Matalikilo 33 - Baibo Busansulushi Bwa Libuku Ili

Jakobo mbwaakakumana aEsau

¹ Mpeeke Jakobo ndyaakeenamuka wakabona Esau keesa abasankwa bakwe bakalinga myaanda yone. Mpomunyaawo wakapatoola bana bakwe kupa Leya, Lakelo abakasuwa bakwe bobilo.

² Lyalo wakatanjishaako bakasuwa bakwe abana babo, pesule lyabo wakabika Leya abana bakwe, kwisule lyabo wakabika Lakelo aJosefu.

³ Jakobo wakatanjila kunembo akufukama akushisha ciwa panshi mankanda osanwe aobilo kaaya kumukwabo.

⁴ Nakubi boobo Esau lakwe wakacica akukumbata Jakobo alimwi akumufyonta. Boonse bobilo bakalinga kulila.

⁵ Esau ndyaakacebooka akubona balutundu alimwi abaana wakeepusha ayi, “Mbaani bantu aba mbooli abo?” Jakobo wakakumbula ayi, “Nkambo, aba mbaana abo Lesa mbwaakampa ceebo ca luse lwakwe.”

⁶ Mpeeke bakasuwa bakwe bakesa abana babo bafukama.

⁷ Lyalo Leya abana bakwe bakesa, bakacaalila kwisa mukufukama, nguJosefu aLakelo.

⁸ Kuswawaawo Esau wakeepusha ayi, “Ino likoto limwi lilya ndindakumanya lilaambanshi?” Jakobo wakakumbula ayi, “Nkwaamba ayi mukondeleshe, nkambo.”

⁹ Sombi Esau wakaamba ayi, “Ndicite shiinji mukwaabo. Bamba nshoocite omwiine.”

¹⁰ Jakobo wakaamba ayi, “Sobwe, na mwandekelela amutambule cipo cangu ici. Mukwiinga kubona ciinso canu cilyeelenebo akubona cakwe Lesa, bulya mbomwalinga kutondesha bushicibusa kuli ndime.

¹¹ Ndaseenga mutambule cipo ncendamuletela. Lesa wakalinga kunyumfwila luse, aboobo wakampa shoonse nsheensuni mubuumi.” Jakobo wakatolelela kumusenga kushikila wakasumina.

¹² Esau wakaamba ayi, “Atulibambile kunyamuka. Nebo ntootanjila.”

¹³ Jakobo wakakumbula ayi, “Mulishi kwaamba ayi banike tabacikoonshi kweenda. Alimwi ndyeelete kuyeeyela mbelele ashimwi shifubwa pantu pomwi abaana ba nshisho. Na caba cakwaamba ayi sheenda bushiku boonse cakuteemikanaawo, inga shamana kufwa.

¹⁴ Nkambo, amutanjile anebo ndanoosa paniininiini. Ndanoosa mumukanyu ukonsha shifubwa abanike kushikila nkamucane kuEdomu.”

¹⁵ Mpeeke Esau wakaamba ayi, “Anu leka nkushiile basankwa bangu bamwi.” Sombi Jakobo wakakumbula ayi, “Tau, taceelete kuba boobo mukwiinga nebo ndisunibo kwaamba ayi mukondeleshe.”

¹⁶ Lyalo bushiku bweenka ubo Esau wakanyamuka kuboolela kuEdomu.

¹⁷ Sombi Jakobo wakaya kuSakoti uko nkwaakaliyakila ŋanda alimwi ashimpati sha shifubwa shakwe. Nceceeco musena uyo wakatumbwa ayi Sakoti.

¹⁸ Pakuboolela kuswa kuMesopotamya wakashikabo kabotu pandabala inene ya Shekemu mucishi ca Kenani akuyaka misumba mumuunda wakalinga pafwaafwi andabala inene iyo.

¹⁹ Palubasu lwa muunda apo wakapaula maali asilifa ali mwaanda kubamulunyungu lwakwe Amo ishi Shekemu.

²⁰ Wakayakaawo cipaililo akucitumba ayi Eli, liina lyakwe Lesa wa bene Isilaeli.