Matalikilo 42 - Baibo Busansulushi Bwa Libuku Ili

Bamakwabo Josefu mbobakaya kuIjipiti

¹ Jakobo ndyaakeshiba ayi kuIjipiti nkoshili shakulya wakaambila bana bakwe basankwa ayi, “Sa inga tamucitiiwo cintu comwi?

² Ntoonyumfwa ayi shili anga ngamaila shakulya nkoshili kuIjipiti. Kamuya mukooleeko kwaamba ayi tutafwi kunsala.”

³ Paceebo ceeco bamakwabo Josefu bali likumi bakanyamuka kuya kuIjipiti mukuula shakulya.

⁴ Sombi Jakobo taakwe kuleka Benjameni mukwabo Josefu lifumo lyomwi ayi aye ambabo ceebo wakalinga kuloonda ayi cimwi cintu inga cacitika kuli nguwe.

⁵ Bana bakwe Jakobo bakalitiba pamulongo wa bantubo bamwi bakalinga kuya mukuula shakulya mukwiinga nsala yakalingabo mucishi ca Kenani coonse.

⁶ Josefu, uyo wakalinga ngomweendeleshi wa cishi ca Ijipiti, ngowakalinga kuulisha shakulya kubantu bakalinga kuswa kushishi shimwi shoonse. Aboobo bamakwabo bakesa bafukama kuli nguwe cakushisha shiwa panshi.

⁷ Josefu ndyaakabona bamakwabo wakabeshiba, sombi wakalinga kucitabo anga taakalinga kubeshi. Wakabeepusha cabukali ayi, “Mulaswa kuli?” Bakakumbula ayi, “Twaswa kuKenani kwisa mukuula shakulya.”

⁸ Nacibi kwaamba ayi Josefu wakeshiba bamakwabo, balo tabakwe kumwishiba.

⁹ Mpeeke wakeebaluka shiloto nshaakalota pali mbabo akwaamba ayi, “Muli basenseshi mwebo, mwesa mukubonabo cishi cesu mpocitashupite kwinjilila.”

¹⁰ Sombi bakakumbula ayi, “Sobwe nkambo. Twesa mbuli basha banu kwaamba iyi tuule cakulya.

¹¹ Soonse bulya pano tuli bamukowa. Tatubete basenseshi sobwe nkambo, tuli basankwa bashomeka.”

¹² Josefu wakaamba ayi, “Mutoobecabo! Mwesa mukubona cishi cesu mpocitashupite kwinjilila.”

¹³ Bakaamba ayi, “Swebo nkambo, twakalinga likumi abobilo soonse pantu pomwi kuli baishiwesu bomwi mucishi ca Kenani. Womwi wakafwa, shikeela wesu wacaala abata kumisheesu.”

¹⁴ Mpeeke Josefu wakakumbula ayi, “Bweenka mbondaambaawo kale, mwebo muli basenseshi.

¹⁵ Ono mbweshi nshinishe mbulya. Ndalumbila paliina lyakwe Falawo ayi teshi mukayeewo citobo shikeela wanu akese kuno.

¹⁶ Womwi pakati kanu ulyeelete kuya mukumuleta. Nobamwi mutoolamwa kuno abeshikulindilila kushikila nkeshibe lushinisho lwa makani ngomutokwaamba. Kwabula kuba boobo, bweenka mbocili lushinisho ayi mwaami ngumuumi, ncakwiila muli basenseshi.”

¹⁷ Kuswawaawo wakababika muntolongo kwanshiku shotatwe.

¹⁸ Pabushiku bwatatu Josefu wakabaambila ayi, “Nebo ndimuntu uloonda Lesa, ono teshi mucaaye na mucite cintu comwi.

¹⁹ Ono kutondesha kwaamba ayi mulashomeka, womwi pakati kanu ulyeelete acaale muntolongo mweenka momwalinga, sombi nobamwi inga mwatola shakulya nshimoolaako kumikowa yanu mukwiinga inga baakufwa kunsala.

