Matalikilo 43 - Baibo Busansulushi Bwa Libuku Ili

Bamakwabo Josefu mbobakaboolela kuIjipiti aBenjameni

¹ Nsala yakeendaawo muKenani,

² mpeeke bamuŋanda yakwe Jakobo ndibakamanisha shakalinga shaswa kuIjipiti, Jakobo wakaambila bana bakwe basankwa ayi, “Amubooleleeko mukooleewo shakulya ashimwi shiniini.”

³ Mpomunyaawo Juda wakamwaambila ayi, “Musankwa uyo wakatucenjeshelabo limwi ayi teshi akatusuminisheewo kushika muliimfwa lyakwe, sombibo Benjameni katuli akwe.

⁴ Nkokwaamba ayi na mulisuminite kutuma mukwabesu andiswe, tutooya mukumuulila shakulya.

⁵ Sombi na tamusuminite, teshi tukayeeko, mukwiinga musankwa uyo wakatulwiita ayi teshi akatusuminisheewo kushika muliimfwa lyakwe, sombibo mukwabesu katuli akwe.”

⁶ Mpeeke Jakobo wakaamba ayi, “Ino ono mwanengelanshi buumba bunene bobulya mukumulwiita ayi mulicite mukwabanu aumwi?”

⁷ Bakakumbula ayi, “Musankwa uyo wakeepusha shapali ndiswe abeshikamukowa besu. Wakatwiipusha ayi, ‘Sa baishiwanu bacili boomi? Sa muliciteewo mukwabanu aumwi?’ Twakalinga kweelete kukumbula miipusho yakwe. Ono naakwiinga tweshiba buyani ayi utootwaambila ayi, ‘Mukwabanu mukamuleete kuno?’ ”

⁸ Juda wakaambila baishi ayi, “Mwanike amumubike mumaansaangu, mpeeke tutoonyamuka tunooya bulya onoono. Lyalo taaku pakati kesu eshi akafwe kunsala.

⁹ Ntooshomesha buumi bwangu, aboobo inga mwalanga ndime na ndabula kumuboosha kaali kabotu, ndaakusumina kupekwa mulandu wamuyayaya.

¹⁰ Ciindi ncetwamana bulya, naakwiinga tweendaako anyendo shobilo, katuya akuboola.”

¹¹ Baishiwabo bakabaambila ayi, “Na mboboobo mboceelete kuba, anu amubwese shiswa mucishi cino shibotu kwiindaawo mushifunta shanu, kwaamba ayi mutole cipo kumweendeleshi. Amubikeemo mashina ashisamu aniini, tubuuci, tununkila kabotu mubuyani, mule, nyemu sha pisitashiyo alimwi asha alimondi.

¹² Alimwi munyamune maali eendaawo aayo ngomwakatola pakutaanguna, ceebo mulyeelete kuboosha aayo ngomwakacana peculu mumasaka anu. Ndabona bakalubakobo.

¹³ Mwanike kamuyaakwe alimwi inga mwanyamuka bulya bweenka, mubooleleeko kumusankwa uyo.

¹⁴ Lesa Shinkusu shoonse aalengeshe mweendeleshi uyo kuba ankuumbu kwaamba ayi amuboosheshe Benjameni amukwabanu umwi. Ono kuli ndime, na citokwaamba kusowekelwa baana, akube mbweeke ubo.”

¹⁵ Aboobo bamakwabo Josefu abo bakabwesa shipo amaali endilila, eelene angobakatola kataanshi, akunyamuka kuya kuIjipiti pantu pomwi aBenjameni. Kulya bakalishisha kuli Josefu.

¹⁶ Josefu ndyaakabona ayi Benjameni bali akwe, wakaambila musebenshi wakalinga kulama ŋanda yakwe ayi, “Tola basankwa aba kuŋanda yangu batoolya anebo malumwi. Ono ucaye munyama akumuteleka.”

