Matalikilo 39 - Baibo Busansulushi Bwa Libuku Ili

Josefu amuka Potifa

¹ Ono bene Ishimaeli bakatola Josefu kuIjipiti akumuulisha kuli Potifa womwi pabacinenenene ba mwaami, munene wa beshikulindilila kuŋanda ya mwaami Falawo.

² Mwaami Lesa wakalinga aJosefu alimwi wakamulengesha kuswitilila. Wakalinga kwikala muŋanda ya mwaami wakwe mwine Ijipiti,

³ uyo wakabona kwaamba ayi Mwaami Lesa wakalinga anguwe alimwi wakamulengesha ayi abe ashoolwe mushintu shoonse nshaakalinga kucita.

⁴ Potifa wakakondwa amilimo yakwe Josefu, mpeeke wakamwalulabo ayi abe musebenshi wakwe mwiine. Aboobo wakamupa bunene bwa ŋanda yakwe ashintu shakwe shoonse.

⁵ Kuswawaawo, ceebo cakwe Josefu, Mwaami Lesa wakapa coolwe bamuŋanda ya mwine Ijipiti uyo, ashintu nshaakalinga kucite muŋanda yakwe shoonse alimwi amumyuunda.

⁶ Potifa wakabika shoonse mumaansaakwe Josefu alimwi taaku ncaakalinga kubikaako maano kulekabo cakulya ncaakalinga kweelete kulya mwiine. Josefu wakalinga kwiimfwi kabotu alimwi wakalinga kuboneka kabotu abuumbi kuciwa.

⁷ Nshiku ndishakafulafula, muka mwaami wakwe wakatalika kumukumbwa, mpeeke wakasenga Josefu ayi akumanaakwe.

⁸ Wakakaka akumwaambila ayi, “Amubone mwaami wangu taaku ncaabikako maano mukwiinga ulishi kwaamba ayi mpoondi nebo. Shintu shoonse nshaacite wakashibika mumaansaangu.

⁹ Muŋanda ino ndicite nkusu shiinji anga nsheesho shaacite, alimwi taaku ncaakankashaawo muŋanda ino kulekabo ndimwe. Ono nebo inga ndacita buyani cintu cibiibi ca mushobo uyu pameenso akwe Lesa?”

¹⁰ Ono nacibi kwaamba ayi muka Potifa wakalinga kunyengelela Josefu bushiku abushiku, taakwe kukumanaakwe.

¹¹ Sombi bushiku bumwi Josefu ndyaakenjila muŋanda ayi acite mulimo wakwe, taaku musebenshi wa muŋanda umwi wakalingaamo.

¹² Lyalo muka Potifa wakacata Josefu kucakufwala ca peculu akwaamba ayi, “Kwesa tukumane.” Sombi wakapusumuka akucicila pansengwe, kushiya cakufwala mulyaansa lyakwe.

¹³ Ono muka Potifa ndyaakabona ayi washiya cakufwala cakwe ca peculu, alimwi wacicila pansengwe,

¹⁴ wakoolobesha kubasebenshi bamuŋanda akwaamba ayi, “Amubone ici! Uyu muEbulu beebaangu ngobakaleta paŋanda ino utootulamba malwesa. Wanjilila mucipinda cangu ayi ancaate nkumanaakwe, sombi ndooloma mboonkonsha.

¹⁵ Ndyaanyumfwa ayi ndooloma, wacicila pansengwe akushiya cakufwala cakwe ca peculu pafwaafwi anebo.”

¹⁶ Cakufwala ca peculu ico wakacisunga kushikila mwaami wakwe Josefu ndyaakesa kuŋanda.

¹⁷ Mpeeke wakaamba makani eenka ayo ayi, “MuEbulu musha ulya ngomwakaleta pano wakanjilila mucipinda cangu akunamba malwesa.

¹⁸ Sombi ndakooloma, lyalo wakacicila pansengwe akushiya cakufwala cakwe ca peculu pafwaafwi anebo.”

¹⁹ Mwaami wakwe Josefu wakakalala abuumbi

²⁰ cakwaamba ayi wakaangisha Josefu akumubikisha muntolongo mwakalinga kubikwa bakaili ba mwaami Falawo. Umo wakekala.

²¹ Sombi Mwaami Lesa wakalinga aJosefu alimwi wakamupa coolwe, cakwaamba ayi shintolongo wakakondwa buumi bwakwe.

²² Shintolongo uyo wakabika bakailinyina mumaansaakwe pantu pomwi ashintu shoonse shakalinga kucitika muntolongo.

²³ Ncakwiila shintolongo uyo taakalinga kubikaako amaano kushintu isho shakalinga kweendeleshekwa aJosefu mukwiinga Lesa wakalingaakwe. Ncakwiila wakalinga kumulengesha ayi abe ashoolwe mushintu shoonse nshaakalinga kucita.