Matalikilo 41 - Baibo Busansulushi Bwa Libuku Ili

Josefu mbwaakapandulula shiloto shakwe Falawo

¹ Ndipakeenda myaaka yobilo, Falawo mwaami wa Ijipiti wakalota kaaimfwi munshaaMulonga wa Nailo,

² ndyaakabona ŋombe shili shosanwe ashobilo shiinite alimwi shiteshimite shakaswa mumulonga akutalika kulya bwiisu.

³ Mpomunyaawo ashimwi shosanwe ashobilo shakaswa. Shalo isho shakalinga kunyangite, makonkobo. Shakesa sheemikana pafwaafwi ashiinite muloombe lwa mulonga.

⁴ Mpeeke shinyangite isho shakalya shiinite. Lyalo Falawo wakabuka.

⁵ Ono wakoona alimwi akulota cimbi. Masanse a shili anga ngamaila acatite alimwi akomete, akalinga kusapukite kucishiko comwi.

⁶ Mpeeke amwi ali osanwe aobilo akasapuka. Ono alo ayo akalinga aniini alimwi anyanite kumuuwo wa muluyanga,

⁷ aalo atakomete akamina akomete. Mwaami wakapapuka akwishiba ayi walinga kulotabo.

⁸ Macuunsa wakalisukama, aboobo wakatuma nkombe kubeshimampelampela abasongo boonse ba muIjipiti ayi bese. Wakabaambila shiloto shakwe, sombi taaku wakakonsha kumupandulwita shiloto isho.

⁹ Mpeeke shikulama waini wa mwaami wakamwaambila ayi, “Ndyeelete kulyaambilila sunu ayi ndalubisha.

¹⁰ Mwakalinga mwakalala pali ndime amunene wa beshikupanga shinkwa, alimwi mwakatubika muntolongo muŋanda ya munene wa beshikulindilila kuntolongo.

¹¹ Mpeeke bumwi bushiku soonse sobilo twakalota alimwi shiloto isho shakalinga kucite bupandulushi bupusene.

¹² Muntolongo umo mwakalinga acikula bwangu muEbulu, musha wa munene wa beshikulindilila uyo ngotwakalingaakwe. Twakamulwiita shiloto shesu, mpeeke wakatupandulwita.

¹³ Shintu shakesa shaba bweenka mbwaakaamba. Nebo mwakamboosha mpondakalinga, sombi munene wa beshikupanga shinkwa mwakamutimbula mutwi.”

¹⁴ Falawo wakatumaako bantu ayi balete Josefu, mpomunyaawo bakamuleta kuswa kuntolongo. Ndyaakamana kukulula ndesu akufwala shimbi, wakaya mukubonekela kunembo lya mwaami.

¹⁵ Mpeeke mwaami uyo wakamwaambila ayi, “Ndaloota alimwi taaku ukonsha kupandulula ciloto ico. Ono ndanyumfwa ayi webo ulakonsha kupandulula shiloto.”

¹⁶ Josefu wakakumbula ayi, “Anebo nshikoonshi nobaami. Sombi Lesa utoopa bupandulushi buyandika.”

¹⁷ Mpomunyaawo Falawo wakaamba ayi, “Ndakalota kaanyimfwi muloombe lwa Mulonga wa Nailo.

¹⁸ Ŋombe shili shosanwe ashobilo shiinite alimwi shiteshimite, shaswa mumulonga akutalika kulya bwiisu.

¹⁹ Lyalo ashimwi shili shosanwe ashobilo shakesa isho shakalinga kunyangite, makonkobo. Ŋombe isho shakalinga kufulukite cakwaamba ayi nshesheesho sheenka nshendakabonaawo kufuluka mushobo uyo muIjipiti.

²⁰ Lyalo shinyangite shakamina shiinite,

²¹ sombi taaku weenga wakonsha kwishiba boobo, mukwiinga shalinga kubonekabo mushobo womwi apakataanshi. Mpeeke ndakapapuka.

²² Alimwi ndakalota ndabona masanse a witi ali osanwe aobilo acatite alimwi akomete, akalinga kusapukite kucishiko comwi.

²³ Lyalo amwi ali osanwe aobilo asapuka. Ono alo taakalinga aniini alimwi anyanite kumuuwo wa muluyanga.

²⁴ Ono anyanite amina akomete. Beshimampelampela ndabalwiita, sombi taaku wakonsha kumpandulwita.”

²⁵ Mpomunyaawo Josefu wakaambila Falawo ayi, “Shiloto shobilo ishi shilaamba cintu comwi. Lesa wamulwiita nceshi akacite.

²⁶ Ŋombe shiinite shosanwe ashobilo njimyaaka ili yosanwe ayobilo aalo masanse a witi akomete ali osanwe aobilo njimyaaka yosanwe ayobilo. Shilaamba cintu comwi.

²⁷ Ŋombe shinyangite, makonkobo shili shosanwe ashobilo isho shakaswa pesule, amasanse aniininiini anyanite kumuuwo wa muluyanga, shilaamba myaaka yosanwe ayobilo ya nsala.

²⁸ Cili bweenka mbondamulwiitawo kale kwaamba ayi Lesa wamutondesha nceshi akacite kunembo.

²⁹ Kulaakuba myaaka yosanwe ayobilo ya shakulya shiinji mucishi ca Ijipiti.

³⁰ Kuswawaawo kulaakuba myaaka yosanwe ayobilo ya nsala, alimwi amyaaka yoonse ibotu ilaakulubwa mukwiinga nsala ilaakunyonyoola cishi.

