Mateyo 22 - Baibo Busansulushi Bwa Libuku Ili

Cikoshanyo ca bwiinga

¹ Jesu alimwi wakaambila bantu mushikoshanyo ayi,

² “Bweene bwa kwiculu bulikoshenye amwaami umwi wakabambila mwanaakwe musankwa bwiinga.

³ Wakatuma basebenshi bakwe ayi bakeete baabo boonse bakatambwa kubwiinga, sombi boonse bakakaka.

⁴ Lyalo wakatuma basebenshi abamwi akubaambila ayi, ‘Muye mukaambile baabo boonse bakatambwa ayi ndabamba kale shakulya. Basune bangu aboombe beenite bacaikwa, aboobo shoonse shilibambitwe kale. Amwise kubwiinga.’

⁵ Sombi abo bakatambwa tabakwe kubikaako amaano. Umwi wakaya kumuunda wakwe, alakwe umwi wakaya mukuulisha shintu shakwe.

⁶ Ono bamwi bakacaala, bakacata basebenshi bamwaami babapensha akubacaya.

⁷ Mpomunyaawo mwaami wakakalala abuumbi. Mpeeke wakatuma bashilumamba bakwe kuya mukunyonyoola bacayi abo akutenta ndabala yabo inene.

⁸ Lyalo wakaambila basebenshi bakwe ayi, ‘Shoonse shiyandika pabwiinga shabambwa kale. Sombi abo bakatambwa tebalinga kweelete kutambwa.

⁹ Paceebo ceeco, kamuya mumampambanwa anshila mukatambe bantu bali boonse mbeshi mukacane.’

¹⁰ Mpomunyaawo basebenshi balya bakaya munshila mukutamba bantu bali boonse mbobakacana, babiibi abali kabotu boonse. Lyalo muŋanda ya bwiinga mwakesula bantu.

¹¹ “Ono mwaami ndyaakenjila muŋanda mulya mukubona beensu, wakacanamo musankwa umwi watakalinga kufwete cakufwala ca pabwiinga.

¹² Mpeeke mwaami wakamwiipusha ayi, ‘Ndaba, ino wenjila buyani muŋanda muno kootafwete cakufwala ca pabwiinga?’ Sombi musankwa uyo taaku ncaakakumbula, sobwe.

¹³ Lyalo mwaami wakaambila basebenshi bakwe ayi, ‘Amumwaange kumaansa akumyeendo, mumuwaale pansengwe kumunshinshe. Uko nkweshi anoolila akulumanya meeno.’ ”

¹⁴ Lyalo cakweelaako Jesu wakaamba ayi, “Nabi beetwa mbaanji, sombi basalwa mbaniini.”

Mwiipusho wa pakupeleka musonko

¹⁵ Ono baFalisi bakanyamuka kuya mukulifuyafuya ayi bacate Jesu kwiinda mukwaamba kwakwe.

¹⁶ Lyalo bakatuma bashikwiiya babo abantu bamwi bakwe Elodi kuli Jesu mukumwiipusha ayi, “Bafundishi, tulishi kwaamba ayi mwebo mulashomeka alimwi muleeisha maswi akwe Lesa calushinisho, bweenka mbuli mbwaabete. Tamulisukami amiyeeyo ya muntu mukwiinga tamusalululi.

¹⁷ Amutulwiite mbomuyeeya mwebo. Sa Milawo ilatusuminisha kupa musonko kuli Sisa, muleli munene wa kuLoma, nabi tau?”

¹⁸ Sombi Jesu wakeshiba ayi batokwiipusha cakubeca. Lyalo wakabaambila ayi, “Mwebo nobantu nomwaamba nshemutaciti! Ino mutoonsunkilanshi?

¹⁹ Amumboneshe lyaali lya musonko!” Abalo bakamuletela lyaali lya kuLoma.

²⁰ Mpeeke wakabeepusha ayi, “Ino mutwi aliina shiliiwo nsha baani?”

²¹ Abalo bakamukumbula ayi, “Nshakwe Sisa, muleli munene wa kuLoma.” Alakwe Jesu wakabaambila ayi, “Anu amupe muleli munene wa kuLoma shintu isho shaakwe, alakwe Lesa mumupe shintu shaakwe.”

²² Ndibakanyumfwa boobo, bakakankamana. Lyalo bakaswaawo bamushiya.

