Matalikilo 45 - Baibo Busansulushi Bwa Libuku Ili

Josefu mbwaakaliyubulula kubamakwabo

¹ Mpeeke Josefu wakashika pakwaalilwa kulicata pameenso a basebenshi bakwe. Aboobo wakabaambila ayi basweemo mucipinda umo mobakalinga. Taaku umbi wakalingaamo Josefu ndyaakalinga kulisansulula kubamakwabo.

² Wakalila abuumbi cakwaamba ayi bene Ijipiti bakanyumfwa, akushisha cikani ici kuŋanda yakwe Falawo.

³ Josefu wakaamba ayi, “Ndime Josefu. Sa bata bacili boomi?” Bamakwabo ndibakanyumfwa boobo bakaloonda cakwaalilwa akukumbula.

⁴ Lyalo Josefu wakabambila ayi, “Amusene pafwaafwi.” Mpeeke bakasena alimwi wakabaambila ayi, “Ndime mukwabanu Josefu uyo ngomwakoolisha ayi atolwe muIjipiti.

⁵ Ono mutakankamani akulipa mulandu nobeene ceebo cakungulisha kokuno. NguLesa mwiine wakantanjisha kuli ndimwe kwaamba ayi mpulushe bantu.

⁶ Uno ngumwaaka wabilibo kuba munsala mucishi cino, sombi kucisa aimwi myaaka yosanwe yakutalima nabi kutebula.

⁷ Lesa wakantanjisha kokuno kunembo lyanu ayi mupulushe munshila ikankamanisha iyi, alimwi ayi ncakwiila mwebo abamulunyungu lwanu mutafwi.

⁸ Aboobo teshi ndimwe mwakantuma kokuno, sombi nguLesa. Wakanengesha kuba muntu wacinenenene ukonkela Falawo mubweendeleshi. Ndime nyendelesha ŋanda yakwe yoonse, alimwi ndimweendeleshi wa cishi coonse ca Ijipiti.

⁹ “Ono mweendeshe muye kuli bata mukabaambile ayi Josefu mwanaanu musankwa waamba ayi, ‘Lesa wanengesha kuba mweendeleshi wa cishi ca Ijipiti coonse, ono bese kuno cakufwambaana.

¹⁰ Mulaakunookala mumusena wa Gosheni kwaamba ayi mukabe pafwaafwi anebo. Nkokwaamba ayi mwebo, bana banu, bashikulu, mbelele, mpongo, ŋombe shanu alimwi asheesho shoonse nshemucite.

¹¹ Na kamuli muGosheni inga ndakonsha kumubikaako maano. Kucili myaaka yosanwe ya nsala. Aboobo nshisuni kwaamba ayi mwebo, bana banu, ashifubwa shanu mufwe kunsala.’ ”

¹² Josefu wakatolelela ayi, “Ono noonse, awebo Benjameni, mwaboona kwaamba ayi ncakwiila ndime Josefu.

¹³ Mukabalwiite bata nkusu nsheencite muno muIjipiti asheesho shoonse nshemwabona. Lyalo mukabaleete kokuno cakufwambaana.”

¹⁴ Mpomunyaawo wakakumbata Benjameni mukwabo akutalika kulila. Alakwe Benjameni wakalila pakumukumbata.

¹⁵ Lyalo kaacilila buumpute wakakumbata bamakwabo boonse womwi awomwi akubafyonta. Mpeeke ndyaakamana kucita boobo bamakwabo bakatalika kwaambaakwe.

¹⁶ Makani akwaamba ayi bamakwabo Josefu besa ndyaakashika kuŋanda ya mwaami, Falawo abacinenenene bakwe bamwi boonse bakakondwa.

¹⁷ Mpeeke Falawo wakaambila Josefu ayi, “Ambila bamakwanu baye bakalongele shintu pambongolo shabo, akuboolela kucishi ca Kenani.

¹⁸ Lyalo bakese kuno abaishiwabo abamuŋanda shabo boonse. Ndaakubapa musena wiindaawo kubota muno muIjipiti, alimwi balaakuba ashintu shiinji shiinda anshebayanda mubuumi bwabo.

¹⁹ Anu baambile babwesele limwi ashikoci kuno kuIjipiti kwaamba ayi bamakaabo, bana babo alimwi abaishiwabo bakeendeleemo.

²⁰ Batakalisukami akushiya shintu shabo shimwi. Shintu shiindaawo kubota mucishi coonse ca Ijipiti shilaakuba shabo.”

²¹ Bana bakwe Jakobo abo bakacita bweenka mbobakalwiitikwa. Josefu wakabapa shikoci kweelana abwakaamba mwaami Falawo. Wakabapa ashakulya ayi banooya cilya mulweendo.

²² Wakabapa ashakufwala shimwi, aumwi aumwi comwi. Sombi Benjameni wakamupa maali asilifa ali myaanda yotatwe ashakufwala shimwi shosanwe.

²³ Baishi wakabatumina mbongolo likumi shakayumuna shintu shiindaawo kubota muIjipiti ashimwi likumi shakayumuna witi ashakulya shimwi sha mulweendo.

²⁴ Wakabashindikila paniini, lyalo ndibakalinga kupansaana wakabaambila ayi, “Tabaambani munshila.”

²⁵ Bakashiya Ijipiti akuya kuli Jakobo ishiwabo, kuKenani.

²⁶ Mpeeke bakamwaambila ayi, “Josefu ucili muumi! Ngumweendeleshi wa cishi ca Ijipiti coonse.” Jakobo wakacatwa citu, aboobo taakwe kukonsha kubashoma.

²⁷ Nacibi boobo, ndibakamulwiita makani oonse Josefu ngaakabaambila, alimwi ndyaakabona shikoci Josefu nshaakatuma ayi beendeleemo, maano akaboolaamo.

²⁸ Lyalo wakaamba ayi, “Ono ndashooma, ncakwiila mwanaangu Josefu ucili muumi! Ndaakuya nkamuboneewo kaantana kufwa.”