³¹ Ciindi cakuba ashakulya shiinji cilaakulubilwabolimwi mukwiinga kulaakuba nsala iyoosha abuumbi.

³² Ciloto ncecaboolelaawo nkwaamba ayi Lesa wabamba kale cikani ici alimwi ulaakulengesha ayi cicitike coonoonobo.

³³ “Ono mulyeelete kusala muntu musongo alimwi ucite lushibo kwaamba ayi abe wacinenenene wiindaawo mucishi cino.

³⁴ Mulyeelete kutondeka abamwi bacinenenene beelete kubona ayi comwi ca shipansha shili shosanwe ca shishango cabwesekwa mumyaaka ili yosanwe ayobilo ya shakulya shiinji.

³⁵ Mubaambile kwaamba ayi babunganye shakulya shoonse isho mumyaaka ibotu itoosa. Alimwi mubape nkusu shakusunga shili anga ngamaila mumandabala anene akushilama.

³⁶ Shakulya shilaakusungwa kwaamba ayi shikasebenseshekwe mumyaaka yosanwe ayobilo ya nsala iyo ishi ikabeeko muIjipiti. Munshila iyi bantu teshi bakafwe kunsala.”

Josefu mbwaakasalwa kuba mweendeleshi wa Ijipiti

³⁷ Falawo abacinenenene bakwe bakasuminisha muyeeyo uyo.

³⁸ Mpeeke Falawo wakabaambila ayi, “Teshi tukacaneewo musankwa uli mbuli Josefu, uyo ucite Mushimu wakwe Lesa muli nguwe.”

³⁹ Mpomunyaawo wakaambila Josefu ayi, “Lesa wakutondesha shoonse ishi, aboobo teshi acakutonsha kwaamba ayi webo ulicite busongo alushibo kwiinda bantu bamwi boonse.

⁴⁰ Ntookupa bweendeleshi bwa cishi cangu alimwi bantu boonse bananoonyumfwila nsheenga waamba. Nebo ndanookwiindaawobo ceebo ca cuuna ca bwaami nceendiiwo.

⁴¹ Aboobo bulya ndakubika ayi ube mweendeleshi wa cishi coonse ca Ijipiti.”

⁴² Mwaami wakafuula ninga yakalinga kucite keshibilo ka bwaami akufwalika Josefu kumunwe. Wakamufwalika cakufwala ca peculu cibotu alimwi akancetani kaniini ka golodi munshingo.

⁴³ Wakamupa acikoci ca maaki cabili mubwaami kwaamba ayi anokweendelaamo. Mpeeke basankwa bakaya kunembo akoolobesha ayi, “Amushiye nshila! Amushiye nshila!” Munshila iyo Josefu mbwaakabikwa kuba mweendeleshi wa cishi ca Ijipiti.

⁴⁴ Falawo wakaambila Josefu ayi, “Ndime mwaami wa cishi ca Ijipiti, alimwi taaku weelete kunyamuna lyaansa nabi mweendo kootana kusuminisha webo.”

⁴⁵ Falawo wakapa Josefu liina lya bwine Ijipiti ayi Safenati Paneya akumupa Asenati mwanaakwe Potifela, mupailishi wa kuEliopolisi, ayi eebe. Lyalo Josefu wakatalika kweenda mucishi coonse ca Ijipiti.

⁴⁶ Josefu wakalinga kucite myaaka ili 30 ndyaakatalika kusebensela Falawo mwaami wa Ijipiti. Mpeeke Josefu wakaswa mulubansa lwakwe Falawo akweenda mucishi coonse ca Ijipiti.

⁴⁷ Mumyaaka ili yosanwe ayobilo ya shakulya shiinji, myuunda yakalinga kusanyaako.

⁴⁸ Isho shoonse Josefu wakashibunganya akushisunga mumandabala anene. Mundabala yomwi ayomwi inene wakasungishaamo shakulya shakaswa mumyuunda iyo yakalinga kushingulukite ndabala iyo.

⁴⁹ Ono kwakaba shili anga ngamaila shiinji cakwaamba ayi Josefu wakacileka akupima. Wakalingabo anga ngumuseese wa kulweenge.

⁵⁰ Nsala kaitana kwisa, Josefu wakaba abaana basankwa bobilo muli Asenati.

⁵¹ Mpeeke wakaamba ayi, “Lesa wanengesha kuluba mapensho angu alimwi abamuŋanda ya bata.” Aboobo mwanaakwe wakwiiya wakamutumba ayi Manase.

⁵² Lyalo alimwi wakaamba ayi, “Lesa wampa baana mucishi ca mapensho.” Aboobo mwanaakwe wabili wakamutumba ayi Efuleemu.

⁵³ Myaaka yosanwe ayobilo ya shakulya shiinji muIjipiti yakeenda.

⁵⁴ Lyalo myaaka yosanwe ayobilo ya nsala yakatalika, bweenka bwakaamba Josefu. Nsala iyo yakaba amushishi shimwi shoonse, sombi moonse muIjipiti mwakalinga shakulya.

⁵⁵ Bene Ijipiti ndibakatalika kufwa nsala bakalilila Falawo ayi abape shakulya. Aboobo wakabaambila ayi baye kuli Josefu akucita nceenga wabalwiita.

⁵⁶ Nsala yakakomena akuba kubantu boonse muIjipiti, aboobo Josefu wakacalula matala oonse mumandabala anene akutalika kuulisha shakulya kubene Ijipiti.

⁵⁷ Bantu bakesa kuIjipiti kuswa mucishi ca panshi coonse kwisa mukuula witi kuli Josefu, mukwiinga nsala yakakalala koonse koonse.