Mateyo 2 - Baibo Busansulushi Bwa Libuku Ili

Bantu basongo bakaswa kwicwe

¹ Jesu wakashalilwa mundabala ya Betileemu mucishi ca Judeya, munshiku isho Elodi ndyaakalinga mwaami wa mucishi ico. Ndyaakashalwabo, bantu basongo bakaswa kwicwe bakashika muJelusalemu akwiipusha ayi,

² “Uli kuli mwaana washalwa uyo mwaami wa baJuda? Twabona nyenyeenshi yakwe kwicwe, aboobo twesa mukumulambila.”

³ Ndyaakanyumfwa makani aya, mwaami Elodi wakalisukama abuumbi pantu pomwi abantu boonse ba muJelusalemu.

⁴ Mpomunyaawo wakabunganya boonse bamatanjilili ba bapailishi alimwi abafundishi ba Milawo akubeepusha nkwaakalinga kweelete kushalilwa Usalitwe wakwe Lesa.

⁵ Abalo bakamulwiita ayi, “NkuBetileemu mucishi ca Judeya. Kweelana ambwaakalemba mulaluki mukulukulu ayi,

⁶ ‘Webo Betileemu wa mucishi ca Judeya, toobete ndabala iniini pamandabala oonse a muJudeya, ceebo muli ndiwe mulaakuswa mutanjilili eshi akeembele bantu bangu bene Isilaeli anga ngumweembeshi.’ ”

⁷ Mpomunyaawo Elodi wakabunganya basankwa basongo abo cabushishi, akubeepusha ciindi nyenyeenshi ndiyakaboneka.

⁸ Lyalo wakabatuma kuBetileemu akubaambila ayi, “Kamuya mukamulangoolelangoole mwaana uyu, na mukamucaane mukese mukandwiite kwaamba ayi anebo nkayeeko mukumulambila.”

⁹ Ono ndibakanyumfwa maswi aya, bakanyamuka akunooya. Kucana ayalo nyenyeenshi ilya njebakabona kwicwe ilitanjilite panembo, kushikila yeemikana pamusena pakalinga mwaana.

¹⁰ Lyalo ndibakabona nyenyeenshi iyo bakasangalala abuumbi.

¹¹ Ndibakenjila muŋanda, bakabona mwaana alimwi aMaliya banyina. Mpomunyaawo bakafukama akulambila mwaana. Lyalo bakacalula shoola shabo akupa shipo sha golodi, atumwi tununkila kabotu pakutenta alimwi amafuta anunkila kabotu eetwa ayi mule.

¹² Lesa wakabacenjesha muciloto mashiku ayi batabooleli kuli Elodi, aboobo bakeenda nshila imwi pakuya kumishaabo.

Jesu mbobakamutola kuIjipiti

¹³ Ono basongo balya ndibakaswaako, munjelo wa Mwaami Lesa wakaboneka kuli Josefu muciloto akumwaambila ayi, “Nyamuka utole mwaana abanyina muye kuIjipiti. Mukekaale kweenka uko kushikila nkamwaambile ayi musweeko, mukwiinga Elodi utooyanda kucaya mwaana.”

¹⁴ Alakwe Josefu wakanyamuka, watola mwaana abanyina kuIjipiti mashiku.

¹⁵ Wakekala kuIjipiti kushikila Elodi wafwa. Ici cikani cakacitika kweelana abwaakaamba Mwaami Lesa kwiinda mumulaluki mukulukulu ayi, “Ndakeeta Mwanaangu ayi aswe muIjipiti.”

Elodi mbwaakacaisha baana

¹⁶ Ono Elodi ndyaakabona ayi bamwiinda kumaano bantu balya basongo, wakakalala abuumbi. Lyalo wakatuma bantu ayi baye bakacaye baana basankwa boonse muBetileemu alimwi amumisena yakalinga kushingulukite, abo bakalinga kucite myaaka yobilo kuboola panshi. Wakapima myaaka iyo kweelana aciindi nceyakaboneka nyenyeenshi mbuli mbobakamulwiita basongo.

¹⁷ Ici cakacitika kweelana abwaakaamba mulaluki mukulukulu Jelemiya ayi,

¹⁸ “Liswi lyanyumfwika muLama, kooloma kwa mibila. Lakelo utoolila bana bakwe, wakaka akuumushikwa mukwiinga bafwa.”

Mbobakaboola kuswa kuIjipiti

¹⁹ Ono Elodi ndyaakafwa, munjelo wa Mwaami Lesa wakaboneka kuli Josefu kaacili kuIjipiti muciloto,

²⁰ akumwaambila ayi, “Nyamuka, ubooshe mwaana abanyina kucishi ca Isilaeli, mukwiinga abo bakalinga kuyanda kucaya mwaana bakafwa.”

²¹ Mpomunyaawo Josefu alakwe wakanyamuka akutola mwaana abanyina mucishi ca Isilaeli.

²² Sombi ndyaakalinga kuya munshila, wakanyumfwa ayi Akelosi ngowakekala pacuuna cakwe ishi kuba mwaami mucishi ca Judeya. Paceebo ceeco Josefu wakaloonda kushika, wakaya kuGalili kweelana ambwaakacenjeshekwa alimwi muciloto.

²³ Lyalo wakaya mukwikala mundabala ya Nasaleti, bweenka mbuli mbobakaamba balaluki bakulukulu ayi, “Ulaakunokwiitwa ayi wakuNasaleti.”