Mateyo 14 - Baibo Busansulushi Bwa Libuku Ili

Lufu lwakwe Joni Mubombeki

¹ Ciindi ico, mwaami Elodi wa kuGalili wakanyumfwa mpuwo yakwe Jesu.

² Mpomunyaawo wakaambila bantu bakwe bacinenenene ayi, “Uyu nguJoni Mubombeki wabuka kuswa kubafu! Nceceeco ncaakonshela kucita shaankamiko ishi.”

³ Ceebo pesule Joni Mubombeki kaatana kufwa, Elodi wakatuma bashilumamba ayi baange Joni akumubika muntolongo. Wakacita shoonse ishi ceebo cakwe Elodyasi muka Filipo, mukwabo.

⁴ Mukwiinga Joni wakalinga kwaambila Elodi ayi, “Mulawo tausuminishi ayi webo umweebe.”

⁵ Elodi wakalinga kusuni kucaya Joni, sombi wakalinga kuloonda bantu ceebo bakalinga kwaamba ayi Joni ngumulaluki.

⁶ Ono bumwi bushiku, ndibakalinga kusekelela bushiku bwa kushalwa kwakwe Elodi, mwanaakwe Elodyasi mwanakashi wakashana cakakonda Elodi abaabo bakalingaawo.

⁷ Lyalo Elodi wakaambila mulindu uyo ayi, “Ndalumbila, ntookupa cili coonse nceshi unseenge!”

⁸ Ono banyina ndibakamulwiita ncaaelete kusenga, wakaamba ayi, “Amumpe pano peenka mutwi wakwe Joni Mubombeki mumbale iselebete.”

⁹ Mpomunyaawo mwaami Elodi wakacatwa buumba, sombi ceebo cakulumbila nkwakalumbila pameenso abaabo boonse bakalingaawo, wakaambila bantu ayi mulindu uyu apekwe ncaasenga.

¹⁰ Mpeeke wakatuma shilumamba kuya mukutimbula Joni mutwi muntolongo.

¹¹ Lyalo mutwi wakwe bakooletela mumbale iselebete akupa mulindu uyo, alakwe wakootola kuli banyina.

¹² Ono bashikwiiya bakwe Joni Mubombeki bakesa mukubwesa mutuntu, baya bafukila. Kuswawaawo bakaya mukulwiita Jesu.

Jesu mbwaakapa cakulya bantu bali shuulu shosanwe

¹³ Jesu ndyaakanyumfwa makani aya, wakenjila mubwaato akuswaako uko. Wakaya kumusena umwi eenkabo kwatakalinga kwikala bantu. Ono bantu baanji ndibakanyumfwa ayi Jesu waya, bakeenda kwitala kuswa mumandabalaabo bamukonkela.

¹⁴ Jesu ndyaakasubuka, wakabona bantu baanji baanji kababungene. Lyalo wakabanyumfwila nkumbu akushilika balwashi mbobakalingaabo.

¹⁵ Ndilyakookama lisuba, bashikwiiya bakwe bakesa kuli Jesu akumwaambila ayi, “Amubone, kuno nkuluundu alimwi lisuba lyepila kale. Amubaambile bantu baye mumishi mukuula cakulya cakwaamba ayi balye.”

¹⁶ Jesu wakabakumbula ayi, “Tabeelete kuya. Mwebo nweenka amubape cakulya.”

¹⁷ Abalo bakakumbula ayi, “Swebo tulicitebo shinkwa wosanwe atuswi tobilo.”

¹⁸ Mpomunyaawo Jesu wakabaambila ayi, “Amushilete kokuno.”

¹⁹ Lyalo Jesu wakaambila bantu ayi bekale panshi pabwiisu. Wakabwesa shinkwa wosanwe alimwi atuswi tobilo, walanga kwiculu akulumba Lesa. Ndyaakamanisha wakakomoona shinkwa akupa bashikwiiya bakwe abalo bakaabila bantu.

²⁰ Mpeeke bantu boonse bakalya akukuta. Mpomunyaawo bashikwiiya bakesusha tutundu likumi atobilo twa sheesho shakacaalaako.

²¹ Ono bantu bakalyaako mpashi bakalinga shuulu shosanwe, kutabelengelako banakashi abanike.

Jesu mbwaakeenda pamaanshi

²² Mpomunyaawo Jesu wakaambila bashikwiiya bakwe ayi benjile mubwaato, batanjile kuya kwitala lya lweenge, lakwe kaacaambila bantu ayi baye kumishaabo.

²³ Ndyaakamana kubalasha bantu balya, lyalo ndipakashiyashiya, wakatanta pakalundu mukupaila, wakalingakobo eenka.

²⁴ Paciindi ici bwaato bwakalinga kutene pakati ka lweenge, kabutolaanishikwabo amaaba ceebo kwakalinga cipuupu.

²⁵ Ingayi kumuyamaca Jesu wakesa kubashikwiiya bakwe kaaenda pamaanshi.

²⁶ Sombi bashikwiiya ndibakamubona kaaenda pamaanshi, bakaloonda abuumbi akooloma bakaamba ayi, “Ncipuku!”

²⁷ Sombi paciindi ceenka ico Jesu wakabaambila ayi, “Amukalike myoyo! Mutaloondi, ndime.”

²⁸ Mpomunyaawo Pita wakaamba ayi, “Nkambo, na ncakwiila ndimwe, amuŋambile ayi nse kuli ndimwe keensa ceenda pamaanshi.”

²⁹ Alakwe Jesu wakamwaambila ayi, “Kosa!” Mpeeke Pita wakaswa mubwaato akutalika kweenda pamaanshi kuya kuli Jesu.

³⁰ Ono ndyaakabona maaba wakaloonda, lyalo wakatalika kuya bupila. Wakoolobesha ayi, “Nkambo amumpulushe!”

³¹ Mpomunyaawo Jesu wakamucata akumwaambila ayi, “Nciinshi ncewatonshesha? Kuceya lushomo ndoocite webo omuntu!”

³² Ndibakenjila mubwaato, acalo cipuupu cakoomuna.

³³ Lyalo bashikwiiya boonse bakalinga mubwaato bakamulambila akwaamba ayi, “Ncakwiila muli bana bakwe Lesa!”

Jesu mbwaakashilika balwashi kuGenesaleti

³⁴ Lyalo ndibakasubuka lweenge, bakashika mucishi ca Genesaleti.

³⁵ Mpeeke bantu ba kumusena uyo ndibakeshiba ayi nguJesu, bakatuma nkombe kumisena yoonse yakalinga kushingulukite. Mpomunyaawo bakaleta balwashi kuli Jesu,

³⁶ akumusenga ayi asuminishe balwashi kukumyabo cakufwala cakwe. Lyalo boonse bakakumyaako, bakaba kabotu.