Mateyo 11 - Baibo Busansulushi Bwa Libuku Ili

Joni Mubombeki wakatuma bashikwiiya bakwe kuli Jesu

¹ Jesu ndyaakamana kwiisha bashikwiiya bakwe bali likumi abobilo, wakaswaako uko akuya bwiisha akushimikila mumandabala.

² Ono Joni Mubombeki ndyaakalinga muntolongo, wakanyumfwa shamilimo yakwe Klistu, wakatuma bashikwiiya bakwe bamwi kuli Jesu

³ mukwiipusha ayi, “Sa ndimwe baabo mbwaakaamba Joni ayi balaakwisa nabi tunoocilangila umwi?”

⁴ Jesu wakabakumbula ayi, “Kamuya mukalwiite Joni isho nshemwanyumfwa akubona,

⁵ boofu batoolasha, balema myeendo batokweenda, beshimanata batooba kabotu, bashinkite matwi batoonyumfwa, bafu batoobushikwa alimwi bakandu batooshimikilwa Makani Abotu.

⁶ Ulicite coolwe muntu uyo utatonshi muli ndime.”

⁷ Ono bashikwiiya bakwe Joni ndibakaya, Jesu wakatalika kwaambila bantu baanji baanji bakalingaawo shakwe Joni Mubombeki ayi, “Ndimwakaya muluyanga mwakaya mukubonanshi? Sa mwakaya mukubona litete lyakalinga kutenkaana kumuuwo?

⁸ Ino nciinshi ncemwakaya mukubona? Sa ngumuntu wakalinga kufwete shakufwala shibotu? Tau, bafwala shakufwala shibotu balekala mumaanda a bamaami.

⁹ Amundwiite, nciinshi ncemwakaya mukubona? Sa ngumulaluki? Ee, ntoomulwiita calushinisho ayi ngumunene kwiinda pamulaluki.

¹⁰ Mukwiinga Joni ngowooyo wakaambwa muMalembo akwe Lesa ayi, ‘Ndaakutuma muntu wangu kunembo lyako eshi akakubambile nshila.’

¹¹ Ntoomwaambila calushinisho ayi Joni ngumunene kwiinda pabantu boonse kuswabo kale kale. Sombi uyo muniini muBweene bwa kwiculu ngumunene kwiinda nguwe.

¹² Kuswa kuciindi cakwe Joni Mubombeki, kushikila sunu, Bweene bwa kwiculu bwashika cankusu, abalo beshishitaala batokweelesha kubutola mushitaala.

¹³ Mukwiinga kwiisha kwa balaluki bakulukulu alimwi aMilawo yakwe Mose, shoonse shakalinga kwaamba paBweene kushikila Joni ndyaakesa.

¹⁴ Aboobo na kamusuni kushoma maswi abo, Joni ngoElija uyo wakaambwa ayi ulaakwisa.

¹⁵ Uyo ucite matwi anyumfwe!

¹⁶ “Anu bantu ba cecino ciindi inga ndabakoshanisha anshi? Bali anga mbanike bashiite pamushika kaboolobeshanya ayi,

¹⁷ ‘Twakamulishisha ngoma, sombi mwebo tamukwe kushana. Twakamwiimbila nyimbo sha buumba, sombi mwebo tamukwe kulila.’

¹⁸ Joni Mubombeki wakalinga kulikasha kulya alimwi taakalinga kunwa, sombi bantu bakaamba ayi, ‘Ulicite shikaswa.’

¹⁹ Ono MwanaaMuntu ndyaakesa kaalya akunwa, bantu bakaamba ayi, ‘Amubone ngumulyabi, ngucakolwa, ngushicibusa abeshikusonkesha alimwi abamucita shibi.’ Sombi busongo bwakwe Lesa bulaboneka ayi buliluleme kwiinda mumilimo ya mbubo.”

Mapensho kumandabala atakwe kushoma

²⁰ Mpomunyaawo Jesu wakatalika kukalalila bantu ba mumandabala umo mwaakacitila shaankamiko, mukwiinga tabakwe kusanduka kuswa kushibiibi.

²¹ Wakabaambila ayi, “Mapensho kuli ndimwe nomandabala a Kolasini aBetisaida, mukwiinga shaankamiko isho shakacitilwa muli ndimwe, neshakacitilwa muTaya aSidoni, mandabala anene a bantu bakunsengwe, naakwiinga bakasanduka kale kuswa kushibiibi akufwala masaka alimwi akulinanika milota, kutondesha ayi balyuungumene ceebo cakubisha.

²² Ntoomwaambila calushinisho ayi pabushiku bwakoomboloshekwa Lesa ulaakumupa mulandu unene kwiinda Taya aSidoni!

²³ Awebo Kapenaumu, sa utooyeeya ayi ulaakusumpwitwa kwiculu? Sobwe, ulaakuwaalwa panshi pamusena wa bafu! Mukwiinga shaankamiko isho naakwiinga shakacitilwa muSodoma, naakwiinga ndabala iyi keeciliiwo asunu.

²⁴ Sombi ntookulwiita ayi pabushiku bwa koomboloshekwa, Lesa ulaakumupa mulandu unene kwiinda Sodoma!”

Muli Jesu momuli kookesha

²⁵ Paciindi ceenka ico Jesu wakapaila ayi, “Ndamulumba Ta, noBaami ba kwiculu acishi ca panshi mukwiinga mwayubulwita bantu bateeite shintu nshemwakashisa kubantu basongo abeeite.

²⁶ Ncakwiila Ta, mwebo mwakacita kweelana akuyanda kwanu.

²⁷ “BaTa bakabika shintu shoonse mumaansaangu. Taaku muntu ushi Mwaana, sombi baTa beenka. Taaku muntu ushi baTa, sombi Mwaana eenka alimwi awooyo Mwaana ngwaasala ayi ayubulwite.

²⁸ “Amwise kuli ndime mwebo noonse nomushiite, nomwalemenwa, nebo ntoomupa kookesha.

²⁹ Amulipatike lijoko lyangu, mwiiye kuli ndime ceebo nebo ndimoote alimwi ndimubombu mumoyo. Paceebo ceeco, mulaakucana kookesha mumyoyo yanu.

³⁰ Mukwiinga lijoko lyangu ndyuubu alimwi amukuli wangu nguniini.”