Matalikilo 36 - Baibo Busansulushi Bwa Libuku Ili

Bamulunyungu lwakwe Esau

¹ Aba mbobamulunyungu lwakwe Esau uyo wiitwa alya Edomu.

² Esau wakeeba balutundu bene Kenani. Mutaanshi nguAda mwanaakwe Eloni mwine Iti, umwi nguOolibama mwanaakwe Ana mwaana musankwa wakwe Sibyoni mwine Ifi.

³ Aumwi nguBasemati mwanaakwe Ishimaeli alimwi nankashi yakwe Nebayoti.

⁴ Ada wakashala Elifasi, Basemati wakashala Luwelo,

⁵ alakwe Oolibama wakashala Jeyushi, Jalamu, alimwi aKola. Aba baana basankwa boonse Esau wakabashalila kucishi ca Kenani.

⁶ Kuswakooko Esau wakabwesa bamakaakwe, bana bakwe basankwa abanakashi. Wakabwesa bamuŋanda yakwe bamwi boonse, shifubwa ashintu shakwe shoonse nshaakabaasho mucishi ca Kenani. Wakaswaako uko akuya kucishi cimwi kushiya Jakobo mukwabo.

⁷ Wakaswaako ceebo musena mpobakalinga kushiite aJakobo wakaceya kwaamba ayi boonse bobilo kabashiite pantu pomwi. Bakalinga kufubite abuumbi cakwaamba ayi cakayuma kwikala boonse.

⁸ Aboobo Esau wakekala mucishi ca tulundu ciitwa ayi Edomu.

⁹ Bamulunyungu lwakwe Esau nkokwaamba ayi bashali bakulukulu ba bene Edomu mbaaba.

¹⁰ Elifasi mwanaakwe Ada muka Esau, Luwelo mwanaakwe Basemati muka Esau.

¹¹ Elifasi wakashala baana basankwa, meena abo ngaaya, Temani, Oma, Sefo, Gatamu aKenasi.

¹² Elifasi wakalinga kucite kasuwa wiitwa ayi Timuna uyo wakamushalila Amaleki. Aba bakalinga bashikulu bakwe Ada muka Esau.

¹³ Luwelo alakwe wakashala bana basankwa ameena abo ngaaya, Naati, Sela, Shama, aMisa. Aba bakalinga bashikulu bakwe Basemati muka Esau.

¹⁴ Muka Esau, Oolibama mwanaakwe Ana mwanakashi, mwanaakwe Sibyoni musankwa wakashala baana botatwe basankwa. Meena abo ngaaya, Jeyushi, Jalamu alimwi aKola.

¹⁵ Iyi njemikowa yakaswa mulunyungu lwakwe Esau. Mwanaakwe Esau musankwa mutaanshi, Elifasi ngumushali mukulukulu wa mikowa iyi, Temani, Oma, Sefo, Kenasi,

¹⁶ Kola, Gatamu alimwi aAmaleki. Aba boonse bakalinga bamulunyungu lwakwe Ada muka Esau.

¹⁷ Luwelo mwanaakwe Esau musankwa wakalinga ngomushali mukulukulu wa mikowa iyi, Naati, Sela, Shama, aMisa. Aba boonse bakalinga bamulunyungu lwakwe Basemati muka Esau.

¹⁸ Mikowa yakaswa mulunyungu lwakwe Oolibama muka Esau mwanaakwe Ana mwanakashi njeeyi, Jeyushi, Jalamu alimwi aKola.

¹⁹ Iyi yoonse mikowa yakaswa mulunyungu lwakwe Esau.

Bamulunyungu lwakwe Siya

²⁰ Bana basankwa bakwe Siya mwine Oli bakalinga kwikala mucishi ico mbaaba. Lotani, Shobali, Sibyoni, Ana,

²¹ Dishoni, Esa alimwi Dishani. Aba bakalinga mbobamaami ba bene Oli mucishi ca Edomu.

²² Lotani wakalinga ngomushali mukulukulu wa mikowa iyi, Oli aEmani. Lotani wakalinga kucite nankashi yakwe wiitwa ayi Timuna.

²³ Shobali wakalinga ngomushali mukulukulu wa mikowa iyi, Alafani, Manaati, Ebali, Shefo alimwi aOnamu.

²⁴ Sibiyoni wakalinga kucite baana basankwa bobilo, Aiya aAna. Uyu ngoAna wakacana kantupu ka maanshi alungula muluundu kaaembela mbongolo sha baishi.

^25-26 Ana wakalinga ngoishi Dishoni uyo wakalinga mushali mukulukulu wa mikowa iyi, Emudani, Eshibani, Itilani aKelani. Ana wakashala amwanakashi wakatumbwa ayi Oolibama.

²⁷ Esa wakalinga ngomushali mukulukulu wa mikowa iyi, Biluani, Safani alimwi aAkani.

²⁸ Dishani wakalinga ngomushali mukulukulu wa mikowa iyi, Usi alimwi aAlani.

²⁹ Mikowa ya bene Oli mucishi ca Edomu njeeyi, Lotani, Shobali, Sibyoni, Ana,

³⁰ Dishoni, Esa, aDishani.

Bamaami ba muEdomu

³¹ Meena a baami bakeendelesha cishi ca Edomu mukubalana, mucishi ca Isilaeli kamutana kuba mwaami nabi womwi, ngaaya.

³² Bela mwanaakwe Beyo. Ndabala yakwe inene yakatumbwa ayi Dinaaba.

³³ Bela ndyaakafwa, Jobabu mwanaakwe Sela kuswa kuBosila ngowakapyana bwaami bwakwe.

³⁴ Jobabu ndyaakafwa, Ushamu kuswa kucishi ca bene Temani ngowakapyana bwaami bwakwe.

³⁵ Ushamu ndyaakafwa, Adadi mwanaakwe Bedadi uyo wakakoma bene Midyani kunkondo yakalinga mucishi ca Moabu, ngowakapyana bwaami bwakwe. Ndabala yakwe inene yakeetwa ayi Afiti.

³⁶ Adadi ndyaakafwa, Samula kuswa kuMasileka, ngowakapyana bwaami bwakwe.

³⁷ Samula ndyaakafwa, Shaulo kuswa kuLeoboti muloombe lwa mulonga, ngowakapyana bwaami bwakwe.

³⁸ Shaulo ndyaakafwa, Baali Anani mwanaakwe Akibo musankwa, ngowakapyana bwaami bwakwe.

³⁹ Baali Anani mwanaakwe Akibo ndyaakafwa, Adadi ngowakapyana bwaami bwakwe. Ndabala yakwe inene yakatumbwa ayi Pau alimwi mukaakwe wakalinga Meetabelo, mwanaakwe Matiledi alimwi mwishikulu mwanakashi wakwe Mesaabu.

⁴⁰ Esau wakalinga ngomushali mukulukulu wa mikowa ya bene Edomu iyi, Timuna, Alufa, Jeteti,

⁴¹ Oolibama, Ela, Pinoni,

⁴² Kenasi, Temani, Mibusa,

⁴³ Magidiyelo alimwi aIlamu. Musena uli woonse uko mukowa womwi awomwi nkowakalinga kwikalila kuleetwa liina lyeenka lya mukowa uyo.