Matalikilo 37 - Baibo Busansulushi Bwa Libuku Ili

¹ Jakobo wakatolelela kwikala mucishi ca Kenani umo mwakalinga kwikala baishi.

² Ono ici ncikani ca bamuŋanda yakwe Jakobo. Josefu, cikulabwaangu wa myaaka likumi ayosanwe ayobilo, wakalinga ngushikweembela mbelele ampongo abamakwabo basankwa baana bakwe Biluya aSilupa bakasuwa bakwe Jakobo. Ono wakalinga kuluula nshebakalinga kucita.

³ Jakobo wakalinga kusuni Josefu abuumbi kwiinda bana bakwe bamwi ceebo wakamushalila kubucembele. Wakamutungila cakufwala ca peculu cibotu cilaamfu maansa.

⁴ Mpeeke bamakwabo ndibakabona kwaamba ayi ishiwabo ulisunishi Josefu kwiinda mbabo, bakamupata cakwaamba ayi tebakalinga kusuni akwaambaakwe mukabotu.

⁵ Bushiku bumwi Josefu wakalota. Ono ingayi alwiite bamakwabo, bakeendaawo kumupata.

⁶ Wakabalwiita ayi, “Amukutike mbondalota.

⁷ Soonse twalinga mumuunda katwaanga mile ya witi, mule wangu ndiwaliimika cakuteengashila. Mpeeke yaanu yashinguluka waangu akuukotamina.”

⁸ Mpomunyaawo bamakwabo bakeepusha ayi, “Sa utoyeeya ayi ulaakuba mwaami akulela ndiswe?” Aboobo bakeendaawo kumupata ceebo ca shiloto shakwe alimwi anshaakalinga kwaamba pali mbabo.

⁹ Lyalo Josefu wakalota alimwi. Mpeeke wakaambila bamakwabo ayi, “Ndaloota alimwi akubona lisuba, mweenshi anyenyeenshi likumi ayomwi shankotamina.”

¹⁰ Ndyaakalwiitaako abaishi ciloto ico, bakamukalalila akwaamba ayi, “Anu nciloto buyani acalo ico? Sa utoyeeya kwaamba ayi banyoko, bamakwanu anebo tulaakwisa mukukukotamina?”

¹¹ Bamakwabo Josefu bakafwa munyono, sombi baishi, cikani ici bakalinga kuciyeeya lyoonse.

Josefu mbwaakoolishikwa akutolwa kuIjipiti

¹² Bumwi bushiku bamakwabo Josefu bakaya mukweembelela kuShekemu.

¹³ Jakobo wakaambila Josefu ayi, “Ndisuni kwaamba ayi uye kuShekemu, uko bamakwanu nkobatokweembelela.” Josefu wakakumbula ayi, “Ncibotu.”

¹⁴ Baishi bakaamba ayi, “Koya ukabone na bamakwanu bali kabotu alimwi mbelele ampongo na shili kabotu. Lyalo ukese ukandwiite.” Mpeeke baishi bakamutuma kuswa mucinyika ca Ebuloni. Josefu wakashika kuShekemu

¹⁵ alimwi wakalinga kuyandoola uku akooku muluundu uko. Lyalo muntu umwi wamucana akumwiipusha ayi, “Ino utooyandoolanshi?”

¹⁶ Wakakumbula ayi, “Ntooyandoola bamakwesu batokweembela mbelele ampongo. Sa inga mwandwiita nkobabete?”

¹⁷ Musankwa uyo wakaamba ayi, “Baswaako kale. Ndabanyumfwa kabaamba ayi batooya kuDotani.” Mpomunyaawo Josefu wakabakonkela akubacana kuDotani.

¹⁸ Bamakwabo abo bakamubona kaacilibo kulaale. Ono kaatana kushika bakapangana ayi bamucaaye.

¹⁹ Bakalwiitana ayi, “Inoolya shikulota waashika.

²⁰ Ono atumucaaye, mubili wakwe tuuwaale mumukalo womwi wakayuminina. Inga twaya mukwaamba ayi walumwa munyama wamuluundu. Lyalo tukabone shiloto shakwe mbweshi shikabe.”

²¹ Lubeni wakabanyumfwa, mpeeke wakeelesha kupulusha Josefu. Wakaamba ayi, “Tutamucaayi,

²² tumuwaalebo mumukalo umu wa muluundu muno, sombi tutamuciisi.” Wakaamba boobo kaasuni kumupulusha kuli mbabo akumutuma kuli baishi.

²³ Josefu ndyaakashika pabamakwabo, bakamufuula cakufwala cakwe capeculu cilaamfu maansa.

²⁴ Lyalo bakamubwesa akumuwaala mumukalo wakalinga kuyuminite.

²⁵ Ndibakalinga kulya, bakabonabo likoto lya bene Ishimaeli kabali pamushinso wakuswa kuGilyadi kuya kuIjipiti. Ngamela shabo shakalinga kuyumwite mashina a shisamu anunkila kabotu, misamu alimwi amule.

²⁶ Mpomunyaawo Juda wakaambila bamakwabo ayi, “Tutoocanamoonshi mukucaya mukwabesu akushisa cikani ici? Taakuuwo.

²⁷ Atumuulishebo kubene Ishimaeli aba, kwiinda kwaamba ayi tumuciise. Uyu ngumukwabesu kale, bulowa bomwi.” Bamakwabo bakasumina.

²⁸ Lyalo beshimakwebo bamwi bene Midyani ndibakashika pafwaafwi, bamakwabo bakamukwelaamo mumukalo akumuulisha maali asilifa ali makumi obilo kubene Ishimaeli abo bakamutola kuIjipiti.

²⁹ Lubeni ndyaakaboola pamukalo uyo akucana Josefu taamo, wakakwamoona shakufwala shakwe mubuumba.

³⁰ Wakaboolela kubamakwabo akubaambila ayi, “Mwanike taamo! Anu ntoocita buyani?”

³¹ Mpeeke bakacaya mpongo akukulubinganya cakufwala cakwe ca peculu mubulowa bwa njiyo.

³² Lyalo bakabwesa cakufwala ico akucitola kuli baishiwabo akubaambila ayi, “Twakacana ceeci. Sa ncamwanaanu?”

³³ Wakacishiba akwaamba ayi, “Ee, ncaakwe! Munyama wamucaya. Ncakwiila mwanaangu Josefu wakwamoonwa mutupanshapansha!”

³⁴ Jakobo wakakwamoona shakufwala mubuumba akufwala masaka. Wakamulila mwanaakwe kwa ciindi cilaamfu.

³⁵ Mpeeke boonse bana bakwe basankwa abanakashi bakesa mukumutontosha kulila, sombi wakakaka akwaamba ayi, “Ndaakufwitaamobo kaandila mwanaangu musankwa.” Aboobo wakatolelela kulila Josefu mwanaakwe.

³⁶ Paciindi ico, muIjipiti, bene Midyani balya bakoolisha Josefu kuli Potifa, womwi pabacinenenene bakwe Falawo, uyo wakalinga munene wa beshikulindilila kuŋanda yakwe Falawo.