Matalikilo 8 - Baibo Busansulushi Bwa Libuku Ili

Kumana kwa muyoba

¹ Lesa taakalinga kumulubiteeko Nowa abanyama mbwaakalingaabo mubwaato. Aboobo wakalengesha muuwo kupuupa amaanshi kuya ciyuma.

² Tuntupu twa maanshi apanshi ashilyaango sha miyoba mwiculu shakacalwa. Mfuula yakacileka,

³ amaanshi akalinga kuya ciyuma paniininiini kwanshiku shili 150.

⁴ Pabushiku bwalikumi anshiiku shosanwe ashobilo bwa mweenshi wasanu ayobilo, bwaato bwakekala pacilundu ca Alalati.

⁵ Maanshi akatolelela kuya ciyuma lyalo pabushiku butaanshi bwa mweenshi walikumi nsonga sha tulundu shakaboneka.

⁶ Ndipakeenda nshiku makumi one Nowa wakacalula mbwelyo ya bwaato,

⁷ akutuma cikwangala. Cikwangala uyo taakwe kuboola sombi wakalinga kunoolelembabo mwiculu kushikila maanshi oonse ayuma.

⁸ Muciindi ceenka ico Nowa wakatuma mpolobe kwaamba ayi abone na ayuma,

⁹ sombi ceebo cakwaamba ayi maanshi akalinga kucilibo poonse poonse, mpolobe taikwe kucana pakwikala. Aboobo yakooluka kuboolela kubwaato, mpeeke Nowa wakakusha lyaansa akwiinjisha mubwaato.

¹⁰ Nowa wakalindila kwanshiku shili shosanwe ashobilo, mpeeke wakatuma mpolobe alimwi.

¹¹ Ndyeyakapiluka macolesha, yakaletelela aliteu lya olifi. Aboobo Nowa wakeshiba kwaamba ayi maanshi aceyaako.

¹² Lyalo wakalindilaako ashimwi nshiku shosanwe ashobilo akutuma mpolobe alimwi. Ono ulu lweendo, taikwe kupiluka.

¹³ Nowa ndyaakaba amyaaka ili 601, pabushiku butaanshi bwa mweenshi utaanshi, maanshi akayuminina. Mpomunyaawo Nowa wakacalula cisasa ca bwaato bunene ubo akubona ayi inshi itooya ciyuma.

¹⁴ Bushiku bwa makumi obilo ashosanwe alimwi ashobilo bwa mweenshi wabili, inshi yakamaninina kuyuma.

¹⁵ Mpeeke Lesa wakaambila Nowa ayi,

¹⁶ “Swa mubwaato amukaako alimwi abana bako basankwa abalo abamakaabo.

¹⁷ Kusha bayuni abanyama boonse kwaamba ayi bakashalane alimwi akumwaika koonse koonse pacishi ca panshi.”

¹⁸ Aboobo Nowa wakaswa mubwaato amukaakwe alimwi abana bakwe basankwa abalo abamakaabo.

¹⁹ Banyama boonse abayuni bakaswa mubwaato akuya mutukototukoto twa mishobo yabo.

Nowa mbwaakabenga mulambu kuMwaami Lesa

²⁰ Nowa wakayakila Mwaami Lesa cipaililo. Mpeeke pabanyama abayuni basalalite kweelana aMilawo, wakabwesa womwi womwi akubatenta pacipaililo bakabumbulu ayi ngumulambu kuli Lesa.

²¹ Bweema bwa mulambu bwakakondelesha Mwaami Lesa, lyalo wakalyaamboosha ayi, “Teshi nkashinganewo cishi ca panshi alimwi ceebo ca sheesho muntu nshaacita. Ndishi kwaamba ayi kuswabo kubwanike miyeeyo ya muntu njibiibi. Teshi nkanyonyoolewo shintu shiyoya shoonse mbuli mbondacita bulya.

²² Ono kulilabo cishi kaciciliiko, kunanooli ciindi ca kushanga akutebula. Kunanooli kutontola akulungula, cilimo amupewo, malumwi amashiku.”