Mwiipusho wa pakubuka kuswa kubafu

²³ Pabushiku bweenka ubo baSaduki bamwi bakesa kuli Jesu. Bantu aba mbobaamba ayi bantu bakafwa teshi bakabukeewo. Mpeeke bakamwiipusha ayi,

²⁴ “Bafundishi, Mose wakaamba ayi, ‘Na muntu wafwa kaatana kushalilamo mwaana mumukaakwe, mukwabo ulyeelete kweeba mukalubinje kwaamba ayi ashalileko baana mukwabo uyo wakafwa.’

²⁵ Ono kumisheesu kwakalinga basankwa bamukowa bosanwe abobilo. Munene bantu wakeeba, sombi wakafwa kaatana kushalilamo mwaana akushiya mukaakwe kumukwabo.

²⁶ Sombi wabili awatatu boonse cakaba ngumushobo womwi kushikila akubamukowa boonse bali bosanwe abobilo.

²⁷ Kumamanino, alakwe mwanakashi wakafwa.

²⁸ Ono pabushiku bwakubuka kuswa kubafu, mwanakashi uyo ulaakuba muka ni? Mukwiinga boonse bamukowa bali bosanwe abobilo bakalinga kumweebete.”

²⁹ Sombi Jesu wakabakumbula ayi, “Mulilubite ceebo tamwishi Malembo akwe Lesa nabi nkusu shakwe.

³⁰ Mukwiinga bantu baakubuka kuswa kubafu, teshi bakanokweebana, sombi balaakuba bweenka mbuli baanjelo ba kwiculu.

³¹ Ono apalo pamakani akubuka kuswa kubafu, sa tamuna kubelengawo kale nshaakamwaambila Lesa ndyaakaamba ayi,

³² ‘Nebo ndime Lesa wakwe Abulaamu, Lesa wakwe Isaki alimwi aLesa wakwe Jakobo.’ Nkokwaamba ayi teshi Lesa wa bafu, sombi nguLesa wa boomi.”

³³ Mpeeke bantu baanji baanji abo bakalingaawo ndibakanyumfwa kwiisha kwakwe, bakakankamana abuumbi.

Mulawo unene wiinda pamilawo yoonse

³⁴ Ono baFalisi ndibakanyumfwa ayi Jesu wakoma baSaduki, abalo bakabungana pantu pomwi.

³⁵ Mpeeke umwi mufundishi wa Milawo mulikoto lyabo, wakeepusha Jesu cakumusunka ayi,

³⁶ “Bafundishi, ino ngumulawonshi unene pamilawo yoonse yakwe Lesa?”

³⁷ Jesu wakamukumbula ayi, “ ‘Suna Mwaami Lesa wako amoyo wako woonse, abuumi bwako boonse, amiyeeyo yako yoonse.’

³⁸ Uyu ngomulawo unene alimwi ngomulawo utaanshi.

³⁹ Mulawo wabili ngooyu, awalo ulikoshenyebo autaanshi ayi, ‘Suna mubyo bweenka mboolisuni omwiine.’

⁴⁰ Pamilawo yobilo iyi mpopali Milawo yoonse yakwe Mose alimwi akwiisha kwa balaluki.”

Mwiipusho wa pamakani a Usalitwe wakwe Lesa

⁴¹ Ono baFalisi ndibakalinga kubungene, Jesu wakabeepusha ayi,

⁴² “Ino mwebo mulayeeya buyani paUsalitwe wakwe Lesa? Ino ngwamulunyungu lwakwe ni?” Balo bakamukumbula ayi, “Ngwamulunyungu lwakwe Defedi.”

⁴³ Jesu wakabeepusha alimwi ayi, “Ceebonshi mwiine ndyaakatanjililwa aMushimu Usalashi wakabanda Usalitwe wakwe Lesa ayi, ‘Mwaami’? Defedi wakaamba ayi,

⁴⁴ ‘Mwaami Lesa wakaambila Mwaami wangu ayi, Kala kulyaansa lyangu lyalulyo, kushikila nkaalule balwani bako kwaamba ayi babe mpopakulyata myeendo yako.’

⁴⁵ Ono na Defedi mwiine wakamwiita ayi, ‘Mwaami’, ino Usalitwe wakwe Lesa inga washalwa buyani mulunyungu lwakwe alimwi?”

⁴⁶ Sombi taaku muntu nabi womwi wakakumbula nabi liswi lyomwi. Lyalo kuswa pabushiku ubo, taaku muntu wakalinga kwiipusha Jesu nabibo mwiipusho womwi wakumusunka.