Matalikilo 35 - Baibo Busansulushi Bwa Libuku Ili

Lesa mbwaakapa coolwe Jakobo kuBetelo

¹ Lesa wakaambila Jakobo ayi, “Bulya onoono koya kuBetelo ukekaale nkuko. Ukanjakile cipaililo uko, neLesa uyo wakaboneka kuli ndiwe ndiwakalinga kucica nandumi yako Esau.”

² Aboobo Jakobo wakaambila bamuŋanda yakwe abamwi boonse mbwaakalingaabo ayi, “Amusowe balesa beensu mbomucite, amulisalashe, mufwale shakufwala shili kabotu.

³ Tutooswaako kuno akuya kuBetelo uko nkweshi nkayakile Lesa cipaililo, uyo wakancafwa muciindi ca makatasho alimwi uyo wakalinga anebo kuli koonse nkondakaya.”

⁴ Aboobo bakapa Jakobo balesa beensu boonse amasikiyo ngobakalinga kufwete. Mpeeke lakwe wakashifukila muunshi lya mubanga pafwaafwi andabala ya Shekemu.

⁵ Jakobo abana bakwe ndibakalinga kunyamuka, bantu ba mumandabala akalinga pafwaafwi bakanyumfwa boowa buswa kuli Lesa. Aboobo tabakwe kubakonkela ayi babalwaane.

⁶ Jakobo wakashika abantu bakwe boonse kuLusi, uko kwiitwa ayi Betelo bulya, mucishi ca Kenani.

⁷ Wakayaka cipaililo uko akutumba musena uyo liina lya Lesa wa kuBetelo, mukwiinga apo peenka Lesa wakaliyubulula kuli nguwe ndyaakalinga kucica mukwabo.

⁸ Ono musebenshi wakwe Labeka wiitwa ayi Debola, wakafwa alimwi bakamufukila muunshi lya mubanga kumalenge a Betelo. Aboobo bakautumba ayi, “Mubanga wakulila.”

⁹ Jakobo ndyaakaboolela kuswa kuMesopotamya, Lesa wakaboneka alimwi kuli nguwe akumupa coolwe.

¹⁰ Lesa wakamwaambila ayi, “Liina lyako ndiwe Jakobo, sombi kuswa sunu ndiwe Isilaeli.” Munshila iyo Lesa wakamutumba ayi Isilaeli.

¹¹ Lyalo Lesa wakaamba ayi, “Ndime Lesa Shinkusu shoonse. Koba abaana baanji. Mishobo iinji ilaakuswa mulunyungu lwako alimwi ulaakuba mushali wa bamaami.

¹² Ndaakukupa cishi ncendakapa Abulaamu aIsaki alimwi ndaakucipa abamulunyungu lwako webo waakufwa.”

¹³ Lyalo Lesa wakamushiya.

¹⁴ Palya peenka Lesa mpaakaamba kuli nguwe, Jakobo wakabikaawo libwe lyakwiibalukilaawo akulisalasha kwiinda mukupuumwitaawo waini alimwi amafuta a olifi.

¹⁵ Mpomunyaawo wakatumbaawo ayi Betelo.

Lakelo mbwaakafwa

¹⁶ Ono Jakobo abamuŋanda yakwe bakaswaako kuBetelo. Sombi ndibakashika kufwaafwi aEfulati, Lakelo mumala mwakabuka. Ono cakashupa kutumbuka.

¹⁷ Mumala ndimwakashinisha kunyona, shikutumbusha wakaamba ayi, “Mutaloondi baLakelo ngumusankwa alimwi.”

¹⁸ Sombi Lakelo wakalinga kuya cifwa, mpeeke ndyaakayanda kutula moyo wakatumba mwanaakwe ayi Benoni, nakubi boobo baishi bakamutumba ayi Benjameni.

¹⁹ Lakelo ndyaakafwa, bakamubika mweela nshila iya kuEfulati uko bulya kwiitwa ayi Betileemu.

²⁰ Jakobo wakabikaawo libwe lyakwiibalukilaawo apo. Ono abobulya licitondesha cuumbwe cakwe Lakelo.

²¹ Jakobo wakatolelela lweendo lwakwe akuyaka misumba kulubasu lumwi lwa ŋanda ilaamfu ya Eda.

Bana basankwa bakwe Jakobo

²² Jakobo ndyaakalinga kwikala mucishi ico, Lubeni wakakumana aBiluya, womwi wa bakasuwa ba baishi. Jakobo wakacinyumfwa cikani ici alimwi wakakalala abuumbi. Jakobo wakalinga kucite baana bali likumi abobilo.

²³ Bana bakwe Leya basankwa bakalinga Lubeni, uyo wakalinga ngomwaana musankwa munene wakwe Jakobo, Simyoni, Lefi, Juda, Isaka, aSebuluni.

²⁴ Bana bakwe Lakelo nguJosefu alimwi aBenjameni.

²⁵ Bana bakwe Biluya, musha wakwe Lakelo nguDani alimwi aNafutali.

²⁶ Bana bakwe Silupa, musha wakwe Leya, nguGadi alimwi aAsha. Aba baana bakashalilwa kuMesopotamya.

Isaki mbwaakafwa

²⁷ Mpeeke Jakobo wakaya kuli baishi baIsaki kuMamule, pafwaafwi aEbuloni, uko Abulaamu aIsaki nkobakekala.

²⁸ Isaki wakekala myaaka ili 180

²⁹ akufwa kaali wacembela abuumbi. Mpeeke Esau aJakobo bana bakwe basankwa, bakamubika.