Matalikilo 34 - Baibo Busansulushi Bwa Libuku Ili

Daina abene Shekemu

¹ Bumwi bushiku Daina mwanaakwe Jakobo aLeya wakaya mukufwakashisha balutundu bamwi bene Kenani.

² Ono Shekemu mwanaakwe Amo mwine Ifi, uyo wakalinga mwaami wa musena uyo ndyaakamubona, wakamucata akukumanaakwe.

³ Mpeeke wakamukonda abuumbi mwanakashi uyo, aboobo wakeelesha kumunyengelela.

⁴ Wakaambila baishi ayi, “Ndisuni kwaamba ayi munjebele mwanakashi uyu.”

⁵ Jakobo wakanyumfwa kwaamba ayi mwanaakwe mwanakashi wasebanishikwa, sombi ceebo cakwaamba ayi bana bakwe basankwa bakalinga kucili mumyuunda ashifubwa, taaku ncaakacita kushikila baboola.

⁶ Baishi Shekemu, baAmo bakanyamuka kwaamba ayi bakabandike aJakobo.

⁷ Lyalo bakapolenshanyabo abana bakwe Jakobo basankwa kabaswa mumyuunda. Ndibakacinyumfwa cikani ico, bakakankamana akukalala abuumbi pacintu cakacita Shekemu, ico cilensha nsoni kubene Isilaeli, ndyaakacata mwanaakwe Jakobo akukumanaakwe.

⁸ Amo wakaamba ayi, “Mwanaangu musankwa Shekemu wamufwita abuumbi mwanaako mwanakashi, ono ndaseenga ayi usuminishe amweebe.

⁹ Atusuminishanye kwaamba ayi kube kweeba akweebesha pakati ka bantu besu abene mishaanu.

¹⁰ Mpomunyaawo inga wekala aswebo muno mucishi cesu. Inga wekala pali poonse mpweenga koosuni akucita makwebo cakwaanguluka alimwi akuba ashintu shako muno.”

¹¹ Lyalo Shekemu wakaambila baishi Daina abanandumi bakwe ayi, “Amunyumfwileko nkumbu, ndaakumupa cili coonse ncemusuni.

¹² Amundwiite shipo nshemusuni, alimwi shakweebesha mushifuushe kweelana ambomusuni. Ndaakumupa cili coonse nceshi mukandilile, na musuminishebo ayi mweebe.”

¹³ Ono ceebo cakwaamba ayi Shekemu wakalinga wasebaanya Daina nankashi yabo, bana bakwe Jakobo basankwa bakakumbula Shekemu abaishi baAmo cakuleya.

¹⁴ Bakamwaambila ayi, “Tatukoonshi kusuminisha ayi nankashi yesu eebwe kumusankwa utapalwitwe. Ico inga caleta musebaanyo pakati kesu.

¹⁵ Inga twasuminabo na caba cakwaamba ayi mwebo mwaba mbuli ndiswe mukupalula bansankwa boonse pakati kanu.

¹⁶ Lyalo inga twasumina kweeba akweebesha pakati ka bantu besu abaanu. Tulaakwikala pakati kanu alimwi tulaakuba bantu bamushobo womwi amwebo.

¹⁷ Ono na mubule kusumina kucita boobo mbotwaamba akupalulwa, tutoobwesa nankashi yesu akuya.”

¹⁸ Ici cakaboneka cuubu kuli Amo amwanaakwe musankwa Shekemu.

¹⁹ Aboobo cikula bwangu uyo taakwe kumana ciindi mukucita ceeco cakaambwa ayi acite, ceebo wakalinga kumusuni abuumbi mwanaakwe Jakobo mwanakashi. Cikulabwangu uyo wakalinga muntu ulemekwa abuumbi pakati ka bamuŋanda ya baishi.

²⁰ Amo amwanaakwe Shekemu bakaya kumusena wacisenkane kumwinjililo wa ndabala inene iyo akubandika abamundabalanyinaabo.

²¹ Bakaamba ayi, “Bantu aba mbacisangalashi. Atubasuminishe kwikala mucishi cino alimwi banokweenda cakwaanguluka. Cishi cesu ncinene, inga abalo bekalaamobo. Katweeba pakati kabo aswebo katweebesha kuli mbabo.

²² Sombi bantu abo balaakusumina kwikala aswebo akuba bantu bamushobo womwi andiswe, kulilabo na twaba mbuli mbabo kwiinda mukupalula basankwa boonse pakati kesu.

²³ Mulishibo na caba boobo shifubwa ashintu shabo shimwi inga shaba shesu. Anu atusumine kwaamba ayi bekale pakati kesu.”

²⁴ Bamundabala inene iyo boonse bakasumina cakaamba Amo aShekemu, alimwi boonse basankwa bakapalulwa.

²⁵ Ndipakeenda nshiku shotatwe shiloonda shakupalulwa kashicicisa, bana bakwe Jakobo basankwa bobilo, Simyoni aLefi, banandumi bakwe Daina, bakabwesa mipeeni akuya mundabala inene cakutabonekaawo ayi kuli ncebatooya mukucita. Bakacaya basankwa boonse,

²⁶ kubikaawo aAmo alimwi amwanaakwe musankwa Shekemu. Lyalo bakabwesa Daina kuswa muŋanda yakwe Shekemu akuya.

²⁷ Kucaya ndikwakamana, bana bakwe Jakobo bamwi basankwa bakacita cimfulunganya mundabala, mukuboosha cishole pamusebaanyo ngobakacita pali nankashi yabo.

²⁸ Bakabwesa matanga ambelele, ŋombe, mbongolo alimwi ashintu shimwi shoonse mundabala inene iyo amumyuunda.

²⁹ Bakabwesa shintu shoonse shamakwebo, bakacata balutundu boonse abanike, akunyamuna shintu shoonse mumaanda.

³⁰ Lyalo Jakobo wakaambila Simyoni aLefi ayi, “Mwaleta makatasho pali ndime. Bulya bene Kenani, bene Pelisi, abamwi boonse mucishi batoompata. Nshicite basankwa baanji. Na bakalibuunge kwaamba ayi bandwaane, nebo amwebo noonse nobamuŋanda yangu tulaakunyonyoolwa.”

³¹ Sombi bakakumbula ayi, “Tatukoonshi kuleka nankashi yesu kabamucita anga ngumufuule wa bafuule.”