Mateyo 18 - Baibo Busansulushi Bwa Libuku Ili

Ngani munene pakati kesu?

¹ Paciindi ceenka ico bashikwiiya bakaya kuli Jesu mukumwiipusha ayi, “Ino ngani munene muBweene bwa kwiculu?”

² Mpeeke Jesu wakeeta mwanike akumwiimika pakati kabo.

³ Lyalo wakabaambila ayi, “Ntoomulwiita calushinisho ayi na mubule kuba mbuli mwanike muniini wa mbuli wooyu, teshi mukenjile muBweene bwa kwiculu.

⁴ Aboobo uyo woonse ulibombya mbuli mwanike muniini uyu, ngomunene muBweene bwa kwiculu.

⁵ Uyo woonse utambula mwanike wa mbuli wooyu muliina lyangu, ulatambula ndime.

Shintu shitulengesha kubisha

⁶ “Uyo woonse weenga walengesha womwi wa baaba banike baniini bashoma muli ndime ayi abishe, inga cabota kumwaangilila libwe linene lyakupelelaawo munshingo akumuwaala mulweenge lulaamfu.

⁷ Mapensho kubantu ba mucishi ca panshi ceebo ca baabo balengesha babyabo kubisha! Shintu ishi shilyeelete kuboneka, sombi mapensho kubaabo bashilengesha.

⁸ “Na lyaansa nabi mweendo wako wakulengesha ayi ubishe, utimbuleeko akuusowa. Mukwiinga ncibotu kwaamba ayi ukenjile mubuumi butamaani kootacite lyaansa nabi mweendo, kwiinda kwaamba ayi, ukawaalwe mumulilo utamaani amaansa obilo nabi myeendo yobilo.

⁹ Na liinso lyako lyakulengesha ayi ubishe, liloboleemo ulisoowe. Mukwiinga ncibotu kwaamba ayi ukenjile mubuumi butamaani aliinso lyomwi, kwiinda kwaamba ayi ukawaalwe mumulilo utamaani ameenso obilo.

Cikoshanyo ca mbelele isowekete

¹⁰ “Amucenjele ayi mutanyanshi nabi womwi wa baaba baana baniini. Ceebo ntoomulwiita ayi baanjelo baabo nkobali lyoonse kuli baTa bali kwiculu. [

¹¹ Ceebo MwanaaMuntu wakesa mukupulusha basowekete.]

¹² “Ino mutooyeeya buyani? Na muntu kaacite mbelele mwaanda, ono yomwi yasoweka, sa inga taashiyi sheesho shili makumi osanwe aone alimwi ashosanwe ashone mutulundu, akuya mukuyandoola yeeyo yasoweka?

¹³ Na weecana, ntoomulwiita calushinisho ayi ulakondwa abuumbi pambelele yomwi ilya, kwiinda sheesho shili makumi osanwe aone alimwi ashosanwe ashone shitakwe kusoweka.

¹⁴ Mbweeke ubo Ishiwanu uli kwiculu taasuni kwaamba ayi, womwi wa baaba baana baniini asoweke.

Mbotweelete kucita na mukwabesu watubishisha

¹⁵ “Na mukwanu wakubishisha, koya ukamulwiite cilubo cakwe. Na wakunyumfwila nkokwaamba ayi wamuboosha kumubili.

¹⁶ Sombi na wabula kukunyumfwila, ambilaawo aumwi nabi bobilo uyaabo kwaamba ayi, ‘Makani aambwe pameenso a bakamboni bobilo nabi botatwe,’ kweelana ambokulembetwe mumaswi akwe Lesa.

¹⁷ Ono na wakaka kubanyumfwila abalo, ulwiite bantu ba mucoonde. Ono na wakaka kunyumfwila abamucoonde boonse, amumucitebo anga ngumuntu wa kunsengwe nabi musonkeshi.

¹⁸ “Ntoomulwiita calushinisho ayi cintu coonse nceenga mwaanga pacishi ca panshi, akwiculu koonse caangwa. Cili coonse nceenga mwaangulula pacishi ca panshi akwiculu cilaakwaangululwa.

¹⁹ “Ntoomulwiita alimwi ayi na bobilo pakati kanu pacishi ca panshi basuminishanya pacintu ncebatoosenga, baTa bali kwiculu balaakubacitila.

²⁰ Mukwiinga apo pabungana bantu bobilo nabi botatwe muliina lyangu, anebo mpoondi pali mbabo.”

Cikoshanyo ca musebenshi utakwe kulekelela mubye

²¹ Mpomunyaawo Pita wakesa mukwiipusha Jesu ayi, “Nkambo, mukwesu na wambishisha, inga ndamulekelela mankanda ongaye? Sa ngamankanda osanwe aobilo?”

²² Jesu wakamukumbula ayi, “Tau, teshi mankanda osanwe aobilo, sombi mankanda makumi osanwe aobilo kufushikwa mankanda osanwe aobilo.

²³ “Ono Bweene bwa kwiculu bulikoshenye amwaami wakeeta basebenshi bakwe ayi bamubosheshe nkongole.

²⁴ Ndyaakatalikabo kubasesa, umwi uyo wakakweleta maali aanji bakamutola kumwaami.

²⁵ Ceebo taakalinga kucikonsha kuboosha nkongole, mwaami wakwe wakaamba ayi, musebenshi uyu ulyeelete kuulishikwa abakaakwe abana bakwe alimwi ashintu shoonse nshaacite kwaamba ayi nkongole iboole.

²⁶ Mpomunyaawo musebenshi uyo wakafukama kumwaami wakwe, akumusenga ayi, ‘Amunindileeko, ndaakumuboosesha nkongole yoonse.’

²⁷ Lyalo mwaami wakwe wakamunyumfwila nkumbu, mpeeke wakamulekelela nkongole yoonse akumwaambila ayi anooya.

²⁸ “Sombi musebenshi uyo ndyaakaswa pansengwe, wakakumanya musebenshinyina ngwaakakweletesha maali aniinibo. Wakamucata, wamushina panshingo akumwaambila ayi, ‘Lipila maali ngowakakweleta!’

²⁹ Ndyaakanyumfwa boobo, musebenshinyina wakafukama akumusenga ayi, ‘Nindileko, ndaakukubooshesha!’

³⁰ Sombi lakwe wakakaka kumulekelela. Wakamwaangisha ayi kushikila akalipile nkongole.

³¹ “Ono basebenshinyina bamwi ndibakabona cakacitika, bakakankamana akuba ansooni. Lyalo bakaya mukulwiita mwaami wabo makani aya.

³² Mpomunyaawo mwaami wakwe wakeeta musebenshi uyo akumwaambila ayi, ‘Webo omusebenshi mubiibi! Nebo ndakakulekelela nkongole yoonse ilya ceebo wakansenga.

³³ Sa webo tewalinga kweelete kunyumfwila nkumbu musebenshinyoko bweenka mbondakakunyumfwila nebo?’

³⁴ Mukucisa moyo mwaami uyo wakamutumya kubashilikaani kwaamba ayi bamwaange aane kushikila akabooshe nkongole yoonse ilya.

³⁵ Mboboobo, abalo baTa bali kwiculu mbweshi bakacite kumuntu womwi awomwi wa mulikoto lyanu, utalekeleli mukwabo amoyo woonse.”