Matalikilo 38 - Baibo Busansulushi Bwa Libuku Ili

Juda aTama

¹ Paciindi ico Juda wakashiya bamakwabo akuya mukwikala amusankwa wa kuAdulamu wakalinga kwiitwa ayi Ila.

² Uko Juda wakakumanya mwanakashi mwine Kenani mwanaakwe Shuwa. Wakamweeba akukumanaakwe.

³ Mpeeke wakashala mwaana musankwa uyo Juda ngwaakatumba ayi Ele.

⁴ Wakamita alimwi akushala mwaana musankwa uyo ngwaakatumba ayi Onani.

⁵ Alimwi wakashala musankwa aumwi uyo ngwaakatumba ayi Shela. Juda wakalinga kuAkisibu uyu ndyaakashalwa.

⁶ Juda wakeebela Ele mwanaakwe wakwiiya, mwanakashi wakalinga kwiitwa ayi Tama.

⁷ Buumi bwakwe Ele bwakalinga bubiibi, cakwaamba ayi Mwaami Lesa wakacimwa mpeeke wamucaya.

⁸ Ono Juda wakaambila Onani mukwabo Ele ayi, “Koya unjile muŋanda ya mulamu wako. Cita ncoelete kweelana ambooli mukwabo ibaye, kwaamba ayi mukwanu akabe abamulunyungu lwakwe.”

⁹ Nacibi boobo Onani wakalinga kwishi ayi baana teshi bakabe baakwe. Aboobo lyoonse na wakumana amwanakashi uyo, wakalinga kuwaalila panshi kwaamba ayi kubule baana ba mukwabo mulobe.

¹⁰ Ncaakacita tacikwe kukondelesha Mwaami Lesa, aboobo alakwe wakamucaya.

¹¹ Lyalo Juda wakaambila mulokashi wakwe Tama ayi, “Boolela kuli baiso, unooshiite uko kushikila mwanaangu Shela akakule.” Wakaamba boobo ceebo wakalinga kuloondete ayi Shela alakwe inga wacaikwa mbuli bamakwabo. Aboobo Tama wakaboolela kumishaabo.

¹² Mukuya kwanshiku, mukaakwe Juda wakafwa. Cililo ndicakeenda lakwe aIla mubye wa kuAdulamu, bakaya kuTimuna uko mbelele shakwe nkoshakalinga kuceswa booya.

¹³ Ono umwi muntu wakaambila Tama ayi bapongoshi bakwe batooya kuTimuna mukucesa mbelele booya.

¹⁴ Mpeeke wakafuula shakufwala shabumukalubinje akufwala kabotu, walifweka katambala koobu pameenso, akwikala pamwinjililo wa Enaimu, ndabala yakalinga munshaanshila iya kuTimuna. Wakalinga kwishi kabotu kabotu kwaamba ayi mwanaakwe Juda musankwa mwanike paboonse, Shela wakula, nacibi boobo kabatana kubeebanya.

¹⁵ Juda ndyaakamubona, wakayeeya ayi ngumufuule, ceebo wakalinga walifweka pameenso.

¹⁶ Lyalo wakaya mpwaakalinga kulubasu lwa nshila akwiipusha ayi, “Ulalipilisha shongaye?” Ncakwiila taakalinga kwishi ayi wakalinga mulokashi wakwe. Wakakumbula ayi, “Ino mutoompanshi?”

¹⁷ Juda wakaamba ayi “Ndaakukutumina mpongo yaana kuswa mulitanga lyangu.” Ono Tama wakeepusha ayi, “Anu mutoonshomeshanshi kaitana kwisa mpongo?”

¹⁸ Mpeeke Juda wakeepusha ayi, “Ulisuni ayi nkushomeshenshi?” Lyalo Tama wakakumbula ayi, “Kalamatila wa keshibilo wanu amweelo wa nguwo pantu pomwi ankooli yanu.” Mpomunyaawo Juda wakamupa shintu isho akukumanaakwe. Lyalo Tama wakamita.

¹⁹ Tama wakaya kumishaabo, wafuula katambala kakalinga pameenso akufwala shabumukalubinje alimwi.

²⁰ Juda wakatuma Ila mubye kwaamba ayi atole mpongo akubwesa shintu nshaakamupa ayi acatileemo, sombi Ila taakwe kumucana.

²¹ Mpeeke wakeepusha basankwa bamwi kuEnaimu ayi, “Anu mufuule ulya wakalinga munshaanshila uli kuli?” Bakakumbula ayi, “Takuna kubawo kale mufuule kuno.”

²² Ila wakaboolela kuli Juda akwaamba ayi, “Nshikwe kumucanaawo, alimwi basankwa bakokulya bandwiita ayi takuna kubawo kale mufuule kulya.”

²³ Juda wakaamba ayi, “Amumuleeke asunge shintu shilya. Tatusuni bantu kutuseka. Nebo ndeelesha kwaamba ayi mulipile ono tookwe kumucana.”

²⁴ Ndipakeenda ciindi cakuyanda kukwana myeenshi yotatwe, umwi muntu wakaambila Juda ayi, “Mulokashi wako Tama, wakalinga kucita anga ngumufuule ono bulya ulimitite.” Mpomunyaawo Juda wakaambila bantu ayi, “Amumukusheemo, mumutole mukamuteente kushikila afwe.”

²⁵ Ndyaakalinga kuya cikushikwa mundabala wakatumya nkombe kubapongoshi bakwe ayi, “Ndamitishikwa amusankwa mwine shintu ishi. Amushiboone, mushibe na kalamatila wa keshibilo amweelo wa nguwo, pantu pomwi ankooli iyi nshakwaani.”

²⁶ Juda shintu isho wakashishiba akwaamba ayi, “Lakwe wakalulika kwiinda ndime, mukwiinga nebo ndime ndakabisha kutamupa Shela mwanaangu ayi beebane kweelana mbondakalasha.” Kuswawaawo Juda taakwe kukumanaakwe alimwi.

²⁷ Ciindi cakutumbuka ndicakashika, cakashibikwa ayi utootumbuka baana bampundu.

²⁸ Ndyaakalinga kutumbuka, mwaana umwi wakakusha lyaansa. Mpeeke ushikutumbusha wakalicata, walyaanga busalu bufubela, akwaamba ayi, “Uyu ngomutaanshi kushalwa.”

²⁹ Nacibi boobo wakaboosha lyaansa mukati alimwi, mpeeke mukwabo wakataanguna kushalwa. Lyalo shikutumbusha wakaamba ayi, “Anu mbowaswa bulya!” Aboobo bakamutumba ayi, Pelisi.

³⁰ Mpeeke mukwabo wabusalu bufubela kulyaansa alakwe wakashalwa. Mpeeke bakamutumba ayi Sela.