Matalikilo 48 - Baibo Busansulushi Bwa Libuku Ili

Jakobo mbwaakapa coolwe Efuleemu aManase

¹ Kunembo Josefu wakalwiitwa ayi baishi mbalwashi. Mpeeke wakabwesa bana bakwe bobilo basankwa Manase aEfuleemu, akuya mukubona Jakobo.

² Jakobo ndyaakanyumfwa ayi Josefu mwanaakwe wesa mukumubona, wakaliyuminisha wekalaako pabulo.

³ Jakobo wakaambila Josefu ayi, “Lesa Shinkusu shoonse wakaboneka kuli ndime kuLusi mucishi ca Kenani akumpa coolwe.

⁴ Wakandwiita ayi, ‘Ndakukupa baana baanji kwaamba ayi bamulunyungu lwako bakabe mishobo iinji. Ndaakupa bamulunyungu lwako cishi ici cikabe caabo muyayaya.’ ”

⁵ Jakobo wakatolelela akwaamba ayi, “Josefu, bana bako basankwa bobilo mbowakashala kuno kuIjipiti kaantana kwisa, mbaangu. Efuleemu aManase balibo anga mbana bangu basankwa Lubeni aSimyoni.

⁶ Na ulicite abamwi baana basankwa teshi bakayeeyelwe kuba bana bangu. Buboni mbweshi bakapyane bulaakwiinda muli Efuleemu aManase.

⁷ Ici ntoocicita ceebo ca banyoko baLakelo. Ndakaba abuumba bunene abuumbi ndibakafwa muKenani, pafwaafwi aEfulati, ndindakalinga kuswa kuMesopotamya. Ndakababika kweenka kulya munshaanshila iya kuEfulati.” Efulati bulya iletwa ayi Betileemu.

⁸ Jakobo ndyaakabona bana bakwe Josefu basankwa wakeepusha ayi, “Anu banyamata aba mbaani?”

⁹ Josefu wakakumbula ayi, “Mbana bangu abo Lesa mbwaakampa muno muIjipiti.” Lyalo Jakobo wakaamba ayi, “Balete kuno ayi mbape coolwe.”

¹⁰ Meenso akwe Jakobo akalinga kwaalilwa kubona ceebo ca kucembela alimwi taakalinga kukonsha kubona kabotu. Josefu wakabaleta kuli nguwe, mpeeke Jakobo wakabakumbata akubafyonta.

¹¹ Jakobo wakaambila Josefu ayi, “Nshindakalinga kuyeeya ayi inga ndakubona alimwi. Ono Lesa walengesha kwaamba ayi mbone abana bako.”

¹² Lyalo Josefu wakabakusha pamubili pali Jakobo akufukama kunembo lyakwe cakushisha ciwa panshi.

¹³ Josefu wakabika Efuleemu kucipiko kuli Jakobo, kululyo wakabikaako Manase.

¹⁴ Nacibi boobo Jakobo wakacilinganya maansa, akubika lyalulyo pamutwi wakwe Efuleemu nakubi kwaamba ayi ngomwanikebantu alimwi akubika lya cipiko pamutwi wakwe Manase munenebantu.

¹⁵ Mpeeke wakapa coolwe Josefu ayi, “Lesa uyo bata baAbulaamu abaIsaki ngobakalinga kusebensela aape coolwe baana aba! Lesa uyo wakantanjilila kushikila asunu aabape coolwe!

¹⁶ Munjelo uyo wakampulusha mushintu shicaya aabape coolwe. Liina lyangu alya bata ba Abulaamu abaIsaki, aatolelele kwiinda mubanike aba! Abakabe abaana baanji alimwi abamulunyungu lwabo!”

¹⁷ Josefu ndyaakabona baishi babika lyaansa lyalulyo pamutwi wakwe Efuleemu akulibika pa wakwe Manase, taakwe kukondwa. Aboobo wakabwesa lyaansa lyalulyo lya baishi walibika pamutwi wakwe Manase.

¹⁸ Mpeeke wakaambila baishi ayi, “Sobwe ta, uyu ngowakwiiya. Amubike lyaansa lyanu lyalulyo pali nguwe.”

¹⁹ Sombi baishi bakakaka akwaamba ayi, “Ndishi omwanaangu, ndishi. Alakwe ulaakuba mushobo alimwi alakwe ulaakuba muntu ulemekwa. Nakubi boobo, mwanike wakwe ulaakwiindaawo alimwi bamulunyungu lwakwe balaakuba likoto lya mishobo.”

²⁰ Wakabapa coolwe bushiku ubo akwaamba ayi, “Mumeena anu, bene Isilaeli mweshi bakanoosengela coolwe. Balaakunokwaamba ayi, ‘Lesa aakulengeshe kuba anga nguEfuleemu aManase.’ ” Aboobo Efuleemu wakamubika kunembo kuli Manase.

²¹ Lyalo Jakobo wakaambila Josefu ayi, “Ndi pafwaafwi kufwa. Nacibi boobo Lesa unanooli awebo akukuboosha kucishi ca bamashali bako bakulukulu.

²² Ono webo, mbooli muntu wiindaawo pabamakwanu mubulemu, ndakupa cishi ncendakanyaya bene Amoli mukusebensesha mupeeni abuta.”