¹⁷ Musebenshi wakacita kweelana ambwaakalwiitikwa akutola bamakwabo Josefu kuŋanda yakwe.

¹⁸ Ndibakalinga kutolwa kuŋanda bakalinga kuloondete akuyeeya ayi, “Tutootolwa kuŋanda ceebo ca maali akapilushikwa mumasaka esu nditwakesa pakataanshi. Tutoobonabo ndyeshi batulwaane, babwese mbongolo shesu akutwaalula basha.”

¹⁹ Paceebo ceeco pamulyaango waŋanda bakaambila musebenshi wakwe Josefu ayi,

²⁰ “Nkambo, twakesa kuno kataanshi mukuula shakulya.

²¹ Nditwakaamba ayi toone pamwi pamusena, twakacalula mumasaka esu. Mpeeke womwi awomwi pakati kesu wakacanaamo maali akwe oonse mulisaka lyakwe. Ono maali ayo twaaleta.

²² Alimwi twaleeta aamwi kwaamba ayi tuule ashimwi shakulya. Tatwishi wakabooshamo maali mumasaka esu.”

²³ Musebenshi wakaamba ayi, “Mutalisukami alimwi mutaloondi. Lesa wanu, uyo Lesa wa baishiwanu, ulyeelete ngowakabika maali mumasaka anu. Nebo ndakatambula nshemwakalipila.” Lyalo wakaleta Simyoni kuli mbabo.

²⁴ Musebenshi wakabatola muŋanda. Wakabapa maanshi akusamba kumyeendo alimwi mbongolo shabo wakashisanina.

²⁵ Shipo shabo bakashibambilabo limwi kupa Josefu, ceebo bakalwiitikwa ayi balyeelete kulya anguwe malumwi.

²⁶ Josefu ndyaakashika bakatola shipo muŋada kuli nguwe akufukama cakushisha ciwa panshi kunembo lyakwe.

²⁷ Wakabeepusheepusha mbobatoobuka akwaamba ayi, “Mwakandwiitaawo shabaishiwanu bacembele, abalo batoobuka buyani? Sa bacili boomi, alimwi sa bali kabotu?”

²⁸ Bakakumbula ayi, “Baishiwesu, musebenshi wanu mubombu ngumuumibo alimwi uli kabotu.” Mpeeke bakafukama kunembo lyakwe mukumulemeka.

²⁹ Josefu ndyaakabona mwanike wakwe swa nswe Benjameni, wakaamba ayi, “Nkokwaamba ayi uyu ngomwanike wanu shikeela uyo ngomwakandwiitaawo? Lesa aakupe coolwe omwanaangu!”

³⁰ Mpomunyaawo Josefu wakanyamukaawo lubilo mukwiinga nkumbu shakalinga shafula abuumbi pamwanike wakwe. Pakacaalabo paniini naakwiinga wakalila palya peenka, aboobo wakaya walila kucipinda cakwe.

³¹ Ndyaakamana kusamba kumeenso, wakaboola akulicata. Mpeeke wakaamba ayi shakulya ashiletwe.

³² Josefu wakabikilwa shakulya patebulu yomwi abalo bamakwabo paimwi. Bene Ijipiti bakalinga kulya kooko abalo bakabikilwa beenka ceebo bakalinga kuciyeeyela kutapa bulemu kulya abaEbulu.

³³ Bamukowa abo bakalinga kushiite kutebulu kabalangite kuli Josefu alimwi mumundando wa shiimo shabo kuswa kumunenebantu kushikila akumwanikebantu. Ndibakabona mbobakalinga kushiite, bakalanganalanganabo cakukankamana.

³⁴ Shakulya shakaabwa kuswa kutebulu yakwe Josefu alimwi Benjameni wakaabilwa shiinji cakwiinda sha bamwi boonse mankanda osanwe. Mpeeke bakalya akunwa cakusekelela aJosefu.