Matalikilo 40 - Baibo Busansulushi Bwa Libuku Ili

Josefu mbwaakapandulula shiloto sha bakailinyina

¹ Mukuya kunembo, shikulama waini wa mwaami wa Ijipiti alimwi amunene wa beshikupanga shinkwa wakwe bakabisha kumwaami uyo.

² Bacinenenene bakwe bobilo abo, bakamukalasha abuumbi.

³ Aboobo wakabawaala muntolongo muŋanda ya munene wa beshikulindilila kuntolongo, umo mweenka mwakalinga kusungilwa Josefu.

⁴ Bakekala ciindi cilaamfu muntolongo, mpeeke munene wa beshikulindilila wakaambila Josefu ayi anoobatabatila.

⁵ Mashiku amwi kabali muntolongo umo, shikulama waini amunene wa beshikupanga shinkwa boonse bakaba ashiloto isho shakalinga kucite bupandulushi bupusene.

⁶ Josefu ndyaakaya mobakalinga macuunsa, wakabona ayi kuli cabafulunganya.

⁷ Mpomunyaawo wakabeepusha ayi, “Ino mutooboneka buyani kulisukama sunu?”

⁸ Bakakumbula ayi, “Soonse sobilo twaloota, ono taaku kuno weenga wapandulula nsheshaamba shiloto isho.” Josefu wakaamba ayi, “NguLesa upa busongo bwakupandulula shiloto. Amundwiite shiloto shanu.”

⁹ Lyalo shikulama waini uyo wakaamba ayi, “Muciloto cangu, ndabona cisamu ca minyansa kunembo lyangu,

¹⁰ kacicite misampi yotatwe. Mpomunyaawo ndicasonsabo aalo maluba aswa, mpeeke minyansa yapya.

¹¹ Ono ndalinga kucite nkomeshi ya mwaami mumaansa. Aboobo ndabwesa minyansa, ndatyanina munkomeshi akumupa.”

¹² Josefu wakaamba ayi, “Cilaamba bobulya, misampi yotatwe ninshiku shotatwe.

¹³ Inshiku shotatwe shaakwiinda mwaami ulaakumwaangulula akumulekelela, akumuboosha pamusena wa ncito yanu. Mulaakunoomupa nkomeshi yakwe bweenka mbomwakalinga kucita kataanshi kamucili shikumulamina waini.

¹⁴ Ono ndaseenga kwaamba ayi mukanjibaluke shintu shaakumweendela kabotu, alimwi ndaseenga kwaamba ayi mukambandikileeko kuli Falawo kwaamba ayi mukancaafwe kuswa muntolongo muno.

¹⁵ Nebo ndakacita kwiipwa kuswa mucishi ca baEbulu, alimwi akwalo kuno kuIjipiti taaku cilubo ncendakacita ceenga cankalika muntolongo.”

¹⁶ Munene wa beshikupanga shinkwa ndyaakanyumfwa ayi bupandulushi bwa ciloto ca shikulama waini bwabota, wakaambila Josefu ayi, “Anebo ndaloota. Ndalinga kunyamwite mitaanga yotatwe ya shinkwa pamutwi.

¹⁷ Mumutaanga walinga peculu, mwalinga mishobo amishobo ya shakulya shakukanga shakwe Falawo, ono bayuni balinga kulyaamo.”

¹⁸ Josefu wakakumbula ayi, “Cilaamba bobulya, mitaanga yotatwe ninshiku shotatwe.

¹⁹ Inshiku shotatwe shaakwiinda Falawo ulaakumukusha muno akuya mukumutimbula mutwi! Lyalo mubili wako ulaakuwaanjika pacisamu, mpeeke bayuni bakanooulya.”

²⁰ Pakusekelela bushiku bwakushalwa kwakwe kapeendite nshiku shotatwe, Falawo mbwaakapangila bacinenenene ba mubweendeleshi bwakwe. Wakakusha shikulama waini amunene wa beshikupanga shinkwa muntolongo akubeemika kunembo lya bacinenenene abo.

²¹ Lyalo wakaboosha shikulama waini pamulimo wakwe,

²² sombi wakatimbula mutwi wa munene wa beshikupanga shinkwa. Cakacitika bweenka bwakaamba Josefu.

²³ Nacibi boobo shikulama waini uyo taakwe kumwibalukaawo Josefu. Wakamulubililaakobo.