta amwi mumisaashi.

⁵ Ceebo shibwiinga wakacelwa kwisa, boonse bamyooye bakatalika kushinshila kushikila baya amutulo.

⁶ “Ono pakati ka mashiku kwakanyumfwika maswi abantu bakalinga kuyobela ayi, ‘Ngooyo shibwiinga waashika! Amwise mukamutambule!’

⁷ Mpeeke bamyooye boonse balya bakabuka, akutalika kubamba malampi abo.

⁸ Lyalo bamyooye baluya bakaambila babyabo bacenjete ayi, ‘Amutucafweko mafuta anu ceebo malampi esu atooyanda kushimika.’

⁹ Bacenjete bakakumbula ayi, ‘Tau, inga aceya na twabaana. Anu mwebo kamuyabo kubeshikuulisha mukoole aanu mafuta.’

¹⁰ Bamyooye baluya balya kabacica mukuula mafuta, shibwiinga alakwe wakapoola. Mpeeke bamyooye bacenjete, abo bakalinga kulibambite, bakenjilaakwe shibwiinga muŋanda yabwiinga. Lyalo akumulyango kwakacalwa.

¹¹ Pesule bamyooye baluya bakashika abalo. Bakatalika kwaamba ayi, ‘Nkambo, nkambo, amutucalwiteeko!’

¹² Sombi shibwiinga wakabakumbula ayi, ‘Kumulwiita calushinisho, nebo nshimwishiiwo!’ ”

¹³ Lyalo Jesu wakabaambila ayi, “Paceebo ceeco, kamulibambitebo lyoonse mukwiinga tamubwishi bushiku nabi ciindi MwanaaMuntu ndyeshi akese.

Cikoshanyo ca basebenshi botatwe

¹⁴ “Ciindi ico, nsheshi shikacitike shilaakukoshanya anga ngumuntu wakaya palweendo lulaamfu. Kaatana kuya, wakabunganya basebenshi bakwe akubaabila buboni bwakwe.

¹⁵ Umwi wakamupa shuulu shosanwe sha maali, wabili shuulu shobilo alakwe umwi cuulu comwi. Wakabaabila kweelana ambweenga basebenshesha womwi awomwi. Kuswawaawo, wakanyamuka waya.

¹⁶ Uyo wakapekwa shuulu shosanwe wakeendililabo kusebensesha maali alya, akucaninawo shuulu shosanwe sha maali.

¹⁷ Alakwe wabili bweenka, wakacaninawo shuulu shobilo alimwi.

¹⁸ Sombi uyo wakapekwa cuulu comwi ca maali, wakaya mukukaba cilindi akufukilamo maali a mwaami wakwe.

¹⁹ “Ndipakeenda ciindi cilaamfu, mwaami wa basebenshi abo wakesa. Wakababunganya ayi bamusansulwiite mbuli mbobakasebensesha maali akwe.

²⁰ Mpeeke musebenshi uyo wakapekwa shuulu shosanwe wakashika ampindu ya shuulu shosanwe akwaamba ayi, ‘Nkambo, nebo mwakampa shuulu shosanwe sha maali, sombi amubone, ndakacaninawo shuulu shosanwe ashimwi.’

²¹ Mwaami wakwe wakamwaambila ayi, ‘Wakacita kabotu, omusebenshi mubotu ushomeka. Ceebo washomeka pashintu shiniini, ono ntookupa mulimo wakulama shintu shiinji. Kosa usangalale akusekelela pantu pomwi anebo nemwaami wako.’

²² Alakwe uyo wakapekwa shuulu shobilo wakashika akwaamba ayi, ‘Nkambo, nebo mwakampa shuulu shobilo, sombi amubone, ndakacaninawo shuulu shobilo ashimwi.’

²³ Mwaami wakwe wakamwaambila ayi, ‘Wakacita kabotu, omusebenshi mubotu ushomeka. Ceebo washomeka pashintu shiniini, ono ntookupa mulimo wakulama shintu shiinji. Kosa usangalale akusekelela pantu pomwi anebo nemwaami wako.’

²⁴ “Ono alakwe uyo wakapekwa cuulu comwi wakashika akulwiita mwaami wakwe ayi, ‘Nkambo, ndakalinga kwishi ayi mwebo muli babiibi moyo. Mulatebula mpomutakwe kushanga akuyobolola mpomutakwe kuminsa.

