Mateyo 23 - Baibo Busansulushi Bwa Libuku Ili

Jesu mbwaakaambila bantu ayi bacenjele abafundishi ba Milawo alimwi abaFalisi

¹ Mpomunyaawo Jesu wakaambila bantu baanji baanji abo bakalingaawo alimwi abashikwiiya bakwe ayi,

² “Bafundishi ba Milawo abaFalisi mbobasansulula Milawo yakwe Mose.

³ Aboobo mulyeelete kucita akukonkela shintu shoonse nshebamulwiita. Sombi mutanoocita sheesho nshebacita ceebo tabaciti nshebeeisha.

⁴ Balanyamwisha bantu mikuli ilemu, sombi balo beene tabakumiiko nabibo kakumo.

⁵ Balacita shintu shoonse kwaamba ayi bababoone bantu. Balalyaangilila tukomwe tunene ntobabikamo maswi akwe Lesa palyaansa alimwi apankumo, akulaampya mansambaala ashakufwala shabo.

⁶ Balisuni kwikala mumisena ya bulemu mumibala, akwikala pashuuna shibotu mushoonde shabo.

⁷ Balisuni kwaanshikwa cabulemu mumishika alimwi akwiitwa ayi, ‘Bafundishi’.

⁸ Sombi mwebo tamweelete kwiitwa ayi, ‘Bafundishi’ ceebo noonse muli bamukowa alimwi mulicitebo Mufundishi womwi.

⁹ Muteeti muntu pano pacishi ca panshi ayi, ‘Ta’ ceebo mulicitebo Ishiwanu womwi uyo uli kwiculu.

¹⁰ Muteetwi nabi ayi, ‘Mutanjilili’ ceebo Mutanjilili wanu ngomwi, eenkabo Usalitwe wakwe Lesa.

¹¹ Munene pakati kanu ulyeelete kuba musebenshi wanu.

¹² Uyo woonse ulisumpula, Lesa ulaakumuceesha alimwi uyo woonse uliceesha, Lesa ulaakumusumpula.

Jesu mbwaakakalalila bafundishi ba Milawo abaFalisi

¹³ “Mapensho kuli ndimwe nobafundishi ba Milawo abaFalisi, mwebo nomwaamba nshemutaciti! Mulacalila bantu mulyango wa muBweene bwa kwiculu. Mwebo nobeene tamusuni kwinjila alimwi mulakasha baabo basuni. [

¹⁴ Mapensho kuli ndimwe nobafundishi ba Milawo abaFalisi, mwebo nobantu nomwaamba nshemutaciti! Mulabwesa buboni bwa bamukalubinje banakashi akubeca kupaila mipailo ilaamfu. Paceebo ceeco, Lesa ulaakumoombolosha cankusu.]

¹⁵ “Mapensho kuli ndimwe nobafundishi ba Milawo abaFalisi, mwebo nobantu nomwaamba nshemutaciti! Muleenda nyendo shakusubuka lweenge ashishi kwaamba ayi mukasandule muntu womwi. Na wasanduka, ulaba muntu weelete mumulilo utamaani kwiinda ndimwe nobeene.

¹⁶ “Mapensho kuli ndimwe, nobamatanjilili boofu! Mwebo muleeisha ayi, ‘Na umwi muntu walumbila Ŋanda yakwe Lesa, ingayi taaku mbocibete. Sombi na umwi walumbila golodi ili muŋanda yakwe Lesa, uyo ulyeelete kucita ceeco ncaalumbila.’

¹⁷ Mwebo nobamatanjilili boofu baluya! Ino cinene ncili, golodi nabi Ŋanda yakwe Lesa iyo ilengesha golodi ayi ibe isalalite?

¹⁸ Muleeisha ayi, ‘Na umwi muntu walumbila cipaililo, ingayi taaku mbocibete. Sombi na umwi walumbila cipo cili pacipaililo, ulyeelete kucita ceeco ncaalumbila.’

¹⁹ Mwebo noboofu! Ino cinene ncili, cipo nabi cipaililo ico cilengesha ayi cipo cibe cisalalite?

²⁰ Nkokwaamba ayi muntu ulumbila cipaililo, ulalumbila asheesho shoonse shiliiwo.

