Matalikilo 49 - Baibo Busansulushi Bwa Libuku Ili

Maswi akwe Jakobo akweelaako

¹ Jakobo wakeeta bana bakwe basankwa akwaamba ayi, “Amubungane pano, mulwiite ceshi cikamucitikile kunembo.

² “Kamwisa mubungane akukutika, nobana bakwe Jakobo. Amukutike Isilaeli ishiwanu.

³ “Lubeni, mwanaangu wakwiiya, ndiwe nkusu shangu. Alimwi uli mwaana mutaanshi mubusankwa bwangu. Uleendaawo bulemu ankusu pabana bangu basankwa boonse.

⁴ Webo uli anga ngamaanshi aanji atookunka, ono sombi teshi ukabe muntu uyandika kwiinda bamwi boonse, mukwiinga wakakumana akasuwa wangu, akunyansha bulo bwa baiso.

⁵ “Simyoni aLefi mbamukowa Balasebensesha mipeeni yabo kucita shimfulunganya.

⁶ Teshi nkanjile mumibandi yabo ya bushishi, nabi kusenkaanaabo mukubungana kwabo. Bakacaya bantu mubukali bwabo alimwi bakatyoloola bacende mukulisangalasha.

⁷ Lishingo alibe pabukali bwabo buyoosha, ncakwiila pabukali bwabo bwalunkutwe. Ndaakubapalanganya mucishi coonse cakwe Jakobo, ndaakubapalanganishisha mucishi coonse cakwe Isilaeli.

⁸ “Juda, bamakwanu balaakukulumba, balwani bako ulaakubacata panshingo, alimwi bamakwanu balaakukukotamina.

⁹ Juda uli anga mwanaankalamu, ucaya paya moyo akuboolela mucimfwengo cakwe. Mbuli nkalamu ulabwandama akoona panshi, nabi nkalamu yanakashi, anu ngani weenga wamusonkomona?

¹⁰ Nkooli ya bwaami Juda unanoicitebo lyoonse. Bamulunyungu lwakwe bananoolibo ankooli ya bweendeleshi lyoonse, kushikila akese uyo weelete kubaayo, alimwi uyo mishobo ngweshi ikanoonyumfwila.

¹¹ Ulaanga mwanaambongolo kucisamu ca munyansa, munyansa ubotu abuumbi. Ulacapa shakufwala shakwe muwaini usalala, mumaanshi aminyansa asalala anga mbulowa.

¹² Meenso akwe alasalala kwiinda mukunwa waini, alimwi meeno akwe alatuba kwiinda mukunwa mukupa.

¹³ “Sebuluni ulaakwikala kufwaafwi alweenge, cito cakwe cilaakuba cito kwakushisila maato. Cishi cakwe cilaakushika akuSidoni.

¹⁴ “Isaka uli anga nimbongolo iyumu, yoona pakati ka mikuli cakutandabala.

¹⁵ Ndyaakabona kubota kwa musena wakookesha, akubona ayi ayalo inshi njibotu, wakatyankamika musana ayi abwese mukuli, lyalo camulengesha kusebensa mbuli musha.

¹⁶ “Dani ulaakuba moomboloshi wa bantu bakwe, balaakuba anga njimishobo imwi yoonse ya bene Isilaeli.

¹⁷ Dani ulaakuba anga ninsoka mweelanshila, nsooka icite buyoka bucaya mweelanshila, iluma liaki mukapokoso, kwaamba ayi ushiiteewo alokele kwisule.

¹⁸ “Ono oMwaami Lesa, ntoolindilila lupulusho lwako.

¹⁹ “Gadi ulaakulwanwa alikoto lya bapambi, sombi ulaakupiluka akubatandaanya.

²⁰ “Mumusena wakwe Asha mulaakunooswa shakulya shibotu abuumbi. Ulaakunoolima shakulya sheelete mwaami.

²¹ “Nafutali ninsefu ilicicila cakwaanguluka, uyo ushala baana beebeleka.

²² “Josefu uli anga ngumunyansa ucata shisepo abuumbi, ee munyansa uli kufwaafwi akantupu. Misampi ya nguwo ilatandabala kulubumbu.

²³ Balwani bakwe bakamulwana ciyoosha akumutandaanya kabacite mata amifwi.

²⁴ Nakubi boobo buta bwakwe lakwe tabutenkaani. Lyaansa lyakwe lyayuma ceebo ca nkusu shakwe Lesa Shinkusu shoonse, Lesa wakwe Jakobo, Mweembeshi alimwi Mukwabilishi wa bene Isilaeli.

²⁵ NguLesa wa baiso ukucafwa, Lesa Shinkusu shoonse ukupa shoolwe, shoolwe sha mfula kuswa kwiculu, alimwi asha maanshi aanji eshi kuswa panshi. Ulakupa shoolwe shakuba aŋombe shiinji alimwi abaana baanji,

²⁶ shoolwe shakuba awiti alimwi amaluba, shoolwe sha tulundu twa kale kale, shintu shikondelesha sha tulundu twa muyayaya. Shoolwe shoonse ishi ashibe pamutwi wakwe Josefu, Ee pankumo ya wooyo wakapatulwa kubamakwabo.

²⁷ “Benjameni nguumpe mukali. Macuunsa amacolesha ulacaya akulya.”

²⁸ Iyi njemikowa ili likumi ayobilo ya bene Isilaeli, alimwi ishi nshesheesho ishiwabo nshaakaamba ndyaakalinga kupa maswi akulasha kweelete mwanaakwe musankwa womwi awomwi.

Kufwa akubikwa kwakwe Jakobo

²⁹ Lyalo Jakobo wakaamba ayi, “Bulya mboontoofwa, kukonkela bamakwesu, mukambike kulete bashali bangu bakulukulu mucimfwengo cili mumuunda wakwe Efuloni mwine Iti,

³⁰ kuMakipela kwicwe lya Mamule mucishi ca Kenani. Abulaamu wakoola cimfwengo amuunda kuli Efuloni kwaamba ayi abe maanda.

³¹ Nkokooko nkobakabika baAbulaamu abaSala bakaabo. Abalo baIsaki abaLabeka bakaabo nkobakababika. Anebo nkokooko nkondakabika Leya.

³² Muunda acimfwengo cakalinga mumo wakoolwa kubene Iti. Amukambike kooko.”

³³ Jakobo ndyaakamanisha kulasha bana bakwe, wakoona alimwi, mpeeke wakafwa.