Mateyo 1 - Baibo Busansulushi Bwa Libuku Ili

Bamashali bakulukulu bakwe Jesu Klistu

¹ Jesu Klistu wakashalwa mulunyungu lwakwe Defedi aAbulaamu.

² Abulaamu wakashala Isaki, Isaki wakashala Jakobo, alakwe Jakobo wakashala Juda abamakwabo bamwi boonse.

³ Juda wakashala Pelesi aSela muli Tama, Pelesi wakashala Esiloni, alakwe Esiloni wakashala Lamu.

⁴ Lamu wakashala Aminadabu, alakwe Aminadabu wakashala Nashoni, alakwe Nashoni wakashala Salumoni.

⁵ Salumoni wakashala Bowasi muli Laabu, Bowasi wakashala Obedi muli Lute, alakwe Obedi wakashala Jese.

⁶ Jese wakashala mwaami Defedi. Ono Defedi wakashala Solomoni muli muka Uliya.

⁷ Solomoni wakashala Leoboamu, Leoboamu wakashala Abija, alakwe Abija wakashala Asa.

⁸ Asa wakashala Jeoshafati, Jeoshafati wakashala Jolamu, alakwe Jolamu wakashala Usiya.

⁹ Usiya wakashala Jotamu, Jotamu wakashala Aasi, alakwe Aasi wakashala Esekiya.

¹⁰ Esekiya wakashala Manase, Manase wakashala Amoni, alakwe Amoni wakashala Josiya.

¹¹ Josiya wakashala Jekoniya abamakwabo bamwi muciindi bene Isilaeli ndibakalinga kutolwa kuBabiloni.

¹² Pesule lyakutolwa kuBabiloni, Jekoniya wakashala Shiyalutyelo, alakwe Shiyalutyelo wakashala Selubabelo.

¹³ Selubabelo wakashala Abyudi, Abyudi wakashala Eliyakimu, alakwe Eliyakimu wakashala Aso.

¹⁴ Aso wakashala Sadoki, Sadoki wakashala Akimu, alakwe Akimu wakashala Elyudi.

¹⁵ Elyudi wakashala Eliyasa, Eliyasa wakashala Matani, alakwe Matani wakashala Jakobo.

¹⁶ Jakobo wakashala Josefu muka Maliya, banyina Jesu wiitwa ayi Klistu.

¹⁷ Anu mashalane oonse kutalikila kuli Abulaamu kushikila kuli Defedi akalinga likumi aone. Akutalikila kuli Defedi kushikila kuciindi bene Isilaeli ndibakatolwa kuBabiloni, apalo pakalinga likumi aone. Akwalo kuswa kuciindi cakutolwa kuBabiloni kushikila kukushalwa kwa Usalitwe wakwe Lesa, apalo pakalinga mashalane likumi aone.

Kushalwa kwakwe Jesu Klistu

¹⁸ Ono mbulya mbwaakashalwa Jesu Klistu. Maliya banyina bakalinga kumamikitwe kuli Josefu, sombi kabatana kweebana, cakacanika ayi bakalinga pakati kwiinda munkusu sha Mushimu Usalashi.

¹⁹ Sombi Josefu ibaye, wakalinga musankwa ululeme alimwi taakalinga kusuni ayi amulenshe nsoni Maliya. Aboobo wakayeeya kumanisha cibusa cabo kumapela.

²⁰ Ndyaakalinga kuciyeeya cikani ici, munjelo wakwe Lesa wakaboneka kuli nguwe muciloto kaamba ayi, “Josefu, omwanaakwe Defedi, utaloondi kweeba Maliya, mukwiinga ulimitite lyankusu sha Mushimu Usalashi.

²¹ Ulaakushala mwaana musankwa, ukamutuumbe liina ayi Jesu, mukwiinga ngweshi akapulushe bantu bakwe kuswa kushibiibi shabo.”

²² Shoonse ishi shakacitika, ayi maswi akaamba Mwaami kwiinda mumulaluki mukulukulu abe alushinisho, akwaamba ayi,

²³ “Ncakwiila mwanakashi utana kukumanawo kale amusankwa ulaakumita, akushala mwaana musankwa eshi akanokwiitwa ayi Imanuweli,” (nkokwaamba ayi “Lesa uli aswebo.”)

²⁴ Josefu ndyaakapapuka wakacita bweenka mbwaakamwaambila munjelo wa Mwaami Lesa, akumweeba Maliya.

²⁵ Sombi taakwe kukumanaakwe pamubili kaacili pakati. Wakashala mwaana musankwa akumutumba ayi Jesu.