Matalikilo 32 - Baibo Busansulushi Bwa Libuku Ili

Jakobo mbwaakalibambila kukumana aEsau

¹ Jakobo ndyaakalinga kuya mulweendo lwakwe wakakumana abaanjelo.

² Ndyaakababona wakaamba ayi, “Iyi njimisumba yakwe Lesa.” Paceebo ceeco musena uyu wakautumba ayi Maanaimu.

³ Jakobo wakatanjisha bantu kuli Esau mukwabo mumusena wa Siya mucishi ca Edomu ayi batole nkombe.

⁴ Wakabalwiita ayi baambile Esau ayi, “NeJakobo musebenshi wanu unyumfwila, ntooluula kuli Esau mwaami wangu ayi ndakalinga kwikala abaLabani alimwi ayi ndakacelwa kupiluka kushika sunu.

⁵ Ndicite ŋombe, mbongolo, mbelele, mpongo alimwi abasha basankwa abanakashi. Ono nkambo, ndatuma maswi mukulangila kwaamba ayi inga ndacana kulekelelwa.”

⁶ Mbwaakatuma ndibakaboola kuli Jakobo, bakaamba ayi, “Twashika kubakwabanu baEsau alimwi bulya bali kale munshila kwaamba ayi bamukumanye. Banyamuka abasankwa bali myaanda yone.”

⁷ Jakobo wakaloonda akulisukama. Bantu mbwaakalingaabo wakabapansaanya mumakoto obilo pantu pomwi ambelele, mpongo, ŋombe alimwi angamela shakwe.

⁸ Wakayeeya kwaamba ayi, “Na Esau ese alwane likoto litaanshi likoto limwi licice akuloboka.”

⁹ Mpomunyaawo Jakobo wakapaila ayi, “Lesa wa bakaapa baAbulaamu alimwi abaIsaki bata, amunkutike! Nkambo, mwakandwiita ayi mpiluke kucishi cine misheesu alimwi kuli beshikamukowa bangu. Mwakaamba ayi mulaakunyenshela kabotu shintu shoonse.

¹⁰ Nebo nsheeleteewo ankuumbu shoonse nshimwakabaasho akushomeka nkomwantondesha nemusebenshi wanu. Ndakasubuka mulonga wa Joodani kaantaciteewo kantu nakaceyi sombibo nkoli, ono ndapiluka amakoto obilo aya.

¹¹ Ndapaila ayi mumpulushe kuswa kumukwesu Esau. Ndaloonda kwaamba ayi utoosa mukundwana akutunyonyoola soonse pantu pomwi abanakashi alimwi abaana.

¹² Amwiibaluke kwaamba ayi mwakandasha ayi mulaakunyenshela shintu shoonse kabotu akumpa bamulunyungu abo muntu mbaatakoonshi kubelenga, nkokwaamba ayi baanji anga ngumuseese wa muloombe lwa lweenge.”

¹³ Jakobo wakoona apo. Lyalo bushiku bwakaboolaawo wakabambila Esau mukwabo cipo. Wakapatula

¹⁴ mpongo shanakashi myaanda yobilo, bapeepe makumi obilo, mbelele shanakashi shili myaanda yobilo, shisankwa makumi obilo,

¹⁵ ngamela shicite twaana shili makumi otatwe, mpwishi makumi one, bacende likumi, mbongolo shanakashi shili makumi obilo alimwi ashisankwa likumi.

¹⁶ Mpeeke wakashipansaanya mumatangamatanga akupa litanga lyomwi alyomwi kumusebenshi womwi awomwi. Wakabaambila ayi, “Amutanjile kamuya alimwi mweende cakushiya musena pakati ka litanga lyomwi alimwi litookonkela pesule.”

¹⁷ Mpomunyaawo wakalwiita musebenshi wakatanjila ayi, “Na Esau mukwesu akukumanye akukwiipusha ayi, ‘Mwaami wako ngani? Utooya kuli? Ngani mwine shifubwa ishi shoonse shili kunembo lyako?’

¹⁸ ulyeelete kukumbula ayi, ‘Nsha musebenshi wanu Jakobo. Watumina Esau mwaami wakwe ayi ncipo. Jakobo mwiine utoosa mwisule lyesu.’ ”

¹⁹ Wakapa mulasho womwi weenka uyo kuwabili, watatu akubamwi boonse bakalinga bapekwa litanga litanga kwaamba ayi balame. Wakaamba ayi, “Noonse mulyeelete kwaamba bweenka ubo na mumukumanye Esau.

²⁰ Kutalubaako kwaamba ayi, ‘Jakobo musebenshi wanu utoosa alakwe pesule.’ ” Jakobo wakalinga kuyeeya ayi, “Ntoomukalika moyo kwiinda mushipo ishi alimwi na tukumane mpashi utoondekelela.”

²¹ Wakatanjisha shipo mpeeke lakwe mashiku ayo wakoona pamusumba.

Jakobo mbwaakatintana amunjelo wakwe Lesa

²² Mashiku eenka ayo Jakobo wakabuka, wabwesa bamakaakwe bobilo, bakasuwa bobilo, abaana bakwe bali likumi awomwi, akusubuka Mulonga wa Jaboku.

²³ Ndyaakamana kubasubusha, wakasubusha ashoonse nshaakalinga kucite.

²⁴ Sombi lakwe wakacaala eenka. Lyalo musankwa wakesa akutintanaakwe kushikila lisuba kaliyanda kuswa.

²⁵ Musankwa uyo ndyaakabona ayi taatookoma, wakooma Jakobo kukasolo, mpeeke kakashukumukaamo mulinungi.

²⁶ Lyalo musankwa uyo wakaamba ayi, “Ndeke nooya, kutooya cituba.” Jakobo wakakumbula ayi, “Teshi nkuleeke, sombibo na umpe coolwe.”

²⁷ Musankwa uyo wakeepusha ayi, “Anu ndiwaani webo?” Wakakumbula ayi, “Ndime Jakobo.”

²⁸ Mpomunyaawo musankwa uyo wakaamba ayi, “Liina ilyo sunu lyamana. Walwishanya aLesa alimwi abantu sombi wakooma. Paceebo ceeco liina lyako ono litooba Isilaeli.”

²⁹ Mpeeke wakaamba ayi, “Anebo ndwiite liina lyako.” Sombi wakakumbula ayi, “Ino ceebonshi ulisuni kwishiba liina lyangu?” Lyalo wakapa coolwe Jakobo.

³⁰ Jakobo wakaamba ayi, “Ndabonana aLesa meenso ameenso alimwi ncili muumi.” Paceebo ceeco musena uyo wakautumba ayi Penyelo.

³¹ Lisuba lyakalinga kuya buswa Jakobo ndyaakalinga kuswa paPenyelo, sombi wakalinga kuya cisunkuta ceebo ca kasolo.

³² Asunu asunu bamulunyungu lwakwe Isilaeli tabali mushisa wamulinungi lya kasolo mukwiinga mpowaawo Jakobo mpwaakoomwa.