²⁰ Ono mukalete shikeela wanu. Ici cilaakutondesha ayi ishi nshemwaamba teshi shakubeca, alimwi teshi nkamucayeewo.” Bakasumina kucita ubo,

²¹ alimwi bakalifuyafuya ayi, “Ee, tutoopenshekwa ceebo ca ceeco ncetwakacita kumukwabesu Josefu. Twakabona mbwaakalinga mumapensho ndyaakalinga kulila lucafwo, sombi twakayumya myoyo. Mboobulya ono sunu caboola pali ndiswe.”

²² Lyalo Lubeni wakaamba ayi, “Ndakamulwiita ayi mutaciti cimwi cintu cibiibi pamwanike, ono tamukwe kunyumfwila. Mwaboona ono tutoopengelaamo mulufu lwakwe.”

²³ Josefu wakanyumfwa nshebakalinga kwaamba, sombi balo tabakwe kwishiba mukwiinga bakalinga kwaambaakwe kwiinda mumuntu ushikupandulula.

²⁴ Josefu wakabashiya waya walila. Ndyaakabooshaamo moyo cakukonsha kwaamba, wakaboola, wesa wasalaawo Simyoni akumwaanga boonse kababweneeko.

Bamakwabo Josefu mbobakaboolela kukenani

²⁵ Mpeeke Josefu wakaambila bantu bakwe ayi masaka a bamakwabo asushikwe shakulya, kupilushamo maali mumasaka abo akubabambila shakulya munshila pakunooya. Shoonse isho shakacitwa.

²⁶ Bamakwabo abo bakabika shakulya nshibakoola pambongolo shabo, lyalo bakanyamuka.

²⁷ Pamusena mpobakoona, umwi wakacalula lisaka lyakwe ayi asanine mbongolo. Ndyaakacalula wakacanabo maali akwe peculu.

²⁸ Mpeeke wakoolobesha kubamakwabo ayi, “Maali angu ndabooshelwa. Anaaya mulisaka lyangu!” Bakatilimuka abuumbi, alimwi muboowa bakeepushanya ayi, “Anu Lesa wacitanshi kuli ndiswe?”

²⁹ Ndibakashika kuli ishiwabo Jakobo muKenani, bakamulwiita shoonse shakacitika kuli mbabo.

³⁰ Bakaamba ayi, “Mweendeleshi wa kuIjipiti wakatwiipusha cabukali akutubekesha ayi tuli basenseshi ba cishi cine mishaabo.

³¹ Twakakumbula ayi, ‘Tatubete basenseshi, sobwe. Tulashomeka.

³² Twakalinga likumi abobilo soonse pantu pomwi, baana ba muntu womwi muKenani. Mukwabesu womwi wakafwa, ono shikeela nkwaacili, wacaala abaishiwesu muKenani.’

³³ Lakwe wakakumbula ayi, ‘Ono mbweshi nshibe lushinisho mbulya. Womwi pakati kanu utoocaala kuno, nobamwi mutole shakulya kumikowa yanu inga baakufwa kunsala.

³⁴ Shikeela wanu mukamuleete kuli ndime. Lyalo ndyeshi nkeshibe ayi tamubete basenseshi, sombi ayi muli bantu bashomeka. Kuswawaawo ndaakuboosha mukwabanu uyu kuli ndimwe alimwi inga mwekala kuno kamucita makwebo.’ ”

³⁵ Lyalo ndibakasukumuna masaka abo, boonse bakacana tufunta twabo twa maali. Mpeeke ndibakatubona balo aishiwabo bakaloonda abuumbi.

³⁶ Ishiwabo wakabaambila ayi, “Sa mulisuni kwaamba ayi bana bangu boonse bamane kuluba. Josefu pakoomunabo, Simyoni alakwe, ono mutooyanda kutola aBenjameni. Nebo ndime mpengelaamo!”

³⁷ Lubeni wakaambila baishi ayi, “Na nkabule kumuboosha Benjameni inga mwacaya bana bangu bobilo basankwa. Amumubikebo mumaansaangu, ndaakumuleta alimwi.”

³⁸ Sombi Jakobo wakaamba ayi, “Mwanaangu taakoonshi kuya awebo. Mukwabo ulifwite, ono ngowacaalabo eenka. Cimwi cintu inga cacitika munshila. Ndacembela, aboobo buumba mbweenga wandetela inga bwancaya.”