Matalikilo 6 - Baibo Busansulushi Bwa Libuku Ili

Bantu mbobakenjila mububi

¹ Bantu ndibakafula akwikala mumisena ipusenepusene ya pacishi ca panshi, banakashi kabashalwa.

² Ono bana bakwe Lesa basankwa bakabona ayi banakashi abo mbabotu. Aboobo bakeeba baabo mbobakasala.

³ Lyalo Mwaami Lesa wakaamba ayi, “Mushimu wangu teshi ukapikishanye abantu lyoonse ceebo balafwa. Kuswa sunu teshi bakekale myaaka iinda 120.”

⁴ Munshiku isho akunembo, kwakalinga basankwa abanakashi bapolomene pacishi ca panshi abo bakashalwa kubanakashi bakeebwa kubana bakwe Lesa. Mbobaabo bakalinga kupukite kuciindi ca nkondo alimwi bakalinga nshenkalakata shiindaawo.

⁵ Ono Mwaami Lesa ndyaakabona mbuli womwi awomwi pacishi ca panshi mbwaakalinga mububi, akubica kwa miyeeyo yabo ciindi coonse,

⁶ wakafwa nsoni kwaamba ayi wakalenga bantu akubabika pacishi ca panshi. Mpeeke cakamucisa abuumbi kumoyo.

⁷ Aboobo wakaamba ayi, “Ntoonyonyoola bantu abo mbondakalenga, pantu pomwi abanyama, shilongolo shinene atuniini sheenda panshi shoonse alimwi abayuni bauluka, mukwiinga canensha nsoni kubalenga.”

⁸ Nakubi boobo Mwaami Lesa wakalinga kukondetwe abuumbi pali Nowa.

Shapali Nowa

⁹ Ici ncikani cakwe Nowa. Nowa wakalinga muntu ululeme pabantu bamuciindi cakwe, alimwi wakalinga kweenda mubushicibusa aLesa.

¹⁰ Nowa wakalinga kucite baana basankwa botatwe, shemu, Amu alimwi aJafeti.

¹¹ Ono bamucishi ca panshi bamwi boonse bakenjila mucibiibi pameenso akwe Lesa alimwi bakalinga kucayana abuumbi koonse koonse.

¹² Lesa wakabona cishi ca panshi mbocakalinga canjila mucibiibi mukwiinga bantu boonse bakalinga kucitabo shibiibi.

¹³ Lesa wakaambila Nowa ayi, “Ndayeeya kumanisha buumi bwa bantu boonse. Ntoobanyonyoola cakubamaninisha, ceebo cishi ca panshi cesulabo buumi bwabo bwabulwani.

¹⁴ Lipangile bwaato bunene kuswa kushisamu shibotu. Upange shipinda mukati akushishingula manenekela mukati apansengwe.

¹⁵ Upange bulaampa mamita ali 133, mubufwaafwi mamita ali 22, akuya mwiculu mamita ali 13.

¹⁶ Ubupangile ciluli akushiya musena wa masentimita ali 44 pakati ka ciluli alubasu lwa bwaato. Ubuyakile mindando yotatwe ya shipinda, umwi panshi, umwi pakati aumwi peculu, akubika mulyaango mulubasu.

¹⁷ Ndaakuleta muyoba pacishi ca panshi kwaamba ayi ukanyonyoole shintu shoonse shuumi. Shintu shoonse shiyoya sha pacishi ca panshi shilaakufwa.

¹⁸ Sombi ntoopanga cipangano awebo. Ukenjile mubwaato amukaako, bana bako abamakaabo,

¹⁹ Ukenjishe mucende ampwishi mumushobo womwi awomwi wa banyama, kwaamba ayi batakaloobi.

²⁰ Abalo bayuni bobilo bobilo mumushobo womwi awomwi, banyama bobilo bobilo banene abaniininiini balaakwisa kuli ndiwe ayi bataloobi.

²¹ Ukanyamune shakulya sha mushobo uli woonse shaako ashaabo.”

²² Nowa wakacita shoonse Lesa nshaakamwaambila.