²⁵ Paceebo ceeco, ndakaloonda. Ndakaya mukwaafukila panshi mucilindi. Amubone, maali anu ngaaya.’

²⁶ Sombi mwaami wakwe wakamukumbula ayi, ‘Webo omusebenshi mubiibi mutolo! Te walikwishi kwaamba ayi nebo ndatebula mpoontakwe kushanga akuyobolola mpoontakwe kuminsa?

²⁷ Aboobo wakalinga kweelete kwaatola kumaanda a beshimakwebo, naakwiinga pakuboola, ndacaana mpindu.

²⁸ Ono amumunyaaye maali ayo mupe wooyo ucite shuulu sha maali shili likumi.

²⁹ Ceebo uyo woonse ucite kale ulaakupekwa ashimwi. Sombi uyo ucite kaniini ulaakunyaikwa akaako koonse nkaacite.

³⁰ Musebenshi uyu mubiibi utacite ncito, amumuwaale kunsengwe mumunshinshe, uko nkweshi anoolila akulumanya meeno.’

Koomboloshekwa kwa mamanino

³¹ “Ono MwanaaMuntu ndyeshi akese mubulemu abaanjelo bakwe boonse ba kwiculu, ulaakwikala pacuuna cakwe ca Bwaami.

³² Lyalo mishobo yoonse ya bantu ilaakubungana kuli nguwe. Mpeeke ulaakupansaanya bantu bweenka mbuli mweembeshi mbwaapansaanya mbelele ampongo.

³³ Ulaakubika mbelele kululyo lwakwe, ashalo mpongo kucipiko.

³⁴ Lyalo Mwaami ulaakwaambila baabo beshi bakabe kululyo lwakwe ayi, ‘Amwise kuno, mwebo nomwakapekwa coolwe kuli baTa. Amwinjile muBweene ubo mbomwakabambilwa kuswa kumatalikilo a cishi.

³⁵ Ceebo ndindakafwa nsala, mwebo mwakampa cakulya, ndindakafwa nyotwa mwebo mwakampa cakunwa, andindakalinga mweensu mwebo mwakantambula.

³⁶ Ndindakalinga mubusakula, mwebo mwakamfwalika. Ndindakalinga mulwashi, mwebo mwakesa mukumbona, andindakalinga muntolongo, mwakesa mukumbona.’

³⁷ Mpomunyaawo baluleme balaakukumbula ayi, ‘Nkambo, ino ndilili nditwakamubona kamufwite nsala, twamupa cakulya, nabi ndimwakalinga kufwite nyotwa, twamupa cakunwa?

³⁸ Ndilili nditwakamubona kamuli beensu twamutambula? Nabi ndilili ndimwakalinga mubusakula twamufwalika?

³⁹ Ndilili ndimwakalinga balwashi nabi muntolongo, twesa mukumubona?’

⁴⁰ Lakwe Mwaami ulaakukumbula ayi, ‘Ntoomulwiita calushinisho ayi, ilyo lyoonse ndimwakacita sheeshi kuwomwi wa baaba bamakwesu bataaku mbobabete, ndime mwakalinga kucitila.’

⁴¹ “Lyalo ulaakwaambila baabo beshi bakabe kulubasu lwa kucipiko ayi, ‘Amuswe kuli ndime, mwebo nomwakashinganwa! Kamuya kumulilo utamaani uyo wakabambilwa Mubiibi abaanjelo bakwe.

⁴² Ceebo ndindakafwa nsala, tamukwe kumpa cakulya, andindakafwa nyotwa, tamukwe kumpa cakunwa.

⁴³ Ndindakalinga mweensu, tamukwe kuntambula mumaanda anu, ndindakalinga mubusakula, tamukwe kumfwalika. Ndakalinga mulwashi amuntolongo, sombi tamukwe kwisa mukumbona.’

⁴⁴ Abalo balaakukumbula ayi, ‘Nkambo, ndilili nditwakamubona kamufwite nsala, nabi nyotwa, nabi kamuli beensu, nabi kamuli mubusakula, nabi kamuli balwashi, nabi muntolongo twakaaka kumucafwa?’

⁴⁵ Lakwe Mwaami ulaakubakumbula ayi, ‘Ntoomulwiita calushinisho ayi, lyoonse ilyo ndimwakakaka kucafwa womwi wa baaba bataaku mbobabete, mwakakakila ndime.’

⁴⁶ Mpomunyaawo abo balaakuya kumapensho atamaani, sombi baluleme balaakwinjila mubuumi butamaani.”