Mateyo 20 - Baibo Busansulushi Bwa Libuku Ili

Cikoshanyo ca basebenshi

¹ “Mukwiinga Bweene bwa kwiculu bulikoshenye amuntu wakafuma macuunsa, kuya mukwinjisha bantu beshikusebensa mumuunda wakwe wa minyansa.

² Ono ndibakasuminishanya abasebenshi ayi bafole lyaali lyomwi lyeelete pabushiku, wakabatuma mumuunda wakwe.

³ Paciindi ca 9 koloko, muntu uyu wakaya kumushika akucana bamwi bakalinga kushiitebo.

⁴ Wakabaambila ayi, ‘Amwebo kamuya kumuunda wangu mukasebense, ntoomufolesha maali eelete.’

⁵ Aboobo bakaya. Muntu uyu wakacita bweenka ubo paciindi lisuba ndilyakashika pakati kamutwi alimwi aciindi ca 3 koloko.

⁶ Lisuba ndilyakashika paciindi cinjila ŋombe, wakaya alimwi, wacaana abamwi kabashiitebo. Mpeeke wakabeepusha ayi, ‘Ceebonshi mulishiitebo lisuba lyoonse ili?’

⁷ Abalo bakakumbula ayi, ‘Mukwiinga taaku muntu watwinjisha ncito.’ Lyalo wakabaambila ayi, ‘Anu amwebo kamuya mukasebense kumuunda wangu wa minyansa.’

⁸ “Ndilyakaba macolesha, mwine muunda wakaambila mubanshi wakwe ayi, ‘Beete boonse basebenshi ubafoleshe. Utalikile kubaabo bacaalila kwisa, ndyeshi uboole kubaabo bataanguna.’

⁹ Mpeeke abo bakatalika linjila ŋombe kusebensa, bakafola lyaali lyomwi lyomwi.

¹⁰ Ono balya bakataanguna kusebensa ndibakashika, bakalinga kuyeeya ayi mpashi batoofola maali aanji. Sombi abalo bakafola lyaali lyomwi lyomwi.

¹¹ Ndibakamana kufola, bakatalika kutongookila mwine muunda,

¹² kabaamba ayi, ‘Aba bacaalila basebensabo ciindi ciniinibo, ono mwebo mwabafolesha maali eenka ngomwatupa aswebo netwasebensa akupya kulumwi lisuba lyoonse.’

¹³ “Lyalo wakakumbulawo womwi ayi, ‘Ndaba, nshikwe kukubishisha, sobwe. Sa tatukwe kusumininshanya palyaali lyomwi?

¹⁴ Bwesabo lyaali lyako unooya. Ndime nemwiine ndasala kupa wooyo wacaalila bweenka mbuli mbondakufolesha awebo.

¹⁵ Sa nsheelete kucita mbuli mboonsuni pabuboni bwangu? Mpashi wamfwita munyono mukwiinga nshisalululi pakupa?’ ”

¹⁶ Lyalo Jesu wakaamba ayi, “Bacaalishi balaakuba bataanshi, abalo bataanshi balaakuba bacaalishi.”

Jesu mbwaakaamba shalufu lwakwe lyatatu

¹⁷ Ono Jesu ndyaakalinga kuya kuJelusalemu, wakatola bashikwiiya bakwe bali likumi abobilo palubasu akubaambila kabaaya bweenda ayi,

¹⁸ “Tutooya kuJelusalemu uko MwanaaMuntu nkweshi bakamwaabe kubamatanjilili ba bapailishi abafundishi ba Milawo. Balaakumupingula ayi acaikwe

¹⁹ akumwaaba kubaswamashi bakunsengwe. Balaakumuwela, kumukwiipa akumupopa pamucilingano. Sombi pabushiku bwatatu ulaakubushikwa kuswa kubafu!”

Muka Sebedi mbwaakasengela bana bakwe

²⁰ Mpomunyaawo muka Sebedi, abana bakwe basankwa bobilo, wakaya kuli Jesu, wafukama kunembo lyakwe ayi asenge cimwi cintu.

²¹ Lyalo Jesu wakamwiipusha ayi, “Utooyandanshi?” Alakwe wakakumbula ayi, “Amushomeshe ayi bana bangu basankwa bobilo aba, bakekale umwi kululyo lwanu, aumwi kucipiko muBweene bwanu.”

²² Sombi Jesu wakabaambila ayi, “Tamwishi ncemutoosenga. Sa inga mwanwita munkomeshi ya mapensho njeshi nkanwiteemo?” Abalo bakakumbula ayi, “Ee, inga twacikonsha.”

²³ Mpeeke Jesu wakabalwiita ayi, “Ncakwiila mulaakunwitaamo munkomeshi iyo, sombi nebo nshicite nkusu sha kusala wooyo eshi akekale kululyo lwangu nabi kucipiko. MbaTa beshi bakape misena iyi kubaabo mbobakabambila.”

²⁴ Ono bashikwiiya bamwi likumi, ndibakanyumfwa makani aya, bakakalalila bashikwiiya bamukowa bobilo balya.

²⁵ Mpomunyaawo Jesu wakabeeta bashikwiiya boonse akubalwiita ayi, “Mwebo mulishi ayi baami ba baswamashi bakunsengwe balabonesha bwaami pali mbabo, abalo beendeleshi babo mbweeke ubo.

²⁶ Sombi tabwishi mbocibete ubo pali ndimwe. Uyo woonse usuni kuba munene pali ndimwe, ulyeelete kuba musebenshi wanu.

²⁷ Ncakwiila uyo woonse usuni kuba mutanjilili pali ndimwe, ulyeelete kuba musha wanu.

²⁸ Amube bweenka mbuli MwanaaMuntu utakwe kwisa mukusebenselwa, sombi mukusebensela bamwi alimwi akwaaba buumi bwakwe kwaamba ayi alubule bantu baanji.”

Jesu mbwaakashilika basankwa boofu bobilo

²⁹ Jesu abashikwiiya bakwe ndibakalinga kuswa muJeliko, bantu baanji baanji bakamukonkela.

³⁰ Ono basankwa bobilo boofu bakalinga kushiite mweela nshila, ndibakanyumfwa ayi nguJesu utokwiinda, bakoolobesha ayi, “Nkambo, nobana babo baDefedi amutunyumfwileko nkumbu!”

³¹ Bantu bakakalalila boofu balya akubaambila ayi boomune. Sombi balo bakeendilishaawo koolobesha ayi, “NoBana babo baDefedi! Nkambo amutunyumfwileko nkumbu!”

³² Mpomunyaawo Jesu wakeemikana akubeeta. Wakabeepusha ayi, “Nciinshi ncemusuni ayi mucitile?”

³³ Abalo bakakumbula ayi, “Nkambo, tulisuni kwaamba ayi tutalike kubona.”

³⁴ Mpomunyaawo Jesu wakabafwita nkumbu akucata pameenso abo. Paciindi ceenka ico bakatalika kubona, akumukonkela.