Matalikilo 46 - Baibo Busansulushi Bwa Libuku Ili

Jakobo abamuŋanda yakwe mbobakaya kuIjipiti

¹ Jakobo wakalongela shoonse nshaakalinga kucite. Lyalo wakaya kuBiyasheba uko nkwaakaya mukubenga mulambu kuli Lesa wakwe Isaki, ishi.

² Lesa wakaamba anguwe mashiku akumwiita ayi, “Jakobo! Jakobo!” Wakakumbula ayi, “Nkambo.”

³ Lyalo Lesa wakaamba ayi, “Ndime Lesa, Lesa wa baiso, utaloondi kuya kuIjipiti. Bamulunyungu lwako ndaakubalengesha kuba mishobo inene uko kweenka.

⁴ Ntooya awebo kuIjipiti, alimwi bamulunyungu lwako ndaakubaboosha kucishi cino. Josefu ulaakunooliiwo waakufwa.”

⁵ Jakobo wakanyamuka kuswa kuBiyasheba. Bana bakwe basankwa bakatantika Jakobo, bana babo baniininiini alimwi abamakaabo mushikoci shakatuma mwaami wa Ijipiti.

⁶ Bakabwesa shifubwa shabo ashintu shoonse nshibakalinga kucite muKenani akuya kuIjipiti. Jakobo wakaya abamulunyungu lwakwe boonse.

⁷ Bana bakwe basankwa abanakashi alimwi abashikulu bakwe basankwa abanakashi.

⁸ Bamuŋanda yakwe Jakobo bakaya kuIjipiti anguwe ngumwanaakwe munenebantu Lubeni

⁹ abana bakwe Lubeni basankwa beetwa ayi Anoki, Palu, Esiloni alimwi aKami.

¹⁰ Simyoni, abana bakwe basankwa beetwa ayi, Jemuwelo, Jamini, Oadi, Jakini, Sowa alimwi aShaulo, baana basankwa mbaakashalila mumwanakashi mwine Kenani.

¹¹ Lefi, abana bakwe basankwa beetwa ayi Geshoni, Koati aMelali.

¹² Juda abana bakwe basankwa beetwa ayi Shela, Pelisi alimwi Sela. Bana bakwe Juda basankwa bamwi beetwa ayi Ele aOnani bakafwita muKenani. Bana bakwe Pelisi basankwa nguEsiloni alimwi aAmulu.

¹³ Isaka abana bakwe basankwa beetwa ayi Tola, Jashabu, alimwi aShimuloni.

¹⁴ Sebuluni abana bakwe basankwa beetwa ayi Seledi, Eloni alimwi aJalilu.

¹⁵ Aba mbaana basankwa Jakobo mbwaakashalila muli Leya kabacili kuMesopotamya kuleka Daina mwanaakwe mwanakashi. Ono boonse pantu pomwi bamulunyungu lwakwe Jakobo muli Leya bakaba makumi otatwe abotatwe.

¹⁶ Gadi abana bakwe basankwa beetwa ayi Sefoni, Agi, Shuni, Esiboni, Eli, Alodi alimwi aAleli.

¹⁷ Asha abana bakwe basankwa Imuna, Ishifa, Ishifi, Beliya alimwi anankashi yabo Sela. Bana bakwe Beliya basankwa nguEba alimwi aMikaeli.

¹⁸ Aba boonse bali likumi abosanwe alimwi awomwi mbamulunyungu lwakwe Jakobo muli Silupa musha uyo Labani ngwaakapa Leya, mwanaakwe mwanakashi.

¹⁹ Muli Lakelo mukaakwe, Jakobo wakashalilaamobo baana basankwa bobilo, Josefu alimwi aBenjameni.

²⁰ MuIjipiti Josefu wakashala baana basankwa bobilo, Manase alimwi Efuleemu, muli Asenati mwanaakwe Potifela, mupailishi wa muEliopolisi.

²¹ Bana bakwe Benjameni basankwa nguBela, Beka, Ashibelo, Gela, Naamani, Eyi, Loshi, Mupimu, Upimu, alimwi aAadi.

²² Aba bali likumi abone mbamulunyungu lwakwe Jakobo muli Lakelo.

²³ Dani amwanaakwe musankwa Ushimu.

²⁴ Nafutali abana bakwe basankwa beetwa ayi Jasilu, Guni, Jesa alimwi aShilemu.

²⁵ Aba bali bosanwe abobilo mbamulunyungu lwakwe Jakobo muli Biluya musha Labani ngwaakapa Lakelo mwanaakwe mwanakashi.

²⁶ Boonse pantu pomwi mbamulunyungu lwakwe Jakobo mbwaakayaabo kuIjipiti, kutabelengelaako bamalokashi bakwe, abo bakalinga makumi osanwe alyomwi alimwi abosanwe awomwi.

²⁷ Ono kubikaako abaana basankwa bobilo Josefu mbwaakashala kuIjipiti, bamulunyungu lwakwe Jakobo bakaya kuIjipiti bakalinga makumi osanwe aobilo pantu pomwi.

Jakobo abamulunyungu lwakwe muIjipiti

²⁸ Jakobo wakatanjisha Juda ayi aambile Josefu bakumanine muGosheni. Ndibakashika,

²⁹ Josefu wakatanta mucikoci ca maaki cakwe akuya mukukumana abaishi muGosheni. Ndibakakumana, Josefu wakakumbata baishi munshingo akulila kwa ciindi cilaamfu.

³⁰ Jakobo wakaambila Josefu ayi, “Ndilibambite kufwa bulya mbondakubona akwishiba kwaamba ayi uli muumi.”

³¹ Mpeeke Josefu wakaambila bamakwabo abamwi boonse bamuŋanda yakwe Jakobo ayi, “Ndyeelete kuya mukwaambila Falawo ayi bamakwesu abamuŋanda ya bata, abo bakalinga kwikala kuKenani, besa kuno kuli ndime.

³² Ntoomulwiita ayi muli beembeshi alimwi mulalama shifubwa alimwi ayi mwaletelela mbelele, mpongo, ŋombe alimwi ashintu shanu shimwi shoonse.

³³ Mwaami amwiita akumwiipusha ncemucita,

³⁴ mumwaambile cakushinisha ayi mwakalinga bafubi alimwi mucili bafubi bweenka mbuli bamashali banu bakulukulu. Na mwaambe boobo ndyeshi amusuminishe kwikala mumusena wa Gosheni.” Josefu wakaamba boobo mukwiinga bene Ijipiti tebakalinga kusunene abeembeshi.