Mateyo 12 - Baibo Busansulushi Bwa Libuku Ili

Mwiipusho wa pabushiku bwakookesha bwa Cibelu

¹ Kuswawaawo pabushiku bwakookesha bwa Cibelu, Jesu wakeenda mumyuunda ya witi. Mpeeke bashikwiiya bakwe bakanyumfwa nsala akutalika kuyapa mitwi ya witi kabalya.

² Lyalo baFalisi ndibakabona boobo, bakaambila Jesu ayi, “Bona, bashikwiiya bako batoocita cintu citasuminishikwi aMilawo pabushiku bwakookesha bwa Cibelu.”

³ Jesu wakabakumbula ayi, “Sa tamuna kubelengaawo cakacita Defedi ciindi lakwe ababye ndibakanyumfwa nsala?

⁴ Wakenjila muŊanda yakwe Lesa, lakwe ababye bakalya cimaande cakasalashikwa, nabi tecakalinga kusuminishitwe muMilawo. Cimaande ico cakalinga kulyabo bapailishi.

⁵ Nabi tamuna kubelengaamo muMilawo yakwe Mose, ayi pabushiku bwakookesha lyoonse bapailishi balautyola mulawo wa bushiku bwakookesha muŊanda yakwe Lesa, sombi tabakwe kupekwa mulandu.

⁶ Sombi pano mpaali wiinda Ŋanda yakwe Lesa.

⁷ Nemwalinga kwishi maswi akwe Lesa akwaamba ayi, ‘Ndisunishi nkumbu, kuteshi milambu,’ naakwiinga tamukwe kubekesha bantu batacite mulandu.

⁸ Ceebo MwanaaMuntu ngoMwaami wa bushiku bwakookesha bwa Cibelu.”

Jesu mbwaakashilika muntu wakalinga kuyuminite lyaansa

⁹ Jesu wakaswaako uko akuya mukwinjila mucoonde ca baJuda.

¹⁰ Peenka mucoonde umo mwakalinga musankwa wakalinga kuyuminite lyaansa. Mpeeke bantu bamwi bakalingaawo bakalinga kusuni kucana cilubo muli Jesu, lyalo bakamwiipusha ayi, “Sa cilasuminishikwa kushilika muntu pabushiku bwakookesha bwa Cibelu?”

¹¹ Lyalo Jesu wakabakumbula ayi, “Ino na umwi mulikoto lyanu kaacite mbelele yomwibo, ono yakulukila mucilindi pabushiku bwa kookesha bwa Cibelu, sa inga taisubuli?

¹² Muntu ulayandika abuumbi kwiinda mbelele. Aboobo Milawo ilatusuminisha kucita ciluleme pabushiku bwakookesha bwa Cibelu.”

¹³ Mpomunyaawo Jesu wakaambila muntu uyuminite lyaansa ayi, “Fungulula lyaansa lyako.” Mpeeke wakalifungulula, lyalo lyakaba kabotu bweenka mbuli libye.

¹⁴ Sombi baFalisi bakaswaawo, baya balifuyafuya ayi bacane nshila yakucailamo Jesu.

Musebenshi Usalitwe wakwe Lesa

¹⁵ Ono Jesu ndyaakeshiba miyeeyo yabo, wakaswaako uko. Mpomunyaawo bantu baanji baanji bakamukonkela, lyalo wakashilika baabo boonse bakalinga kuciswa.

¹⁶ Sombi wakabakonkomesha ayi batalwiiti nabi womwi kwaamba ayi ngani.

¹⁷ Wakacita kweelana ambwaakaamba Isaya mulaluki mukulukulu ayi,

¹⁸ “Uyu ngomusebenshi wangu uyo ngondakasala, uyo ngoonsuni alimwi muli nguwe ndakondwa. Ndaakumupa Mushimu wangu, alimwi ulaakwaambilisha kubaswamashi bakunsengwe ayi Lesa uliluleme.

¹⁹ Teshi akapikishe nabi koolobesha, nabi kuya bwaambilisha mumashila.

²⁰ Teshi akatyole litete lisendeme kale, nabi kushimya lilampi litooyanda kushimika. Ulaakufwita nkumbu bantu kushikila bululami bwakwe bukakome.

²¹ Muli nguwe baswamashi boonse bakunsengwe mweshi bakabe akulangila.”

Jesu aBilusebulu

²² Mpomunyaawo bantu bamwi bakaleta musankwa moofu wakalinga kutaamba kuli Jesu ceebo wakalinga kucite shikaswa. Peenka wakamushilika, aboobo wakatalika kwaamba akubona.

²³ Lyalo bantu boonse bakakankamana akwaamba ayi, “Sa uyu inga waba mwanaakwe Defedi?”

²⁴ Sombi baFalisi ndibakanyumfwa makani aya, bakaamba ayi, “Taaku umbi, nguBilusebulu mwaami wa bashikaswa umupa nkusu shakubakusha.”

²⁵ Jesu wakalinga kwishi miyeeyo yabo, lyalo wakabaambila ayi, “Buleelo boonse bweenga bwabukilana akutalika kulwana, buleelo ubo bulamwaika. Na bantu ba mundabala nabi muŋanda yomwi babukilana, ndabala nabi ŋanda iyo ilawa.

²⁶ Ono na Satana wakusha Satananyina, nkokwaamba ayi Satana walibukila, ino buleelo bwakwe inga bwayuma buyani?

