Mateyo 15 - Baibo Busansulushi Bwa Libuku Ili

Kwiisha kwa bakulukulu

¹ Mpomunyaawo baFalisi abafundishi ba Milawo bamwi bakaswa kuJelusalemu, bakaya kuli Jesu mukwiipusha ayi,

² “Ceebonshi bashikwiiya bako tabakonkeli kwiisha kwa bakulukulu? Ino tabasambilinshi kumaansa pakulya kweelana amulawo wa ciJuda?”

³ Jesu wakabakumbula ayi, “Ino mwebo nceebonshi ncemushiila mulawo wakwe Lesa akukonkela kwiisha kwa bakulukulu?

⁴ Mukwiinga Lesa wakaamba ayi, ‘Lemeka baiso abanyoko,’ alimwi ayi, ‘Uyo woonse unyansha baishi nabi banyina, ncakwiila ulyeelete kucaikwa.’

⁵ Sombi mwebo mulaamba ayi na muntu waambila baishi nabi banyina ayi, ‘Lucafwo loonse ndondalinga kweelete kumupa, ndapa kuli Lesa,’ taaelete kulemeka baishi alucafwo ulo.

⁶ Mukucita boobo, mulaubya maswi akwe Lesa ceebo ca milawo yanu ya bakulukulu.

⁷ Mwebo nobantu nomwaamba nshemutaciti! Anu Isaya wakaamba kabotu ndyaakalaluka shapali ndimwe ayi,

⁸ ‘Aba bantu balandemekabo pamulomo sombi myoyo yabo ili kulaale anebo.

⁹ Kupaila nkobampaila, taaku mbokubete mukwiinga baleeisha milawo ipangabo bantu anga njemilawo yakwe Lesa!’ ”

Shintu shibisha muntu

¹⁰ Jesu wakeeta bantu baanji baanji balya akubaambila ayi, “Amukutike alimwi munyumfwishishe!

¹¹ Teshi ceeco cintu cinjila mulifumo lya muntu cimubisha, sombi nceeco ciswa mukanwa.”

¹² Lyalo bashikwiiya bakwe bakesa mukumwiipusha ayi, “Sa mulishi kwaamba ayi baFalisi tabakwe kukondwa ndibanyumfwa maswi anu?”

¹³ Jesu wakakumbula ayi, “Mbewu ili yoonse njebatakwe kushanga baTa bali kwiculu ilaakutumunwa.

¹⁴ Mutalisukami ambabo, mbamatanjilili boofu. Aboobo na moofu watanjilila moofunyina, boonse bobilo balawita mucilindi.”

¹⁵ Sombi Pita wakaamba ayi, “Amutusansulwite cikoshanyo ici.”

¹⁶ Mpeeke Jesu wakabeepusha ayi, “Anu amwebo abobulya tamunyumfwishi?

¹⁷ Sa tamwishi kwaamba ayi, cintu coonse cinjila mukanwa lya muntu cileendilila kuya mumala alimwi cilaswa?

¹⁸ Sombi shintu shiswa mumulomo wa muntu, mukwiinga shilaswa mumoyo, nsheshimubisha.

¹⁹ Mukwiinga mumoyo momuswa miyeeyo ibiibi, ya bucayi, bulale, bufuule, bwiipi, bukamboni bwakubeca alimwi abufuyishi.

²⁰ Ishi nsheshintu shibisha muntu, sombi kulya kaatakwe kusamba kumaansa takubishi muntu.”

Lushomo lwa mwanakashi

²¹ Lyalo Jesu ndyaakaswaako uko, wakaya kucishi ca mandabala anene aTaya aSidoni.

²² Mpeeke kwakesa mwanakashi kuli Jesu wa kuKenani uyo wakalinga kwikala kweenka uko. Wakoolobesha ayi, “Amunyumfwileeko nkumbu Nkambo, nobana bakwe Defedi! Mwanaangu mwanakashi ulicite bashikaswa.”

²³ Sombi Jesu taakwe kumukumbulaawo nabi liswi lyomwi. Lyalo bashikwiiya bakwe bakaya kuli Jesu akumusenga ayi, “Amwaambile mwanakashi uyu anooya, mukwiinga utootukonkela akutuyobekela!”

²⁴ Mpomunyaawo Jesu wakakumbula ayi, “Ndakatumwabo kumbelele shisowekete sha mushobo wa bene Isilaeli.”

²⁵ Lyalo mwanakashi wakesa mukufukama kunembo lyakwe akwaamba ayi, “Nkambo, amuncaafwe!”

²⁶ Mpomunyaawo Jesu wakakumbula ayi, “Teshi cibotu kunyaya baana cakulya akupa bakabwa.”

²⁷ Alakwe mwanakashi wakakumbula ayi, “Mbocibete Nkambo, sombi abalo bakabwa balabweselela shakulya shilokeela pakulya mwine ŋanda.”

²⁸ Lyalo Jesu wakakumbula ayi, “Nankashi, lushomo lwako ndunene abuumbi! Acicitike kweelana akuyanda kwako.” Paciindi ceenka ico mwanaakwe mwanakashi wakaba kabotu.

Jesu mbwaakashilika bantu baanji

²⁹ Jesu wakaswaako uko akwiinda muloombe lwa Lweenge lwa Galili. Mpomunyaawo wakatanta pakalundu akwikala peenka apo.

³⁰ Mpeeke bantu baanji baanji bakaya kuli Jesu bakatola bantu balema myeendo, boofu, balema bamwi, bacibuulu alimwi abamwi balwashi baanji. Bakabooneka kunembo lyakwe Jesu, peenka wakabashilika.

³¹ Bantu boonse bakakankamana ndibakabona bacibuulu kabaamba, balema kababa kabotu, balema myeendo kabeenda alimwi aboofu kababona. Lyalo bakalumbaisha Lesa wa bene Isilaeli.

Jesu mbwaakapa cakulya shuulu shone sha bantu

³² Jesu wakabunganya bashikwiiya bakwe akubaambila ayi, “Ndanyumfwila nkumbu bantu aba mukwiinga bekala nshiku shotatwe anebo alimwi bulya tabacite acakulya. Nshisuni kubaambila ayi baye mwabo mwabo kabatana kulya mukwiinga inga kabaya ciwisuka munshila.”

³³ Bashikwiiya bakwe bakamwiipusha ayi, “Ino tutooshicana kuli shakulya shakwaamba ayi tupe bantu baanji bobulya muno muluyanga?”

³⁴ Jesu wakabeepusha ayi, “Ino mulicite shinkwa wongaye?” Abalo bakakumbula ayi, “Tulicite shinkwa wosanwe awobilo alimwi atuswi tuniinibo.”

³⁵ Mpomunyaawo Jesu wakaambila bantu ayi bekale panshi.

³⁶ Lyalo wakabwesa shinkwa wosanwe awobilo uyo alimwi atuswi, ndyaakamana kulumba Lesa, wakakomoona shinkwa akupa bashikwiiya bakwe ayi baabile bantu. Abalo bashikwiiya bakwe bakabaabila.

³⁷ Mpeeke boonse bantu bakalya akukuta. Lyalo bashikwiiya bakesusha tutundu tosanwe atobilo twa sheesho nshebakashiyaako bantu.

³⁸ Bantu bakalya bakalinga shuulu shone, kutabelengelako banakashi abaana.

³⁹ Lyalo Jesu wakaambila bantu ayi banooya kumaanda abo, lakwe wakenjila mubwaato akuya kucishi ca kuMagadani.