²¹ Alakwe uyo ulumbila Ŋanda yakwe Lesa, ulalumbila ŋanda aLesa uyo ukalaamo.

²² Awooyo ulumbila kwiculu, ulalumbila cuuna cakwe Lesa alimwi aLesa uyo ukalaawo.

²³ “Mapensho kuli ndimwe nobafundishi ba Milawo abaFalisi, mwebo nomwaamba nshemutaciti! Mulapa calikumi ca mbewu shinunkila kabotu alimwi ashakubika mucakulya, sombi mulasuula milawo inene yancinencine, mbuli kucita shiluleme kubantu, nkumbu alimwi akushomeka. Mwalinga kweelete kunooshicita, kamutasuuli shimwi isho.

²⁴ Mwebo nobamatanjilili boofu, mulasansa loonshi mucakunwa canu, sombi yalo ngamela mulaimina!

²⁵ “Mapensho kuli ndimwe nobafundishi ba Milawo abaFalisi, mwebo nomwaamba nshemutaciti! Mulasansha pansengwe lya nkomeshi ambale, sombi mumyoyo yanu muliswitebo bulyabi akulisuna.

²⁶ Mwebo nobaFalisi boofu, amutaangune kusansha shili mukati munkomeshi, apalo pansengwe ndyeshi patube.

²⁷ “Mapensho kuli ndimwe nobafundishi ba Milawo abaFalisi, mwebo nomwaamba nshemutaciti! Muli anga nshuumbwe nshebakashingula, shiboneka kabotu pansengwe, sombi mukati kamuswitebo shifuwa sha bantu bakafwa ashimwi shibiibi shoonse.

²⁸ Amwebo bweenka mbomubete. Mulaboneka anga muliluleme kubantu, sombi mukati muliswitebo shintu shabubeshi ashibiibi.

Jesu mbwaakaamba shamapensho abo

²⁹ “Mapensho kuli ndimwe nobafundishi ba Milawo abaFalisi, mwebo nomwaamba nshemutaciti! Mulayaka shuumbwe shibotu sha balaluki bakulukulu akubotesha shibumbwabumbwa sha bantu baluleme.

³⁰ Mulaamba ayi, ‘Netwakalingaako inshiku sha bamashali besu bakulukulu, naakwiinga tatukwe kucita mbobakacita pakucaya balaluki.’

³¹ Nkokwaamba ayi mulalyaanga nobeene ceebo mulasumina ayi muli baana ba baabo bakacaya balaluki bakulukulu.

³² Anu amutolelele, mumanishe mulimo wakatalika bamashali banu bakulukulu!

³³ Mwebo nobana bansoka, nobana bampili! Ino mulaakuyuba buyani mulilo utamaani?

³⁴ Paceebo ceeco, ntoomulwiita ayi ndaakumutumina balaluki, bantu basongo alimwi abafundishi. Bamwi mulaakubacaya akubapopa pamicilingano, abalo bamwi mulaakubakwiipa mushoonde shanu akubapensha kuswa mundabala andabala.

³⁵ Aboobo mulaakupekwa mulandu ceebo ca bantu baluleme boonse bakacaikwa, kutalikila kuli Abelo uyo muntu ululeme kushikila kuli Sekaliya mwanaakwe Belekiya, uyo ngomwakacaila muŋanda yakwe Lesa pakati ka Musena Usalalite alimwi acipaililo.

³⁶ Ntoomulwiita calushinisho mulandu wa sheeshi shoonse ulaakuwita pabantu ba cecino ciindi.

Jesu mbwaakalinga kusuni ndabala ya Jelusalemu

³⁷ “Webo Jelusalemu, Jelusalemu, noocaya balaluki akuuma mabwe bantu abo Lesa mbwaatuma kuli ndiwe! Liinji liinji ndalinga kusuni kubunganya bantu bako bweenka mbuli nkuku mboifukatila twaana twanjiyo mumapapaminwa, sombi webo wakakaka!

³⁸ Aboobo Ŋanda yakwe Lesa ili muli ndiwe, yaba litongo.

³⁹ Ntoomulwiita calushinisho ayi teshi mukamboneewo alimwi kushikila mukaambe ayi, ‘Ulicite coolwe uyo utoosa muliina lya Mwaami Lesa.’ ”