²⁷ Ono na nebo ndakusha bashikaswa munkusu shakwe Bilusebulu, ino abo bakonkela ndimwe balabakusha munkusu shakwe ni? Paceebo ceeco, balaakumushinina akutondesha ayi mulilubite.

²⁸ Teshi Bilusebulu, sombi nguMushimu Usalashi wakwe Lesa uyo umpa nkusu shakukusha bashikaswa. Nkokwaamba ayi Bweene bwakwe Lesa bwesa kuli ndimwe.

²⁹ “Taaku weenga wapwaya ŋanda ya muntu shinkusu akwiipa shintu shakwe, sombibo na wamwaanga, lyalo ncalushinisho inga weepa sha muŋanda ya muntu uyo.

³⁰ “Uyo woonse utabete kulubasu lwangu, ngumulwani wangu, alimwi awooyo utooboli pantu pomwi anebo ulapalanganya.

³¹ Paceebo ceeco, ntoomulwiita calushinisho ayi Lesa ulaakulekelela muntu cibiibi cili coonse nabi mucobwe uli woonse ngweenga wacita. Sombi uyo woonse weenga wacobola Mushimu Usalashi teshi akalekelelwe.

³² Uyo woonse waamba maswi abiibi kuMwanaaMuntu inga walekelelwa. Sombi uyo woonse ucobola Mushimu Usalashi teshi akalekelelwe, bulya nabi ciindi citoosa.”

Cisamu ashisepo sha ncico

³³ “Ono kwaamba ayi mube ashisepo shibotu, mulyeelete kuba acisamu cibotu. Na mulicite cisamu cibiibi, mulaakuba ashisepo shibiibi. Ceebo cisamu cili coonse cileshibilwa kushisepo sha ncico.

³⁴ Mwebo nobana bansoka! Ino inga mwaamba buyani shintu shibotu mwebo nobeene kamuli babiibi? Mukwiinga muntu ulaamba ciswite mumoyo wakwe.

³⁵ Muntu uli kabotu ulaamba shintu shibotu isho shili mumoyo wakwe, alakwe muntu mubiibi ulaamba shibiibi shili mumoyo wakwe.

³⁶ “Ntoomwaambila ayi pabushiku bwakoomboloshekwa, Lesa ulaakupa mulandu bantu ceebo ca maswi oonse abiibi ngobakaamba.

³⁷ Mukwiinga muntu ulaakupekwa nabi kutapekwa mulandu kwiinda mukwaamba kwakwe.”

Bantu mbobakayanda citondesho

³⁸ Lyalo bamwi bafundishi ba Milawo abaFalisi bakaambila Jesu ayi, “NoBafundishi, tulisuni ayi mutucitile citondesho cakuswa kwiculu.”

³⁹ Sombi lakwe wakabakumbula ayi, “Bantu ba cecino ciindi, bamucita shibi, batashomeki kuli Lesa balisuni kubona citondesho. Ono taaku nceshi batondeshekwe, sombibo citondesho cakwe Jona mulaluki mukulukulu.

⁴⁰ Ceebo bweenka mbuli Jona mbwaakalinga mulifumo lya nswi inene inshiku shotatwe, alakwe MwanaaMuntu ulaakwikala nshiku shotatwe mucuumbwe.

⁴¹ Pabushiku bwakoomboloshekwa, bene Ninife balaakumushinina, ceebo balo bakasanduka kuswa kushibiibi shabo ndyaakabashimikila Jona. Sombi pano mpwaali wiinda Jona!

⁴² Pabushiku bwakoomboloshekwa, mwaami mwanakashi wa kumalenge ulaakumushinina ceebo wakaswa kweela cishi kwisa mukunyumfwa busongo bwakwe Solomoni. Sombi pano mpwaali wiinda Solomoni!

Shikaswa mbwaaboolela mumuntu

⁴³ “Na shikaswa waswa mumuntu, ulaya bweenda muluundu kuyandoola kwakookeshesha. Na kwabula kucanika

⁴⁴ ulaamba ayi, ‘Ntooboolela mumuntu wangu mondakaswa.’ Ono na waboola ulacana taamu ciliimo, muntu uyo ulibo kabotu.

⁴⁵ Lyalo ulaya mukuletelaawo abamwi bali bosanwe abobilo babiibi kwiinda pali nguwe. Mpeeke balenjila akwikala mumuntu uyo. Aboobo bwikaalo bwa muntu uyo bulabica kwiinda bwakutaanguna. Mbweshi cikabe akubantu babiibi ba cecino ciindi.”

Banyina abamakwabo Jesu

⁴⁶ Jesu ndyaakalinga kucaamba kubantu baanji, kwakesa banyina abamakwabo, bakeemikana pansengwe, kabasuni kwaamba akwe.

⁴⁷ Lyalo umwi muntu wakaambila Jesu ayi, “Banyinawanu abamakwabanu baliimfwi pansengwe, batooyanda kwaamba amwebo.”

⁴⁸ Sombi lakwe wakamukumbula ayi, “Anu bama mbaani? Abamakwesu mbaani?”

⁴⁹ Mpeeke wakatondeka kwakalinga kushiite bashikwiiya bakwe akwaamba ayi, “Aba mbobama alimwi mbobamakwesu!

⁵⁰ Mukwiinga uyo woonse ucita buyanda baTa bali kwiculu ngunandumi yangu, ngunankashi yangu alimwi mbobama.”