Matalikilo 50 - Baibo Busansulushi Bwa Libuku Ili

¹ Josefu wakaliwaala pamubili pali baishi kaalila akufyonta ciwa cabo.

² Mpeeke Josefu wakaambila beshikushilika bakwe ayi babambe mubili kukasha kubola. Abalo beshikushilika bakacita bweenka ubo.

³ Nshila njibakacitilamo boobo yakatola nshiku makumi one. Ici nceciindi cakalinga kweelete kubamba mubili kukasha kubola. Bene Ijipiti bakamulila nshiku makumi osanwe aobilo.

⁴ Ciindi ca kulila ndicakeenda Josefu wakaambila bacinenenene ba mwaami ayi, “Amunyumfwileeko nkumbu. Amuye mundwiitileeko mwaami Falawo ayi,

⁵ ‘Bata ndibakalinga pafwaafwi kufwa, bakanengesha kubashomesha cakulumbila ayi ndaakubabika mucuumbwe ncebakabamba mucishi ca Kenani. Ono ndaseenga ayi bansuminishe nje nkabike bata, ndaakwisa alimwi.’ ”

⁶ Lyalo mwaami wakakumbula ayi, “Koya ukabike baiso kweelana ambowakashomesha ayi ulaakucita.”

⁷ Aboobo Josefu wakaya mukubika baishi. Bacinenenene ba mwaami boonse, bamatanjilili ba muŋanda yakwe alimwi ankumenkume shoonse sha muIjipiti, bakayaakwe.

⁸ Bamuŋanda yakwe, bamakwabo abaabo boonse bakacaala mumushi wa baishi, boonse bakaya aJosefu. Bakacaalabo muGosheni mbanike baniininiini, mpongo, mbelele alimwi aŋombe shabo.

⁹ Basankwa bamwi bakalinga mushikoci sha maaki alimwi abamwi pamaaki, abalo bakayaakwe. Lyakalinga likoto linene.

¹⁰ Ndyebakashika palubansa lwakulupwitaawo paAtadi kwicwe lya Joodani, bakalilisha kwa ciindi cilaamfu, alimwi Josefu wakaba acililo kwanshiku shosanwe ashobilo uko.

¹¹ Bene Kenani ndibakabona bantu abo kabalila paAtadi, bakaamba ayi, “Ma wakomena mubala wakulila uyo bene Ijipiti ngobacite!” Nceceeco musena uyo ncewakatumbilwa ayi Abelo Misileemu.

¹² Aboobo bana bakwe Jakobo bakacita bweenka mbwaakabaambila.

¹³ Bakanyamuna mubili wakwe, bautola kuKenani akuubika mucimfwengo ca Makipela, kwicwe lya Mamule, mumuunda Abulaamu ngwaakoola kuli Efuloni mwine Iti, kwaamba ayi abe maanda.

¹⁴ Josefu ndyaakamana kubika baishi wakaboolela kuIjipiti abamakwabo alimwi abaabo boonse mbwaakayaabo mukubika baishi.

Josefu mbwaakakalika myoyo bamakwabo

¹⁵ Ono ingayi baishiwabo bafwe, bamakwabo Josefu bakaamba ayi, “Ino na kakuli kwaamba ayi Josefu ucitucitile mfundilishi, alimwi na utoyeeya kutubooshesha cishole pabubi boonse mbotwakacita pali nguwe, inga twacita buyani?”

¹⁶ Mpeeke bakatuma nkombe kuli Josefu yakwaamba ayi, “Bata kabatana kufwa,

¹⁷ bakashiya maswi akwaamba ayi, ‘Ndaseenga ayi ulekelele bamakwanu shibiibi acilubo ncebakacita pali ndiwe.’ Ono twaseenga mutulekelele cilubo ncetwakacita swebo sobasebenshi bakwe Lesa wa baishiwanu.” Josefu wakalila ndyaakatambula nkombe iyi.

¹⁸ Lyalo bamakwabo bakesa palwaabo bene akukotamina Josefu akwaamba ayi, “Twalileta, tuli basha banu.”

¹⁹ Sombi Josefu wakabaambila ayi, “Mutaloondi, nebo nshikoonshi kulibika mumusena wakwe Lesa.

²⁰ Cibiibi ncemwakanjeyela kuncita Lesa wakacaalula caba bubotu, kwaamba ayi bantu baanji bapuluke alimwi bacili boomi bulya kwiinda muceeco cakacitika.

²¹ Taaku ncemweelete kuloonda. Ndanoomulama pantu pomwi abana banu.” Mpeeke wakabakalika myoyo amaswi ankumbu ayo akabeensha misusu.

Kufwa kwakwe Josefu

²² Josefu wakatolelela kwikala muIjipiti abamuŋanda ya baishi. Wakafwa kaacite myaaka ili 110.

²³ Wakekala cakubona abana bakwe Efuleemu abamashikulu bakwe. Alimwi wakalinga kulindila kutambula bana bakwe Makiya, mwanaakwe Manase musankwa mumukowa wakwe.

²⁴ Mpeeke wakaambila bamakwabo ayi, “Ndipafwaafwi kufwa, sombi Lesa ulaakumucafwa akumutanjilila kuswa momuno kuya kucishi ico ncaakalasha baAbulaamu, baIsaki alimwi abaJakobo cakulumbila.”

²⁵ Lyalo Josefu wakasenga bamakwabo, bana bakwe Isilaeli, ayi balumbile. Wakaamba ayi, “Amunshomeshe kwaamba ayi Lesa akumutanjilila kumutola kucishi ico, mulaakutolelela amafuwa angu.”

²⁶ Aboobo Josefu wakafwa kaacite myaaka ili 110. Bakabamba mubili wakwe kukasha kubola akuubika mulibokoshi mucishi ca Ijipiti.