Mateyo 16 - Baibo Busansulushi Bwa Libuku Ili

BaFalisi mbobakasenga citondesho ca kuswa kwiculu

¹ BaFalisi abaSaduki bamwi bakaya kuli Jesu mukumusunka. Bakamusenga ayi ababoneshe citondesho cakuswa kwiculu, kwaamba ayi bashome ayi Lesa ngowakamutuma.

² Sombi Jesu wakabakumbula ayi, “Na lisuba lyepila, mwebo mulaamba ayi, ‘Bulaakuca kabotu ciilo ceebo kwiculu kwasalala.’

³ Alyalo macuunsa mulaamba ayi, ‘Sunu mfula itooloka mukwiinga kuli makumbi ashiya.’ Mulishi kusansulula mbokuboneka kwiculu, sombi mulaalilwa kusansulula shitondesho sha shintu isho shitoocitika.

⁴ Bantu ba cecino ciindi, bamucita shibi, batashomeki kuli Lesa balisuni citondesho. Ono taaku nceshi batondeshekwe, sombibo citondesho cakwe Jona.” Lyalo wakabashiya waswaawo.

Cimena ca baFalisi abaSaduki

⁵ Ono bashikwiiya bakwe ndibakasubukila kwitala lya lweenge, bakalubaako kuyumuna shinkwa.

⁶ Jesu wakabaambila ayi, “Amucenjele acimena ca baFalisi abaSaduki.”

⁷ Mpomunyaawo bashikwiiya bakatalika kwaamba ayi, “Ncaambila boobo ceebo tatukwe kuyumuna shinkwa.”

⁸ Sombi Jesu wakeshiba ncebakalinga kwaamba, peenka wakabeepusha ayi, “Ceebonshi mutokwaamba pacikani cakubula shinkwa? Kuceya lushomo ndomucite mwebo nobantu!

⁹ Sa abobulya tamunyumfwishi? Sa tamwiibaluki ndindakakomoona shinkwa wosanwe ayi bantu bali shuulu shosanwe balye? Ino mwakesusha tutundu tongaye twa shinkwa ngobakashiyaako?

¹⁰ Nabi mushinkwa wosanwe awobilo ngundakapa bantu bali shuulu shone, mwakesusha tutundu tongaye twa sheesho nshebakashiyaako?

¹¹ Ino tamuna kwishibilanshi ayi nshindalinga kumwaambila cikani ca shinkwa? Amucenjele acimena ca baFalisi abaSaduki!”

¹² Lyalo bashikwiiya bakwe bakanyumfwisha ayi taakalinga kubaambila kucenjela kucimena cakuseenkanya mushinkwa, sombi kwiisha kwa baFalisi abaSaduki.

Pita mbwaakabanda Jesu ayi ngoUsalitwe wakwe Lesa

¹³ Ono Jesu ndyaakashika kucishi ca kuSisaliya Filipi, wakeepusha bashikwiiya bakwe ayi, “Ino bantu balaamba ayi nebo ne MwanaaMuntu ndime ni?”

¹⁴ Balo bakakumbula ayi, “Bamwi balaamba ayi ndimwe baJoni Mubombeki, bamwi ayi ndimwe baElija abalo bamwi ayi ndimwe baJelemiya nabi womwi wa balaluki bakulukulu.”

¹⁵ Mpomunyaawo Jesu wakabeepusha ayi, “Ino mwebo mulaamba ayi ndime ni?”

¹⁶ Simoni Pita wakakumbula ayi, “Ndimwe Usalitwe ulya, Mwanaakwe Lesa muumi.”

¹⁷ Mpeeke Jesu wakamukumbula ayi, “Ulicite coolwe Simoni omwanaakwe Jona! Teshi muntu wakuyubulwiita ceeci, sombi mbaTa ba kwiculu.

¹⁸ Ono ntookwaambila ayi ndiwe Pita, aboobo pamwaandami uyu mpweshi nkayakile coonde cangu alimwi nkusu sha lufu teshi shikacikomeewo nalilaampi.

¹⁹ Ndaakukupa shakucalwisha kuBweene bwa kwiculu, aceeco coonse nceshi ukaange pacishi ca panshi, cilaakwaangwa akwiculu, aceeco coonse nceshi ukaangulule pacishi ca panshi, akwiculu koonse cilaakwaangululwa.”

²⁰ Kuswawaawo Jesu wakaambila bashikwiiya bakwe ayi batakaambili muntu nabi womwi ayi ngoUsalitwe wakwe Lesa.

Jesu mbwaakashimika shakupenshekwa asha lufu lwakwe

²¹ Kuswa ceeco ciindi Jesu wakatalika kusansulwita bashikwiiya bakwe ayi, “Ndyeelete kuya kuJelusalemu nkweshi nkaye mukupenshekwa abuumbi abamaloba, bamatanjilili ba bapailishi abafundishi ba Milawo. Ndaakucaikwa, sombi pabushiku bwatatu, ndaakubushikwa.”

²² Ndyaakanyumfwa boobo Pita, wakatola Jesu kulubasu akutalika kumukalalila. Wakamwaambila ayi, “Tau Nkambo! Ici tacikoonshi kumucitikila napaceyuubo!”

²³ Mpeeke Jesu wakapiluluka akwaambila Pita ayi, “Koya kulaale, webo Satana! Webo uli mfumpu kuli ndime ceebo miyeeyo yako iyo taiswi kuli Lesa, sombi njabuntu.”

²⁴ Lyalo Jesu wakaambila bashikwiiya bakwe ayi, “Na muntu utooyanda kukonkela ndime, ulyeelete kushiya akusuula shintu shoonse shimusangalasha, wanyamuna mucilingano wakwe akunkonkela.

²⁵ Mukwiinga uyo woonse usuni kupulusha buumi bwa buntu, ulaakubusowa. Sombi uyo usowa buumi bwakwe ceebo ca ndime, ncakwiila ulaakubucana.

²⁶ Ino mbubotunshi buliimo, na muntu waba ashintu shoonse shili mucishi ca panshi, sombi buumi bwakwe bwancinencine wabusowa? Taamuuwo! Nciinshi muntu nceenga walipila kwaamba ayi acane buumi bwancinencine alimwi?

²⁷ Ceebo MwanaaMuntu ulaakwisa abaanjelo bakwe mubulemu bwa baIshi, lyalo ndyeshi akalambule muntu womwi awomwi kweelana amilimo yakwe.

²⁸ Ntoomwaambila calushinisho ayi, mpobali bamwi peenka pano beshi bakabule kufwa, kabatana kubona MwanaaMuntu keesa muBwaami bwakwe.”